1 Outubru 2023

Papa Francisco nia komentáriu ba Evanjellu Domingu XXVI Tinan A.

 

Maun no biin-alin sira, “buongiorno’!

 

Ohin Evanjellu ko’alia kona-ba oan na’in rua, ne’ebé aman husu atu bá serbisu iha to’os-uvas (kf Mt 21, 28-32). Ida hatán kedas “sim”, maibé depois nia la bá. Ida seluk, iha kontráriu, dehan lae, maibé depois arrepende no bá.

Katak sá komportamentu rua ne’e? Fó hanoin kedas katak bá serbisu iha to’os-uvas ezije sakrifísium no sakrifísiu kusta no la’ós espontáneu, maski iha beleza hodi hatene katak ita mako an no liman-rohan na’in sira. Maibé problema la liga ho rezisténsia atu bá serbisu iha to’os-uvas, maibé ho sinseridade ka lae hasoru aman ka an rasik. Defaktu, iha realidade oan na’in rua hotu la komporta ho loloos, ida uluk bosok, enkuantu ida daruak sala maibé sinseru.

Ita haree kazu oan ne’ebé dehan “sim” depois la bá. Nia lakohi halo aman nia hakaran, maibé mós lakohi diskute no ko’alia kona-ba ne’e. Tanba ne’e, nia haksumik an iha “sim” nia kotus, iha halo tuir falsu ida, ne’ebé haksumik ninia baruk-teen no salva nia oin ba momentu ida, nia laran-makerek ida. Nia liu lahó kinflitu sira, maibé nia lohi no sezilude nia aman, hodi la respeita nia ho forma piór liufali ho “lae” diretu ida. Problema kona-ba mane ida ne’e komporta nune’e mak la’ós de’it katak nia ema maksalak ida, maibé korruptu ida, tanba nia bosok lahó problema atu taka no disfarsa ninia dezobediénsia, hodi la aseita diálogu ida ka konfrontu onestu ida.

Oan ida seluk, ne’ebé dehan “lae” maibé bá, nia sinseru. Nia la’ós perfeitu, maibé sinseru. Klaru katak ita gosta nia dehan “sim” kedas. Nia la halo ida-ne’e, maibé, pelumenus, nia manifesta diretamente no iha sentidu ida, nia iha korajen hatutu ninia lakohi bá. Katak, nia assume responsabilidade iha nia aman nia oin ba ninia komportamentu no atua iha loron nia roman. Depois, ho onestidade bázika ida-ne’e, nia kuestiona nia an, nia komprende katak nia sala no halo hikas nia dalan. Ita bele dehan katak nia ema maksalak, maibé la’ós korruptu. Imi rona  didi’ak: nia sala-na’in ida, maibé la’ós korruptu ida. No ba sala-na’in sempre iha esperansa redensaun nian; ba korruptu, iha kontráriu, difisil liután. Defaktu, ninia “sim” falsu sira, ninia aparénsia elegante sira maibé ipókrita no ninia finjimentu sira ne’ebé sai tiha toman aat hanesan “muru borraxa” mahar ida, ne’ebé ih ani akotuk nia proteje nia an husi konxiénsia nia lian. No ipókrita sira-ne’e halo aat maka’as! Maun no biin-alin sira, sala-na’in sim – ita hotu nune’e – korruptu lae! Sala-na’in sim, korruptu lae!

Mai ita oras-ne’e hateke ba an rasik no, iha buat sira ne’e hotu nia roman, ita halo pergunta ruma. Hasoru esforsu atu moris vida onesta no jeneroza ida, atu haka’as an hodi halo tuir Aman nia hakaran, ha’u dispostu/a atu dehan “sim” loroloron, maski ida-ne’e kusta? No bainhira ha’u la konsege, ha’u sinseru/a iha konfrontu ho Maromak kona-ba ha’u-nia difikuldade sira, ha’u-nia mamonuk sira, ha’u-nia frajilidade sira? No bainhira ha’u dehan “lae”, ha’u fila fali? Mai it ako’alia ba Na’I kona-ba ne’e. Bainhira ha’u halo salan ida, ha’u dispostu/a atu arrepende no korrije an? Ka ha’u hatudu oin mahar no moris hanesan mascara ida, hodi preokupa an de’it atu hatudu katak ha’u ema di’ak no onestu/a? Iha  análize ikus, ha’u ema sala-na’in, hanesan ema hotu, ka iha buat ruma korruptu iha ha’u? Imi keta haluha: sala-na’in sim, korruptu lae.

Maria, lalenok santidade nian, tulun ita sai sarani sinseru/a.