Laura moris iha Firenze iha loron 5 Janeiru 1872, oan husi kaben-na’in Alessandro no Angela Mazzoni. Família ne’ebé riku no raan nobre muda lalais ba Roma. Hafoin iha Roma Laura estuda medisina.

Bainhira nia diretór espirituál, salezianu ida, dehan katak Maromak hakarak nia entre Don Bosco nia Irmán sira, nia pasa kalan tomak iha orasaun. Nia sente duni atrasaun ba moris saran iha vida saleziana no deside husik moris di’ak no iha “bem-estar” atu sai Irmán Saleziana . Halo tiha profisaun iha Institutu FMA iha tinan 1898, nia servisu kedas iha Sicilia to’o tinan 1921, tuir Maddalena Morano nia ain-fatin sira, edukadora FMA boot seluk. Hafoin ladún foin-sa’e ona, superiora sira haruka Laura ba Polónia nu’udar pioneira. Nia iha méritu atu kuda karizma salezianu, iha ninia versaun feminina iha rai doben ne’e. Liuliu iha akontesimentu funu boot daruak, “inan kiik” (mateczka) ne’e hala’o moris domin ho aten-brani.

Madre Laura mak feto ida nakonu ho Evanjellu no iha fuan lakan ho karizma, Nia hatene kris iha-ne’ebé de’it komunidade pronta atu tuir Jezús iha dalan ezijente rahun-di’ak evanjéliku sira-nian. Nia asegura formasaun sólida; kuda domin ba Sistema Preventivu Don Bosco nian, hodi aplika iha situasuan difisil liu mís ho labarik orfán sira, mesak, abandonada.

Nia moris atualidade karizma salezianu nian iha rai ida iha-ne’ebé “periferia ezistensiál sira, atu dehan ho Papa Francisco, aumenta ba beibeik, liuliu ho invazaun estranjeira no estermíniu organizadu ne’ebé akontese iha funu mundiál daruak. Laura reza barak no halo sakrifísiu maka’as ba martíriu ne’ebé Polónia sofre husi tinan 1938-1945. Ba sira ne’ebé husu ba nia: “ita la hanoin Italia ka?” nia hatán: “ha’u iha nasaun rua Italia no Polónia, hau labele fó hatene ba imi ida ne’ebé mak hau hadomi liu”. Irmán sira no menina 104 tenke husik Vilnius, ho modu segredu, ho komboiu espesiál, tanba entre sira barak mak la hetan lisensa ka autorizasaun. Ir. Laura hatán ‘sim’ ba sira hotu! Provinsiál preokupa, karik ema sei tiru mate sira. Madre Laura dehan “keta ta’uk, hau sei reza”. Viajen ne’ebé lori loron 16, nia rohan ho susesu, nakonu ho ksolok, milagre tebes ida.

Bainhira funu hotu ona, sira tenke husik área sira ne’ebé sai Uniaun Soviétika nian no hahú husi inísiu fali. Ir. Laura hahú fali: nia loke uma 12, Novisiadu foun harii iha Pogrzebien, iha kastelu antigu ida ne’ebé Alemaun sira uza atu oho feto no labarik sira. Iha fatin hotu ksolok, moris no hamnasa fila fali. Maibé Ir. Laura sai fraku liután. Ho tulun husi Irmán sira, no hetan suporta husi ema hotu nia orasaun, nia mate iha ne’ebá iha loron 30 Agostu 1951. Nia isin-mate haloot iha Pogrzebien. Prosesu estudu kona-ba moris no virtude “serva de Deus”, Ir. Laura Meozzi selebra iha Polónia iha Dioseze Katowice durante tinan 1986-1994. Papa Bento XVI proklama veneravel iha loron 27 Juñu 2011.