Bento XVI asina Ezortasaun apostólika pós-sinodál “Ecclesia in Médio Oriente”no konfirma maun-alin sira nia fiar.

Radio Vaticana/Líbano – Nu’udar kompromisu dahuluk iha Líbano iha ninia viajen apostólika, Amu-Papa Bento XVI vizita Basílika S. Paulo nian, iha Harissa, iha tuku 6.00 loraik oras lokál atu asina Ezortasaun apostólika pós-sinodál “Ecclesia in Médio Oriente”. Bento XVI konvida ema hotu atu keta ta’uk, horik iha lialoos no kuda pureza fiar nian.
“Ne’e maka linguajen Krús glorioza nian. Ne’e maka loukura/babulak Krús nian: hatene konverte ita-nia terus sira iha hakilar domin nian ba Maromak no laran-sadia ba maluk sira; no mós hatene nakfilak, ema sira ne’ebé hetan atake iha fiar no identidade, iha vazu rai nian prontu atu akumula liuhusi abundánsia Maromak nia don sira ne’ebé presiozu liufali osan-mean (kf. 2 Cor 4, 7-18)”.

Amu-Papa konsidera nu’udar providensiál atu asinatura dokumentu nian halo iha loron 14 Setembru, loron Festa Ezaltasaun Krús Santa nian. “Hahí Krús lori ba komrpomisu atu sai manu-ain komuñaun fraterna no ekleziál, bee-matan ba sasin sarani ne’ebé loos; katak halo «hahalok esperansa» nian”.
Kona-ba Ezortasaun Ecclesia in Médio Oriente, Bento XVI dehan katak dokumentu ne’e tulun atu reflete kona-ba situasaun presente atu bele hateke ba futuru ho Kristu nia matan rasik. Amu-Papa mós destaka katak dokumentu ne’e nia iha nu’udar meta diálogu inter-relijiozu ne’ebé loos, bazeia ba fiar iha Maromak Ida no Kriadór.
“Hakarak mós (ezortasaun) kontribui ba ekumenizmu nakonu ho laran-manas umanu, espirituál no karitativu, iha lialoos no domin evanjéliku, ne’ebé foti ninia kbiit iha mandatu husi Na’i Moris-Hi’as: ‘Imi bá hanorin nasaun hotuhotu; sarani sira hodi Aman, Oan no Espiritu Santu nia naran,hanorin sira atu halo loloos buat hotu ne’ebé Ha’u haruka ba imi. Ha’u sei hela nafatin hamutuk ho imi, to’o mundu nia rohan’. (Mt 28, 19-20)”.
Bento XVI taka hodi husu Kreda sira prezente iha Médio Oriente atu keta ta’uk, basá Na’i hela ho sira to’o rohan no Kreda universál akompaña sira ho solidariedade umana no espirituál. 
“Ho sentimentu sira esperansa no enkorajamentu nianatu sai protagonista ativu fiar nian liuhusi komuñaun no testemuñu mak, iha domingu, ha’u sei entrega Ezortasaun pós-sinodál Ecclesia in Médio Oriente ba ha’u nia Maun-alin veneradu Patriarka, Arsebispu no Bispu sira, ba amlulik sira hotu, ba diákonu sira, ba relijiozu no relijioza sira, ba seminarista sira no ba fiar-na’in sarani leigu sira”.
Vizita ba Bazílika S. Paulo nian maka kompromisu halo iha sesta no iha sábadu ohin, selebra Santa Misa privada iha tuku 8 dadeer oras lokál.  Ohin mós enkontru ho membru governu nian, ho korpu diplomátiku, xefe relijiozu no reprezentante mundu kultura nian tuku 11.00 no iha tuku 6.00 loraik sei hasoru foin-sa’e sira.

Amu-Papa sei fila fali ba Roma domingu  iha tk 10.40 kalan, oras lokál.

Viajen ba “rai ai-sedru nian” maka viajen daruak Bento XVI nian ba Médio Oriente, depoizde viajen ne’ebé nia halo iha Maiu 2009 ba Jordánia, Israel no Territóriu Palestina nian.

Amu-Papa sei fila fali ba Roma domingu  iha tk 10.4o kalan, oras lokál.