23 Setembru

S. PIO husi PIETRELCINA (PADRE PIO), NA’ILULIK

Padre Pio ho naran batizmu Francesco Forgione. Padre Pio moris iha 25 Maiu 1887 iha Pietrelcina rejiaun Benevento, Italia, oan husi Grazio Forgione no Maria Giuseppa.

Sei kiik kedas Francesco, hatudu interese ba sasán lalehan nian. La falta iha missa no orasaun sira iha uma kreda. Devosaun boot Jezús no Maria no belun boot ho nia Anju da Guarda; ne’ebé nia loron-loron husu atu tulun nia moris tuir dalan Evanjellu. Nune’e mós bainhira sai ona na’ilulik, husu ba ema sira ne’ebé nia akompaña atu idakidak iha devosaun ba ninia Anju da Guarda; basá sira sei lori ita ba Maromak.

Ho tinan 16 tama iha novisiadu Ordem Frades Menores – OFM, Capuchinnos hafoin adota naran foun ne’ebé bolu nia ” Frei Pio”. Iha 10 Agostu 1910 simu ordenasaun saserdotal, maibé tan motivu saúde ne’ebé la dun di’ak, hela ho família durante tinan 6. Iha Setembru 1916 ba fali konventu no hela iha San Giovanni Rotondo iha nia moris tomak.

Padre Pio hala’o nia knaar iha pastorál ho haraik-an no orasaun. Serbi sarani sira iha diresaun espírituál iha sakramentu konfesa no mina sarani ba moras no kiak sira. Nia rona sakramentu konfisaun lori oras 14 loron- loron. Nia simu terus barak hanesan Kristu Kruxifikadu.

Iha loron 20 Setembru 1918 simu estigma – Jezús nia kanek lima iha ninia isin durante tinan 50. Nia harii ospitál boot ida ho naran ” Casa Sollievo della Sofferenza” no mós grupu ida orasaun nian nu’udar sinál domin no paz Maromak nian iha mundu ne’ebé nakonu ho sofrimentu.

Iha 22 Setembru 1968 ninia grupu orasaun nian mai husi fatin sira, selebra Eukaristia hodi komemora tinan 50 Padre Pio simu estigma Na’i Jezús nian iha nia isin. Hafoin iha 23 dadersaan Padre Pio fila fali ba Aman-nia Uman.

Sai beatu iha 2 Maiu 1999 no kanoniza iha 16 Juñu 2002 husi Papa S. João Paulo II.