Festa litúrjika – 10 Agostu

SAUN LOURENÇO, DIÁKONU NO MÁRTIR

DON MORIS NIAN

Evanjellu João 12,24-26

«Tebes, tebes, Ha’u dehan ba imi: trigu musan ne’ebé monu ba rai la mate karik, nia hela mesak; maibé mate karik, nia fó fulin barak. Ema ne’ebé hadomi nia moris, sei lakon nia moris ne’e; ema ne’ebé hewai nia moris iha mundu ne’e sei rai hela nia ba moris rohan laek. Ema ne’ebé serví Ha’u, sei tuir Ha’u; no iha fatin ne’ebé Ha’u hela, Ha’u atan mós sei hela iha ne’ebá. Ema ne’ebé serví Ha’u, Ha’u Aman sei hahi nia».

Reflesaun

Mártir sira la’ós fanátiku relijiozu sira ne’ebé mate atu hatudu buat ruma ka fó kastigu ba ema ruma. La iha fanatizmu iha martíriu ne’ebé loos maibé ninia kontráriu. Iha umildade fini ida nian ne’ebé aseita atu mate nune’e moris bele sai posivel liután:

«trigu musan ne’ebé monu ba rai la mate karik, nia hela mesak; maibé mate karik, nia fó fulin barak».

Martíriu kristaun la hamosu mate maibé moris. Martíriu kristaun mak “sim” profundu ida ba moris ne’ebé liuhusi saran an rasik. Iha sentidu ida-ne’e buat ne’ebé Saun Lourenço esperimenta ho modu ne’ebé hasuli raan iha grella (besi atu lalar na’an) nia leten hanesan ho buat ne’ebé akontese iha ita-nia uma barak iha-ne’ebé ema sira, la’ós tanba ema obriga mak saran an hodi mate fizikamente, maibé tan domin ba ema ida ka ba buat ruma. Bainhira ema husu ba kristaun ida atu nega Kristu, ne’e la’ós simplesmente hakribi konviksaun sira kona-ba ninia valór eh ka prinsípiu morál ka teolójiku ida. Rejeisaun Kristu nian koinside ho rejeisaun ba buat hotu ne’ebé halo moris sai posivel. Oinsá bele kontinua moris se ó la iha razaun ida ne’ebé halo atu soi duni atu moris? Iha sentidu ida-ne’e, ohin difisil tebes atu komprende mártir sira-nia lójika basá ita nakfilak tiha Kristu ba konviksaun ida eh valór aas ida, maibé la’ós ona ‘pessoa’ ida. Ema ida ne’ebé hadomi loos la aseita atu hakribi ka rejeita ninia doben. Nia sei aseita konsekuénsia hotu atu la nega eh trai ninia doben. Maibé buat ida-ne’e, ema sira ne’ebé hadomi de’it mak komprende. Ema sira seluk sei konsidera nia nu’udar beik-teen ka bulak ida.

Iha ambiente Roma imperadór Valeriano nia, diákonu «Saun Lourenço hadomi Kristu iha moris, imita Kristu iha mate» (Santu Agostinho). No, dala ida tan, kumpri katak, «ema ne’ebé hewai nia moris iha mundu ne’e sei rai hela nia ba moris rohan laek» (Jo 12, 25).

Mai ita, memória Saun Lourenço nian, sai ba nafatin, sinál ida katak tuir Kristu merese atu ita saran moris rasik, no la admite interpretasaun laloos eh narnaran kona-ba ninia dalan.