19 Jullu

Saun Serafim de Sarov

Prothor Moshnim moris iha 1759, iha sidade Kursk, iha Rússia, iha-ne’ebé nia aman-inan sira mak komersiante. Bainhira tinan 10, nia moras todan. Na’i-Feto mosu ba nia iha mehi hodi promete ba nia katak sei kura nia. Defaktu, liutiha loron ruma nia rekupera, depoizde kona Na’-i-Feto nia kuadru durante prosisaun ida.

Sei labarik kedas, nia gosta lee Evanjellu, ba uma-kreda no izola an atu harohan. Nia konfirma ninia vokasaun iha idade 18, bainhira nia tama iha Mosteiru Sarov nian. Iha-ne’ebá, nia halo votu abstinénsia nian, vijília nian no kastidasde nian. Nia kostuma izola an iha ai-laran besik, hodi dedika an ba orasaun no peniténsia sira. Maibé durante tinan tolu nia tenke hela iha kama, depoizde moras todan. Dala ida tan Virjen Maria mosu ba nia, iha momentu ne’e akompaña husi santu balun, no kura nia depoizde kona nia.

Bainhira nia tinan 27, nia simu ábitu monje nia no foti naran Serafim, ne’ebé iha ebraiku signifika lakan. Nia iha don atu haree anju sira, santu sira, Na’i-Feto no Jezús Kristu mós. Iha liturjia, nia haree Jezús rasik tama iha uma-kreda hamutuk ho anju no santu sira hodi fó bensan ba povu ne’ebé iha uma-kreda laran. Serafim hakfodak tebes to’o nia lakon nia lian ba tempu naruk.

Liutiha tinan 7 nia izola an iha ai-laran, iha-ne’ebé nia to’o ba perfeisaun espirituál boot. Maibé nia hetan atake husi naok-teen sira to’o kanek boot. Maski nia iha konstituisaun forte liu, no iha liman iha baliu ida, nia la oferese rezisténsia ida. No tanba nia la iha osan, sira baku nia besik atu mate. Tuirmai, naok-teen sira ne’e ema hatama kadeia no iha julgamentu monje ne’e intersede ba sira. Husi momentu ne’e, Serafim sai kotuk kleuk iha nia moris tomak.

Depoizde períodu ne’e, nia hahú períodu ida peniténsia nian. Nia izola an iha ai-laran ba loron no kalan 1000. Durante loron nia hakneak iha fatuk ho liman foti ba lalehan no iha kalan nia haksumik iha ai-laran. Depoizde aparisaun seluk Na’i-Feto nian, kuaze iha nia moris nia rohan, Serafim simu don transfigurasaun nian husi Espíritu Santu no sai gia espirituál iha mosteiru laran. Ema rihun ba rihun, husi klase sosiál hotu simu rikusoin husi ninia hanoris sira. Ema hotu haree nia oin nabilan, haraik-an no nakonu ho karidade. Nia dehan: “Haksolok la’ós salan. Nia duni kolen, ne’ebé bele nakfilak iha dezánimu; no la iha buat ida piór liu iha moris duké dezánimu”.

Serafim mate hodi husik klaru hanorin ne’ebé nia tuir iha moris tomak: “Presiza atu Espíritu Santu tama iha fuan. Buat di’ak hotu ne’ebé ita halo tanba Kristu hariak mai ita Espíritu Santu nia prezensa, maibé orasaun, ne’ebé ita hotu bele halo, haraik liután Nia”. Iha uma-kreda Mosteiru Sarov, iha sidade Krusk nian, deskansa ninia restu mortál sira.

Kreda Ortodoksa Russa kanoniza nia iha 19 Jullu 1903.