22 Agostu

Virjen Santa Maria, Liurai-Feto

Evanjellu Lc 1,26-38

«Liutiha fulan neen, Maromak haruka anju Gabriel ba knua ida Galileia nian, naran Nazaré, ba feto-raan ida ne’ebé hakotu tiha ona ba mane ida naran José, husi David nia uma-kain; feto-raan ne’e naran Maria. Tama tiha iha nia uma, anju dehan: “Rahun di’ak, feto kmanek wa’in tebes! Na’i ho ita!” Rona tiha lia ne’e, nia laran taridu hodi husu ba nia an rasik kumprimentu ne’e katak sá loos. Anju dehan ba nia: “Keta ta’uk, Maria; basá ó hetan rahun di’ak tebes iha Maromak futar oin. Ó sei ko’us no tur ahi oan mane ida. Ó sei hanaran Nia Jezús. Nia sei sai ema boot; sei hanaran An Na’i aas liu hotu nia Oan. Na’i Maromak sei haraik ba Nia nia aman David nia kadunan. Nia sei ukun Jacob nia uma-kain ba nafatin; nia ukun sei rohan laek.” Maria husu ba anju: “Ne’e sei sai oin sá loos, basá ha’u la hola mane?” Anju hatán ba nia: “Espíritu Santu sei tun ba ó no Na’i aas liu hotu nia kbiit sei hamahan ó. Tan ne’e santu ne’ebé atu moris sei hanaran An ‘Maromak nia Oan.’ Ó nia feto maluk Isabel mós ko’us tiha oan-mane ida, maski ferik ona. Ida ne’ebé ema dehan la ko’us, nia ko’us fulan neen ona; basá, ba Maromak, la iha buat ida ne’ebé la bele.” Maria dehan: “Ne’e sá, Na’i nia atan oan mak ne’e. Halo tuir ita liafuan bá!” Hafoin anju husik nia».

Reflesaun

Ohin, Igreja konvida ita atu hateke ba Na’i-Feto nu’udar Liurai-Feto. La’ós liurai-feto ho koroa osan-mean nian, ho ema boboot tuir nia. Liurai-Feto ne’e mak primeira atu serví. Hanesan ita bele lee iha Lucas, maski nia la komprende Anju nia liafuan sira, Maria dehan: «Ha’u Na’i nia atan-feto mak ne’e!» (Lc 1,38). Na’i-Feto mak sinál ida oinsá Maromak hateke ba umanidade: haraik-an mak kritériu dahuluk no ikus, atu tuir. Ita hetan iha nia Oan, Jezús Kristu, Ida-ne’ebé moris loloos haraik-an ne’e, to’o pontu saran nia moris rasik.

Ohin, hodi hateke ba Maria nu’udar Liurai-Feto, ita mós tenke buka banati tuir, iha “Sim” ne’e, ne’ebé nia fó no ita simu konvite atu fó. Maria nia Dalan la’ós fasil, dalan dixípulu nian nunka fasil, maski nune’e nia la mesak, Maromak akompaña ida ne’ebé konfia iha Nia. Serteza ne’e mak maria simu husi momentu dahuluk kedas no fó mai ita ida-idak, sarak hanesan Maroa, ita iha kapasidade atu dehan: “Sim”.

Iha Anju nia ibun, Maria tenke haksolok, basá «Na’i ho ó» (Lc 1,28), ne’e mak segredu boot Maria nian. Nia mak feto haksolok, bsá nia la mesak. Solidaun mak momentu oportunu atu buat aat ataka. Maria  mak ema rahun-di’ak nian, ksolok ne’ebé iha fundamentu iha Kristu ne’ebé manifesta iha momentu ida-idak tensaun nian: husi momentu anunsiasain to’o Kalváriu, Na’i-Feto saran an ba Maromak ne’ebé hili nia, lahó ta’uk ka laran rua-rua.

Hodi selebra loron furak ne’e, ita ida-idak mós simu konvite ne’e: laran metin iha Na’o no nune’e sai sasin Ksolok nian ne’ebé hola isin, katak Jezús Kristu. Ita dalabarak la iha laran metin, tanba ne’e ita buka iha orasaun Salve Liurai-Feto, S. Bernardo de Claraval nian, forsa no prosimidade ho Maria Liurai-Feto: «Salve Liurai-Feto, Inan hanoin ami (Mizerikórdia nian)…».