Ezersisiu Espiritual Anual grupu III (28 Jullu – 4 Agostu 2023)

“Laos hau mak moris maibe Kristu mak moris iha hau”

Domingas da Silva FMA

Dili, o4 Agosto 2023

Retiru Anual grupu datoluk nian kompostu husi irman nain 30, involve mos irman nain rua husi kongregasaun Preciocissimo Sangue (Laclubar), pregador  ba Retiru mak Padre João Gaspar SDB NO akompaña direta husi irman Alma Castagna Provinsial FMA-TIN.

Ezersisiu Espiritual mak tempu forte grasa nian atu klean ba ita nia moris ho pasiensia , hakas-an ho aten brani no loke an ba Espirito Santu. Momentu atu horik ho Na’i hodi kontempla, harohan ho modu oi-oin atu prepara ita nia klamar no liberta husi buat ne’ebé la los hodi buka no hetan fali Maromak nia hakarak.

Iha loron 8 nia laran, iha ambiente silensiu no klima orasaun nian, hodi husik tiha aktividade sira lor-loron nian sai momentu intensivu hodi konfronta-an ho Maromak nia Liafuan no ho Konstituisaun; Tamba ne’e iha loron ikus retiru nian, irman sira agradese tebes ba Komunidade S. José Noviasiado no Ekipa TOT ba sira nia domin no sakrifisiu hotu.

Iha konferensia sira, pregasaun Padre nian bolu atensaun makas ba irman ida-idak atu avalia, deskobre no hamanas fila-fali hilin prioritariu sira bazeia ba Maromak nia Liafuan no Tradisaun sira moris Espiritual Fundador sira nian. Topiku sira mak tuir mai: Identidade moris Konsagrada, Esperiensia Exodu nian (Hau hein imi iha Galileia), Fila-fali ba abut Karismatiku (Mornese, sai imajen moris Maria Mazzarello iha Tempu ohin nian, fo fuan tuir DB no MM, saran an total ba Institutu); saran-an total ba Jesus (Hela iha Hau Jo 15,1-11), Konversaun S. Paulo no Maria.

Iha diresaunsaun Saleziana nian irman Alma iha tempu “Boa noite” fo hanoin kona ba hilin prioritariu sira Kapitulu Jeral 24 nian: Ekolojia integral, formasaun no Sinodalidade  nu’udar  dalan atu irman FMA ida-idak moris tuir.

Tempu Ezersisiu Espiritual mak momentu importante atu organiza fila-fali ita nia itinerariu santidade nian maibé Mestre los ne’ebé gia no leno ita nia moris espiritual mak Espirito Santo no meio sira ne’ebé favorese atu konsentra-an iha avaliasaun moris espiritual mak: orasaun pessoal, exame konsiensia, kolokiu no Sakramentu Rekonsiliasaun.

Agradese Na’i  ba  Nia fidelidade ne’ebé kontinua suli ba irman ida-idak ne’ebé ohin Renova fali ami nia “Sim” ba Ita Boot.