15 Agostu

ASUNSAUN VIRJEN SANTA MARIA nian

«Ha’u klamar hahí Na’i, ha’u neon haksolok iha Maromak ha’u Maksoin».

EVANJELLU LUCAS 1,39-56

«³⁹Iha loron hirak neba Maria hiit an lalais ba foho, ba knua ida iha Juda. ⁴⁰To’o tiha Zacarias nia uma, nia kumprimenta Isabel. ⁴¹Wainhira Isabel rona Maria nia lia, kosok oan book an iha nia knotak ho ksolok. Nakonu ho Espiritu Santu, ⁴²Isabel ko’alia ho lia makaas dehan: “Ita boot diak liu feto hot-hotu! Ita boot nia oan diak liu! ⁴³Be ha’u se los atu ha’u Na’i nia inan hiit an mai ha’u nia uma? ⁴⁴Basa, ita lia kumprimento nian to’o tiha iha ha’u tilun, kosok oan book an ho ksolok iha ha’u knotak. ⁴⁵Rahun diak ba ida ne’ebé fiar katak lia ne’ebé Na’i hateten sei sai tuir los duni.” ⁴⁶Maria hatán:

“Ha’u klamar hahi Na’i,
47ha’u neon haksolok
iha Maromak ha’u Maksoin.
48Basa Nia hare nia atan feto ne’ebé folin laek.
Tebes duni, houri ohin ba oin
Ema hotu sei dehan ha’u rahun diak.
49Basa Ida ne’ebé bele buat hotu
halo buat kmanek wa’in tebes mai ha’u.
Nia naran santu.
50Nia laran luak houri otas
ba sira ne’ebé hamtauk Nia.
51Nia hatudu nia liman nia kbiit,
hodi halakon ema loko an sira.
52Nia hamonu ukunna’in sira
husi sira nia tur fatin,
hodi foti fali ema kiik sira.
53Nia haraik buat diak hotu ba ema mukit sira,
hodi haruka ema riku sira
ba ho liman mamuk.
54Nia tau matan ba nia atan Israel
hodi hanoin fali nia laran luak,
55tuir lia menon ne’ebé Nia hakotu ona
ba ita nia bei ala sira,
ba Abraao no nia bei oan sira ba nafatin.”

REFLESAUN

Maria nia knananuk deskreve programa tomak ne’ebé Maromak halo ba nia desde inísiu Maria simu Maromak nia mensajen husi anju, nia kumpri hotu no igreja kontinua moris tuir ba tempu hotu. Husi vizitasaun ba Judeia, Maria lori Jezús liu husi dalan sira rai nian. Iha dormisaun ka toba Maria nian no iha Assunsaun, Jezús mak lori fali Nia inan Maria husi dalan sira Lalehan nian, ba templu rohan-laek no ba vizitasaun definitiva. Iha festa ida ne’e hamutuk ho Maria ita proklama Maromak nia obra, ne’ebé bolu umanidade atu la’o hamutuk ho nia ba dalan moris hias nian. Husi Maria, Jezús realiza ona Nia obra tomak, ho Maria ita dehan: “sei hatún ukun-na’in sira no foti ema haraik-an sira”. Ema haraik-an mak sira ne’ebé fiar iha Maromak nia Liafuan hodi lao tuir iha nia dalan sira, sira ne’ebé simu moris foun husi Kristu. Maromak tau iha sira no kumpri iha sira Ninia maravilla.

Reza liuhusi Maria

Espresaun “reza ba Virjen Maria”…. maneira  ida ne’e la’ós absolutamnete loos, tanba orasaun sarani nian mak dirije ba Maromak Aman, Oan no Espíritu Santu; Maromak de’it mak atende ita nia hamulak sira. Reza liuhusi Maria katak husu ba nia atu reza mai ita: “harohan mai ami ema maksalak oras ne’e no oras ne’ebé ami atu mate” Maria nia intervensaun maternál iha Kaná rezumu ninia harohan da’et ba ita. Nia ita nia “advogada” ne’ebé dehan mai ita “imi halo tuir buat ne’ebé Nia dehan”.

Reza ho Maria

Maria iha ita nia sorin no lori ita ba orasaun, nu’udar inan nia tau no hanorin liafuan sira harohan nian ba nia oan sira. Iha Maromak nia Glória, ne’ebé ohin ita fó onra ba Maria, nia kontinua misaun ne’ebé Jezús entrega ba nia iha krus hun: “Ida ne’e ó-nia Oan”. Reza ho Maria katak hakneak iha nia sorin atu sai ida ho ninia orasaun. Maria akompaña no gia ita iha ita-nia la’o dalan sira atu bá Maromak.

Reza hanesan Maria

Mai ita aprende hamutuk ho Maria dalan sira orasaun nian. Iha ninia eskola, nia  “ne’eb’e rai no medita iha nia fuan” akontesimentu sira Jezús nia moris no nia infánsia nian, ita medita Evanjellu no, hodi Espíritu Santu nia roman, ita la’o bá oin iha dalan sira lia-loos nian. Ita-nia orasaun sai agradesimentu no repete Magnifikat. Ita tau ita-nia ain-hakat sira iha Maria nia ain-hakat sira no ho nia dehan ho laran metin: “halo tuir Ita Liafuan bá, Na’i!”.