22 Jullu

Santa Maria Madalena

APÓSTOLA BA APÓSTOLU SIRA

EVANJELLU Jo 20,1-2.11-18

«Iha loron uluk semana nian, iha dadersaan nakukun, Maria Madalena ba to’o rate. Haree fatuk iha rate nia oin duir tiha ba sorin, nia halai fali hasoru Simão Pedro no eskolante ida seluk ne’ebé Jezús hadomi, hodi dehan ba sira: “Ema lori tiha Na’i husi rate, ami la hatene sira tau loos Nia iha ne’ebé!” Maria fali hamriik besik rate iha liur hodi tanis. Nia sei tanis hela, nia hakru’uk hodi hateke ba rate laran. Nia haree anju na’in rua hatais mutin tur iha fatin ne’ebé sira tau Jezús nia isin, ida iha ulun, ida iha ain. Sira dehan: “Feto, tansá ó tanis?” Nia hatán ba sira: “Basá ema lori tiha ha’u nia Na’i no ha’u la hatene sira tau Nia iha ne’ebé.” Dehan tiha liafuan hirak ne’e, nia fila ba kotuk hodi haree Jezús hamriik iha ne’ebá, maibé nia la hatene katak ne’e Jezús. Jezús dehan ba nia, “Feto, tansá ó tanis? Ó buka se?” Hanoin katak Nia mak to’os na’in, Maria husu fali: “Na’i, ita lori Nia karik, hateten to’ok mai ha’u ita tau Nia iha ne’ebé atu ha’u bele ba lori Nia.” Jezús dehan: “Maria!” Nia fila hodi dehan ba Jezús iha lia ema Ebreu nian: “Rabboni!” katak Mestre. Jezús dehan ba nia: “Keta kona netik Ha’u, tan Ha’u seidauk sa’e ba Aman. Maibé ba hasoru Ha’u nia maun-alin sira hodi dehan ba sira: Ha’u sa’e ba Ha’u-nia Aman no imi-nia Aman; ba Ha’u-nia Maromak no imi-nia Maromak.” Ne’e duni, Maria Madalena ba hateten ba eskolante sira: “Ha’u haree ona Na’i;” no nia hateten ba sira katak Nia dehan buat sira ne’e ba nia».

Reflesaun

Maria Madalena nia festa halo ita tama iha kontaktu ho jéniu femininu ne’ebé bele haree iha Evanjellu sira hotu. Defaktu, feto ida, Maria, mak halo posivel istória salvasaun nian, feto ida mak primeira atu fó sasin kona-ba esperiénsia moris-hi’as nian, Maria Madalena. Se Maria Nazaré nian mak Liurai-Feto Apóstolu sira-nian, Maria Madalena mak apóstola apóstolu sira-nain. Pájina Evanjellu ohin nian fó sasin loloos, tanba inidika mai ita oinsá tenke horik iha oras nakukun nian. Ita hotu iha tentasaun atu dezanima iha sirkunstánsai kontrária sira, liuliu bainhira iha sabór definitivu nian, maibé Madalena hela metin iha rate nia jardín no kontinua atu heinhodi bá kontra esperansa hotu.

«Nia sei tanis hela, nia hakru’uk hodi hateke ba rate laran. Nia haree anju na’in rua hatais mutin tur iha fatin ne’ebé sira tau Jezús nia isin, ida iha ulun, ida iha ain. Sira dehan: “Feto, tansá ó tanis?” Nia hatán ba sira: “Basá ema lori tiha ha’u nia Na’i no ha’u la hatene sira tau Nia iha ne’ebé” ».

Anju sira mós la hamta’uk nia, la halo nia hakfodak, la hasai ninia terus. Feto ne’e mak emblema fortaleza nian.

«Dehan tiha liafuan hirak ne’e, nia fila ba kotuk hodi haree Jezús hamriik iha ne’ebá, maibé nia la hatene katak ne’e Jezús. Jezús dehan ba nia, “Feto, tansá ó tanis? Ó buka se?” Hanoin katak Nia mak to’os na’in, Maria husu fali: “Na’i, ita lori Nia karik, hateten to’ok mai ha’u ita tau Nia iha ne’ebé atu ha’u bele ba lori Nia”».

Feto ida mesak de’it ne’eb’e sente forsa atu lori Na’i nia isin nia todan. Ne’e mak forsa ne’ebé moris iha nia husi domin. Maibé nia presiza dixerne katak la terus no fortaleza  la to’o, presiza husik atu Jezús ko’alia mai ita no revela mai ita buat ne’ebé ita seidauk komprende:

«Jezús dehan: “Maria!” Nia fila hodi dehan ba Jezús iha lia ema Ebreu nian: “Rabboni!” katak Mestre!».

Lisaun boot ida haraik mai ita husi feto ne’e. Oinsá mak Kreda bele moris lahó buat sira-ne’e hotu? Ita sei haree ita-nia an moris iha Páskua hodi la konxiente katak ita kontinua hanoin hanesan ita sei iha loron Sesta Santa.