Iha loron 3 Janeiru, Igreja selebra Loron “Jezús nia naran Santíssimu” [Santíssimo Nome de Jesus]. “Ida-ne’e mak naran santíssimu ne’ebé patriarka sira dejeza, hein ho ansiedade, husu ho halerik, invoka ho suspiru, rekere ho matan-been, haraik bainhira to’o plenitude grasa nian”, Saun Bernardino de Sena hateten.

Jezús nia naran Santíssimu hahú simu venerasaun iha selebrasaun litúrjika sira sékulu XIV nian. Saun Bernardino de Sena no ninia dixípulu sira habelar kultu ba Jezús nia Naran. Iha 1530, Papa Clemente VI ba dala uluk fó ba Ordem Franciscana selebrasaun “Ofício do Santíssimo Nome de Jesus”.

Saun Bernardino baibain lori imajen ki’ik-oan ida ne’ebé hatudu Eukaristia ho raiu sira sai husi nia no, iha klaran, haree monograma “IHS”, abreviasaun ba Jezús nia naran iha lia-gregu (ιησουσ).

Ikusmai, tradisaun devosionál aumenta signifikadu ba sigla sira: “I”, Iesus (Jesus); “H”, Hominum (dos homens); “S”, Salvator (Salvador). Hamutuk, hakarak dehan Jezús ema sira nia Makso’in.

Santu Inácio de Loyola no jezuita sira halo monograma ne’e sai emblema ba “Companhia de Jesus”.

Hodi invoka Jezús nia Naran ho laran-metin:

• Oferese tulun iha nesesidade korporál sira, tuir kristu nia promesa: “Milagre sira-ne’e sei akompaña ema sira ne’ebé fiar: sira sei duni sai diabu sira hodi ha’u nia naran, sira sei ko’alia lian foun sira, sira, sei kaer samea sira no, se sira hemu karik venenu ruma, sei la halo aat ba sira; sira sei tau liman ba moras sira no sira sei hetan isin di’ak” (Mc 16,17-18). Hodi Jezús nia naran, Apóstolu sira fó kbiit ba isin-maten sira (At 3,6; 9,34) no moris hi’as ba mate sira (At 9,40).
• Fó laran-metin iha provasaun espirituál sira. Jezús nia naran fó hanoin ba ema maksalak “oan ne’ebé halai husi aman nia uma” no samaritanu di’ak; ba ema justu fó hanoin kona-baMaromak nia Bibi-Oan inosente nia terus no mate. Proteje ita husi Satanás no ninia hani sira, basá diabu ta’uk Jezús nia Naran, ne’ebé manán nia iha Krús.
• Hodi Jezús nia naran, ita hetan bensan no grasa hotu iha tempu no iha eternidade, basá Kristu dehan: “Buat ne’ebé imi husu ba Aman hodi ha’u naran, Nia sei haraik ba imi” (Jo 16,23). Tanba ne’e mak Igreja remata ninia orasaun hotu ho liafuan sira: “Hodi Jezús Kristu, ita Na’i, ami harohan ne’e hodi Jezús Kristu nia naran, nst. Nune’e, halo tuir duni Saun Paulo nia liafuan ne’ebé dehan: “Atu iha Jezús nia naran ain tuur hotu sei tuku tur iha lalehan, iha rai no iha infernu sira” (Fl 2,10).