OPIAM  INSPETORIA TIN NIA ESPERIENSIA VOLUNTARIA MISIONARIA

Laga, 10-13 Agostu 2023

Noemia de Deus, FMA.

Esperiensia furak nakonu ho ksolok no laran manas Misionaria nian ne’ebé realiza iha Laga-Tomagua, durante loron 4 (ha’at) hamutuk ho labarik, animadora no formadora 78 (Hitu nulu resin walu). Iha atividade ne’e hahu ho lia fuan makloken husi Madre Inspetora, Me. Alma Castagna, FMA, hafoin orientasaun husi Me. Luisa Fernandes, FMA kona ba atividade hotu ne’ebé sei realiza durante loron hirak nia laran. Durante loron 4 (ha’at) nia laran nakonu ho atividade no esperiensia ne’ebé nakonu ho estuziasmu.

Iha lia fuan makloken husi Madre Inspetora, Me. Alma dehan: “Buat ne’ebé importante iha momentu ida ne’e mak imi mai iha ne’e atu halo ‘Esperiensia Voluntaria Misionaria’ ho imi nia ‘an-tomak’. An-tomak dehan katak imi tenke uza imi nia matan no tilun atu hare no rona ema seluk nia presiza. Saida mak ema ne’e hein, saida mak nia hakarak dehan ba imi, imi rona no imi hare ho matan. uza kakutak halo saida, wainhira rona no hare kakutak hanoin hodi husu ba an-rasik ‘ha’u bele halo saida?’ hanoin hamutuk ho kolega sira ho imi nia kreatividade no kapasidade. Pois ho imi nia liman atu halo, laos hanoin no mehi deit. Uza mos imi nia ain atu lao ba hakbesik sira seluk. No ikus uza imi nia fuan. Imi tenke halo buat sira ne’e hotu ho fuan ka ho domin laos tamba obriga husi Madre sira. Tamba ne’e mak ha’u dehan imi halo esperiensia ne’e ho imi nia-an tomak”.

Iha Misa abertura nian, Pe. Andre Belo, SDB mos koalia kona ba São Lorensu ne’ebé sai Martiriu tamba halo diak ba ema kiak sira. Nune’e sai mos ezemplu ba OPIAM sira ne’ebé halibur iha ne’e atu sai laran manas liu tan iha Esperiensia voluntaria Misionaria ne’e. Iha kalan daruak Me. Cecilia del Mondo, FMA fo Buona note, Madre dehan ita mesak ita halo ituan maibe hamutuk ita bele halo barak, laos iha ne’e deit maibe bele iha Timor tomak no mundo tomak. OPIAM hamutuk iha imi nia eskola, oratorio no fatin hotu, hamutuk bele halo buat barak. Hanesan buat ne’ebé imi halo ona, hamutuk imi ba vizita ema sira, imi barak ba hamutuk nune’e imi nia prezensa sai signifikadu liutan. Taka buona note ho kanta “ Jesus hadomi o no Jesus hadomi ha’u, Jesus hadomi o no ha’u.

Iha esperiensia voluntaria misionaria nian, partisipante hotu ba vizita familia sira iha Saelari, Nunira, Buigira, Binagua no Laga laran. Ida-idak ho ksolok no laran manas atu ba hare, rona no fahe buat ne’ebé iha. Labarik sira halo buat hotu ba ema sira ne’ebé sira hasoru ho entuziasmu bo’ot. Sira la sura kole maibe iha hakarak bo’ot atu servi. Esperiensia  furak ne’ebé sira hetan mak bukae folin bo’ot ne’ebé sira sei la haluha.

Iha avaliasaun molok remata atividade ne’e, maioria husi sira espresa ksolok no gratidaun ba esperiensia furak ne’e. Barak mak agradese ba akolhensia no fasilidade hotu ne’ebé hetan husi Madre sira iha Komunidade Laura Vicuña Laga, agradese mos tamba bele hetan oportunidade hodi ba servi maluk sira liu-liu sira ne’ebé presiza maski halo buat ruma ki’ik deit maibe hetan apresiasaun bo’ot husi familia sira ne’ebé sira ba hasoru. Agradese mos ba Inspetoria no ba ambitu Ad-gentes ne’ebé halo ona planu ba atividade ne’e. Iha sujerimentu balu mak hanesan, husu atu kontinua halo atividade hanesan ne’e iha fatin seluk.

Ikus liu, agradese tebes ba Maromak ba momentu furak ida ne’e, agradese ba Inspetoria no Komunidade sira liuliu Komunidade Laura Vicuña Laga, ba Padre Rui Gomes, SDB nu’udar Padre Paroku ne’ebé hatan ona ba pedidu husi Madre organizadora sira hodi realiza programa hirak ne’e. Ba Padre Andre Belo, SDB nu’udar Diretor Eskola Katolika Dom Bosco Laga ne’ebé oferese aula sira eskola nian no fasilidade lubuk ida ba partesipante sira hodi uza durante loron hirak ne’e, ba Madre sira ne’ebé organiza, ba PNTL esquadra Laga nian mestre sira ne’ebé halo seguransa nune’e partesipante sira sente seguro, ba familia sira ne’ebé fo ka husik ona sira nia oan sira atu tuir atividade ne’e nomos agradese wain ba adolesente no labarik sira ne’ebé nakonu ho espiritu servi nian, nune’e bele partesipa ho ativu iha eventu priveliziadu ne’e. Buat hotu lao diak tamba kolabaorasaun husi ita hotu. Hanesan Me. Cecilia dehan: “Hamutuk ita bele halo barak”.