21 Agostu

“Our Lady of Knock”  or “Our Lady of Silence” (Irlanda)

Iha 21 Agostu 1879, besik tuku 8 kalan, ema na’in 15 husi knua Knock iha County Mayo, Irlanda, sai sasin ba Na’i-Feto nia aparisaun, hamutuk ho S. José, S. João evanjelista no Bibi-Oan no krús ida iha altar leten iha Kreda Parókia nia. Sasin sira haree aparisaun durante udan ne’ebé tau ba oras rua nia laran, hodi reza rozáriu. Maski sira bokon didi’ak, didin lolon vizaun nian la iha udan monu ba leten.

Sira na’in 15 ne’ebé sasin vizaun ne’e husi knua Knock nian no fatin besik-besik, no iha tinan entre 5 to’o 74. Sira ida-idak fó sasin ba Komisaun Interrogatóriu nian iha Outubru 1879. Sira-nia sasin tuir Komisaun Inkéritu nian bele konfia no satisfatóriu.

Tuirmai mak sasin sira-nia liafuan tau hamutuk: “Iha Kreda kotuk nia didin lolon tomak nakonu ho naroman nabilan, ne’ebé bele haree husi dook. Buat hotu foti sae husi rai besik sentímetru 70. Iha altár, iha nia leten iha bibi-oan ne’ebé hamriik ho Krús. Anju sira hale’u altár no Bibi-Oan, semo iha leten. Hale’u sira iha fitun nabilan, fekit hanesan bola vidru nian”.

“Iha altar nia karuk iha figura na’in tolu: S. José iha karuk, Na’i-Feto iha klaran, no S. João Evanjelista iha sorin loos, mane na’in rua ne’ebé proteje Maria, ka simu Maria iha sira-nia uma. S. José nia fuk no ibu-rahun mutin no nia hakruuk ho respeitu ba Maria. S. João hatais ho paramentu Missa nian ho Mitra bispu nian iha ulun, livru ida iha nia liman karuk, no iha liman loos fó bensan. Na’i-Feto nia tamañu naturál; sira seluk ki’ik uitoan”.

“Na’i-Feto nia matan hateke ba lalehan ho liman nakloke. Maria furak liu. Nia hatais unuk mutin ho faixa. Veu tun husi nia ulun kotuk to’o ain. Iha nia ulun leten iha koroa osan-mean nian. Entre koroa no veu nia nia ninian iha roza osan-mean nian…”

Aspetu ne’ebé marka liu husi aparisaun ne’e mak vizionáriu sira la rona buat ida. Figura umana na’in tolu, anju sira, bibi-oan – hotu-hotu silénsiu. Enkuantu ema koñese apariasaun ne’e nu’udar “Our Lady of Knock”, ka Na’i-Feto Knock nian, ninia títulu ofisiál mak “Our Lady of Silence” ka “Na’i-Feto Silénsiu nian”.

Iha milagre barak hanesan hetan isin di’ak ne’ebé dokumenta iha Bazílika Knock nian. Milagre sira-ne’e akontese kedas depoizde aparisaun. Labarik feto ida esprimenta tilun di’uk no moras maka’as iha nia tilun karuk. Bainhira vizita fatin aparisaun nian, nia inan tau simentu pedasu ki’ik ida husi didin lolon uma-kreda nian ba nia tilun. Hafoin, durante Missa, Delia sente moras maka’as iha nia tilun, tuir kedas ho tilun di’uk ne’ebé kura no la iha ona moras. Ne’e mak kazu ida de’it husi kazu liu atus neen ne’ebé dokumenta nu’udar milagre, akontese iha Knock. Ne’e mak prova interesesaun kbiit-na’in Na’i-Feto nian.

Ho tinan sira ne’ebé liu, devosaun ba aparisaun ne’e sai boot, parókia ki’ik-oan nia kreda sai luan atu inklui bazílika ida, ho kapela sira, fatin atu simu ema moras sira, no aeroportu ida mós atu lori peregrinu sira iha sikun oan County Mayo nian.

Amu-Papa na’in rua mak vizita Knock, Papa S. João Paulo II iha Setembru 1979 atu selebra aparisaun nia tinan 100 no Papa Francisco iha 26 Agostu 2019 hanoin tinan 140 aparisaun Knock nian.