Dili, 28.8.2023

Moniz Libanha

 

“HANESAN FERMENTU DIAK NE’EBÉ FÓ MORIS”.

 

Ohin komunidade S. José Novisiado halo Festa Gratidaun nian, hodi Hahu ho  Selebrasaun Eukaristia, ne’ebé preside husi Pe. Nelson SDB. Hahi no agradese ba Maromak ne’ebé ho domin bo’ot halibur ita hamutuk atu hadomi no serbi Nia ho ksolok, iha espiritu familia nian, no iha ita nia maun alin sira nia le’et.  Nu’udar fermentu diak ne’ebé fó moris, hanesan feto ida tau iha fariña sasukat tolu to’o masa tomak sa’e. Nune’e presiza esperansa, no fó hanoin mai ita ida-idak atu loke ita nia fuan hodi simu fermentu diak no husik nia buras iha interior hodi hatudu sai ba liur hamutuk ho maun alin sira. Nune’e husi fermentu ne’ebé buras tan domin no husi domin ita agradese malu ba buat diak ne’ebé Na’i haraik mai ita no ba buat hotu ne’ebé ita simu durante tinan ida nia laran, ita agradese mos ba Irman sira, komunidade Edukativa, oratoriano no kolaborador sira, liu-liu husi fuan ita agradese ba madre Evangelina ne’ebé sai tali uniaun  nian entre ita. Agradese mos ba madre nia prezensa nu’udar inan, guia, anima no tulun nain iha ita-nia ain hakat sira.