Santa Marta, Santa Maria no Saun Lázaro

«Tuir dalan, Jezús to’o knua ida. Feto ida naran Marta simu Nia iha nia uma. Marta iha alin-feto ida naran Maria, nebe tur de’it iha Jezús nia ain hodi rona Nia ko’alia. Marta fali, ne’ebé la’o ba la’o mai hodi serbisu barak, hakbesik hodi dehan: “Na’i, Ita la haree katak ha’u nia alin husik ha’u serbisu mesa-mesak? Dehan to’ok ba nia atu tulun ha’u.” Na’i hatán ba nia: “Marta, Marta, ó la’o kole hodi hanoin resin kona-ba buat barak; maibé buat ida de’it mak folin loos. Maria hili buat ne’ebé di’ak liu hotu, ne’ebé ema ida sei la hadau husi nia”».

Marta, Maria no Lázaro mak Jezús nia belun sira. Ne’e mak títulu furak liu atu hanoin sira no sira-nia amizade. Evanjellu dalabArak ko’alia kona-ba belun na’in tolu ne’e no furak atu dehan katak amizade ho Jezús la hatudu de’it bainhira tur iha meza atu selebra ksolok no Jezús uza atu haloos Marta nia kompulsaun atu halo

(«Marta, Marta, ó fadigadu resin ba buat barak, maibé buat ida de’it mak folin loos. Maria hili buat di’ak liu ne’ebé ema ida sei la hadau husi nia»),

maibé manifesta mós iha terus bainhira ho maun Lázaro nia mate halo biin-alin na’in rua ne’e terus kuaze iha dezesperu

(«Na’i, Ita iha-ne’e karik, ha’u-nia maun sei l amate! Maibé oras ne’e mós ha’u hatene katak buat naran de’it ita husu ba Maromak, Nia sei haraik ba Ita»).

Parese katak Evanjellu hakarak dehan mai ita katak amigu sira la’ós de’it amigu bainhira loron nabilan, maibé mós bainhira iha nakukun laran, maibé amigu sira sai nune’e de’it bainhira sira nafatin prezente, iha estasaun hotu ita-nia moris nian. Defaktu amizade mak modu ida Maromak gosta atu manifesta ninia domin mai ita ida ida-idak. Lahó amigu/a sira, moris ne’e susar atu lori ba oin. Se Jezús de’it presiza belun sira, ita fali sé atu hanoin katak ita la presiza belun sira?