INAN LALEHAN – Padroeira Mongolia

Mongolia, husi lixu Na’i-Feto deskartadu sira-nian

Amu-Papa iha ninia vizita apostólika ba Mongolia husi loron 1 to’o 4 Setembru 2023, hasoru señora ida, señora Tsetsege inan ba oan na’in 11, ne’ebé tinan sanulu liubá hetan iha lixu-fatin estátua ai nian ne’ebé ho forma di’ak ho oin feto furak ida. Feto ne’e la komprende kedas katak nia mak Virjen Imakulada. Fila ba uma, nia ko’alia ho lian ki’ik ba ninia familiár sira: “señora furak ne’e hakarak mai iha ha’u-nia taka-baluk”. Bainhira nia komprende sé mak nia, señora Tsetsege entrega estátua ne’e ba komunidade katólika, hafoin tau iha parókia lokál.

Kardeál Marengo: Virjen Maria besik ita ida-idak

Istória estátua Virjen Maria nian hanesan kardeál Giorgio Marengo, prefeitu apostóliku Ulaanbaatar nian dehan nune’e: “Ha’u hanoin kedas katak Virjen Maria liuhusi hetan estátua ne’e hakarak dehan maiami buat ruma”. Kardeál Marengo – hanesan haktuir iha artigu resente ida “l’Osservatore Romano” nian – dehan katak nia la konsege esplika “oinsá mak estátua ne’e bele ba para iha lixu-fatin, basá, iha parte ne’e, katóliku sira uitoan liu”. Nia hatutan, “Nune’e ha’u hanoin katak Na’i, liuhusi nia Inan Santa, sai prezente iha situasaun susar liu atu dehan katak nia besik mai ami ida-idak”.

País ida iha Maria nia hateken nia okos

Kardeál Marengo subliña mós katak Virjen Maria “nafatin pronta atu hasoru ita iha fatin sira dezesperu nian, deskarte nian, terus nian, abandonu nian mós”. “Kona-ba estátua – nia hateten – ha’u ko’alia ho Santu Padre mós bainhira ha’u ba vizita nia ho delegasaun ki’ik-oan ida ho monje budista sira Mongolia nian: ha’u hatudu ba nia imajen ida no nia haksolok tebes”.

Iha 8 Dezembru 2022, nia halo koroasaun ba estátua Virjen Maria nian iha katedrál Ulaanbaatar nian no fó hatais mantu ida forma husi hena  pedasu ki’ik-oan sira husi sarani sira Mongólia nian no husi misionáriu sira. Iha okaziaun ne’e, kardeál Marengo konsagra Mongolia tomak ba Maria. No “Inan lalehan” sai íkone ba Kreda foin-sa’e ne’e.