21 Agostu

Papa Pio X, Papa ho preokupasaun Pastorál

Pio X mak Papa dahuluk, iha istória kontemporánea, mai husi klase kamponeza (to’os-atan sira); ninia formasaun mak eskluzivamente pastorál: nia la okupa kargu ruma iha Cúria Romana, la hala’o mós atividade diplomátika sira Santa Sé nian.

Orijen

Giuseppe Melchiorre Sarto moris iha, iha dioseze Treviso, iha 2 Juñu 1835, oan daruak husi oan na’in 10. Ho nia aman nia mate, nia atu aseita serbisu iha Prefeitura — ho tinan 17 – maibé nia inan tulun nia tuir ninia vokasaun, hodi serbisu ho nia, dadeer no kalan atu bele moris, Domin no firmeza ida ne’ebé Giuseppe Sarto nunka haluha. Nia gosta estuda, iha saude di’ak, halo ema hamnasa no, tempu hanesan, badinas, no nia moris riku ho obra karidade nian.

Papadu

Nia sai kapelaun, pároku, diretór espirituál iha semináriu, depois bispu Mantova nian, patriarka Venezia nian no ikusmai Papa. Ninia hahalok primeiru mak halakon “veto leigo”, direitu mai husi monarkia europeia balun atu intervein iha eleisaun papál ho Konstituisaun Commissum nobis. Katesizmu ne’ebé lori nia naran, ho estrutura partikulár “pergunta no resposta” nian koñesidu iha fatin barak. Katekeze ne’e ba ema simples sira iha sosiedade ida-ne’ebé kultura ladauk tama iha kamada sosiál hotu. Pio X nia preokupasaun mak habelar katekeze iha sarani sira nia leet.

Avansu sira iha Igreja

Entre karakterístika sira ne’ebé koñseidu liu iha ninia pontifikadu mak opozisaun ba modernizmu no ba lei anti-kristun sira iha Fransa, inísiu reforma direitu kanóniku nian, reforma Cúria Romana, antesipasaun ba tinan hitu ba primeira komuñaun no Komuñuan frekuente no loroloron. Tanba ne’e mak ema hanaran Pio X “Papa Eukaristia nian”. No, iha Itália, moderasaun ba Papa Pio IX ninia bandu ba katóliku sira atu partisipa iha vida polítika. Nia mós favorese renovasaun Liturjia nian, movimentu bíbliku, fó fatin dahuluk ba knananuk gregorianu. Iha sentru, partisipasaun iha Eukaristia. Ida-ne’e hotu atu temi de’it buat ruma kona-ba rikusoin ninia intervensaun sira-nian durante ninia Pontifikadu.

Iha sentru, preokupasaun Pastorál

Papadu Pio X nian mak loos duni, “ativu” liu no oioin, to’o ninia belun boot no Sekretáriu Estadu, Kardeál Rafael Merry del Val, evidensia: “Serbisu boot ne’e, liuliu ita deve ba ninia inisiativa pesoál, mai husi ninia laran-di’ak, ne’ebé ema ida labele duvida”. Iha moris no majistéiru nia sentru mak preokupasaun pastorál, iha sosiedade ida ne’ebé bele nota, krize fiar nian ba beibeik. Ninia intensaun ne’e bele haree espresa momoos iha lema ninia Pontifikadu nian: “Instaurare omnia in Christo”, foti husi Surat ba Eféziu sira. Ikus, Saun Pio X hakarak moris kiak. Defaktu, ninia testamentu hakerek nian: “Ha’u moris  mai kiak, ha’u hala’o moris iha pobreza no ha’u hakarak mate kiak liu”.