Avaliasaun ba festa aniversáriu da-25 EBC-Maria Auxiliadora

Dili, 16 Setembru 2023

Komunidade edukativa EBC Maria Auxiliadora kompostu husi manorin sira, Irmán sira no Inan-Aman halibur malu atu halo avaliasaun ba festa aniversáriu EBC-Maria Auxiliadora. Enkontru hahú ho orasaun badak hafoin Ir Inês Bartolo Freitas, ekónoma, halo relatóriu kona-ba fundu no gastu sira no saldu ne’ebé iha. Aprezentasaun hotu halo ho transparénsia kona-ba entrada no gastu sira ne’ebé kada komisaun uza.

Depoizde Ir Inês nia relatóriu, kada komisaun hato’o sira-nia avaliasaun no buat ne’ebé sira hala’o. Momentu ne’e mak momentu atu halo introspesaun no rona ho hakmatek sira ne’ebé fahe la’ós de’it sira-nia hanoin no sentimentu sira, maibé mós sujestaun sira atu toma nota ba loron seluk.

Enjerál bele dehan katak selebrasaun halo ho susesu, iha kolaborasaun di’ak entre komisaun sira no atensaun atu tulun komisaun seluk ne’ebé presiza liu, husi membru komisaun seluk.

Iha sujestaun ruma atu tau atensaun bainhira organiza fali. Ida, atu manorin sira la prepara hahán, nune’e bele akompaña estudante sira no partisipa iha eventu iha loron tutun, iha-ne’ebé iha mós prezensa Sua Ex.cia Ministra Edukasaun nian. Aleinde ne’e, envolve mós estudante atu tulun iha parte sira ne’eb’e bele halo.  Rua, atu kria tan komisaun seguransa nian liuliu ba asisténsia iha portaun no ba momentu selebrasaun, no iha fatin sira seluk hanesan iha fatin festa.  Iha mós sujestaun atu haruka surat agradesimentu ba doadór sira no família sira ne’ebé ho laran-luak oferese osan, materiál no tempu ba festa ne’e.

Iha avaliasaun hotu-hotu agradese Maromak no Na’i-Feto Auxiliadora basá komunidade edukativa koko ho modu konkretu Providénsia Divina no Na’i-Feto nia tulun. Ir Jacinta Gusmão resalta serbisu hamutuk no kolaborasaun di’ak entre hotu: manorin, aman-inan, estudante no pesoál hotu hodi la’o iha sinodalidade ba susesu festa nian. Aproveita mós biban ne’e atu Ir Jacinta agradese komunidade edukativa ba tinan tolu hamutuk, no, iha surpreza, ho maneira simples manorin sira, husi pré-eskolár to’o terseiru siklu kumprimenta ba misaun foun iha fatin seluk. Ikusmai, hotu-hotu ne’ebé prezente halo almosu hamutuk hodi nune’e disolve komisaun festa nian.

(JG)