Tempu grasa nian atu kontinua ita-nia dalan

 

Dili 5 Agostu 2023

Irmán, leigu no foin-sa’e
doben sira,

tempu ida ne’e nakonu ho eventu Kreda, Instituto no Inspetoria nian.

Semana dahuluk Agostu nian foin-sa’e sira halibur iha Lisboa ba Loron Mundiál Foin-sa’e sira nian. Husi MJS, tanba problema passaporte, nain tolu de’it konsege atu ba, maibé sei iha grupo ne’ebé ba ho Diozese no grupu ne’ebé ba ho Parokia Australia nian. Motu ne’ebé Amo Papa hili, “Maria hamriik no ba lalais”, interpela ita hotu atu tuir Na’in Feto nia ain-fatin ne’ebé “bainhira rona ne’ebé sei sai Maromak nia inan, la para hodi halo selfie ka hatudu ninia an, maibé nia komesa la’o, lalais, atu ba serbí, atu tulun” (Papa Francisco). Amo Papa mós konvida sira atu sai mestre umanidade nian… mestre sira esperansa nian, mestre sira ne’ebé hatene defende ita-nia pianeta nia moris.Ita hein katak enkontru internasionál ida ne’e bele kontribui atu loke foin-sa’e sira nia neon ba sira ne’ebé presiza liu, no fila mai Timor ho hakaran atu serbí sira nia maluk sira.

Loron 5 Agostu irmán na’in rua (sr. Domingas Pereira no sr. Fatima Martins) selebra sira-nia Profisaun perpetua no ita agradese Na’i ba sr. Sebastiana Costa Soares nia fidelidade tinan 25 nian. Eventu sira ne’e halo ita sente katak Maromak hadomi ita-nia Instituto hodi hametin irmán ida-idak nia saran an ba Nia, no suporta sira-nia dedikasaun tomak ba misaun salesiana. Buat ida ne’ebé Amo Cardeal dehan durante omelia bele gia ita hotu, ho vokasaun sa de’it: “Jezús la bolu ita nu’udar atan, tanba atan kumpri de’it ordem ida husi boss ida, maibé nia bolu ita belun, tanba belun halo buat hotu ba domin no amizade, halo tanba sente katak nia hola parte realidade ida”. Ita reza atu ita hotu bele hala’o ita-nia knaar nu’udar Jezús nia belun no hein katak sira-nia ezemplu bele dada foin-sa’e seluk tan atu rona Maromak nia bolun.

Loron 8 Agostu sei fó bensan ba uma foun iha Cailaco hodi realiza mehi ida irmán sira nian ne’ebé hela iha ne’ebá. Atensaun ba labarik feto sira no menina sira ne’ebé hela iha foho no tun ba Cailaco atu estuda, halo irmán sira hanoin ba uma sira ne’ebé bele simu sira. Amo Bispo mós apoia ideia ida ne’e, nu’udar posibilidade atu dezenvolve liu tan kapasidade feto sira nian, no liuliu oferese ba sira ambiente ida nakonu ho valór sarani.

Husi 10 to’o 12 Agostu labarik sira husi OPIAM sei halibur hamutuk iha Laga atu halo esperiénsia voluntariadu nian: furak tebes halo labarik sira sai konxiente liután kona-ba sira-nia responsabilidade hasoru kiak sira, hasoru ambiente iha ne’ebé sira hela ba no favorese atitude disponibilidade no laran luak nian. Ita fiar katak fini jenerosidade nian ne’ebé sei kuda iha momentu ida ne’e, liu tiha tinan ruma, sei buras iha sira-nia hahalok loron-loron nian.

Iha tempu hanesan, iha Baucau, sei hala’o Forum MJS hodi kontinua esperiénsia ne’ebé foin-sa’e balun halo iha Lisboa hodi habelar ba ita-nia animadór no foin-sa’e ne’ebé iha responsabilidade iha ita-nia ambiente sira.
Iha fulan setembru sei selebra mós 25 anos Eskola Maria Auxiliadora nian iha Comoro. Bainhira komunidade no obra edukativa ida to’o tinan 25, hodi hanoin ba istória, bele dehan katak tempu ida ne’e badak de’it; maibé se ita konsidera labarik sira ne’ebé liu husi eskola, profesór sira ne’ebé hanorin, ema hotu ne’ebé tulun atu fó kualidade ba eskola ida ne’e, ita bele dehan katak 25 anos mak rikusoin ida ba sosiedade no ba Kreda. Fó formasaun ho kompeténsia hodi prepara sira ne’ebé bainrua sei sai protagonista iha rai doben ida ne’e, mak ita-nia kontribuisaun ba sosiedade no Kreda.

Ita bele dehan katak ita-nia atividade barak no ita hein katak bele to’o labarik no foin-sa’e barak: ida ne’e ita-nia haka’as an atu bele moris nu’udar fermentu di’ak iha sosiedade iha ne’ebé ita hela ba. Ba imi hotu nia empeñu, ha’u agradese wa’in no ita reza ba malu atu Maromak bele halakan nafatin ahi domin no karidade nian iha ita-nia laran.

Obrigada barak

 

Ir Alma Castagna