16 Jullu

MEMÓRIA LITÚRJIKA – BEATA VIRJEN MARIA FOHO KARMELU NIAN

LEITURA EVANJELLU NIAN – Mt 12,46-50

«Nia sei ko’alia daudaun ba ema lubun boot wainhira nia inan ho nia maun alin sira to’o mai iha li’ur hodi buka atu ko’alia ho Nia. Ema ida dehan ba Nia: “Ita nia inan no ita nia maun alin sira hakarak ko’alia ho Ita”. Jezús hatán ba ida ne’ebé ko’alia ba Nia: “Sé mak ha’u nia inan, se mak ha’u nia maun-alin sira?” Hafoin Nia lolo liman ba nia eskolante sira hodi dehan: “Sira ne’e mak ha’u nia inan no ha’u nia maun alin sira. Basá ema hotu ne’ebé halo tuir ha’u Aman lalehan nia hakaran, ema ne’e mak ha’u nia maun, ha’u nia feton no ha’u nia inan”».

 

LIGASAUN DOMIN NIAN, LA’ÓS RAAN NIAN

Iha loron memória Na’i-Feto Carmelo nian, liturjia aprezenta pasajen Mateus nian, kona-ba grau “familiaridade” nian ho Jezús. Grau ida ne’ebé la’ós raan nian, maibé imitasaun nian: “Ema hotu ne’ebé halo tuir ha’u Aman lalehan nia hakaran, ema ne’e mak ha’u nia maun, ha’u nia feton no ha’u nia inan”. Ita tama halo parte “ninia família” la’ós liuhusi raan eh relijiozidade komún, maibé liuhusi hilin livre no pesoál ne’ebé tradús iha empeñu atu halo Aman nia hakaran.

 

MARIA, DIXÍPULA DAHULUK

Atu konfirma buat ne’ebé foin dehan, Jezús rasik mak hatán ba feto ida, ne’ebé hahí nia Inan: “Rahun di’ak ba knotak ne’ebé lori ó no susu-matan ne’ebé husi nia ó foti susu-been!” Maibé Jezús hatán: “Rahun-di’ak liufali ema sira ne’ebé rona Maromak Liafuan no moris tuir” (Lc 11,27-28). Maria mak ida-ne’ebé hatene rona, hatene rai, hatene hatudu ba Oan – “Imi halo tuir buat ne’ebé Nia sei dehan ba imi” (Jo 2,5). Maria mak Ida-ne’ebé nunka husik Oan Jezús, maski iha dalan Krús nian, no “hamriik” iha Krús hun. Nia mak dixípula iha ne’ebé nunka abandona Na’i Jezús, ne’ebé nafatin “iha Ninia kotuk”.

 

MARIA, MODELU BA SARANI SIRA (NO KARMELITU/A SIRA)

Buat sira-ne’e hotu lori ita atu banati tuir Virjen Maria. Monje sira iha Foho Carmelo halo ona no halo nafatin, maibé sarani ida-idak simu bolun atu hateke ba Maria atu aprende husi Nia, atu konfia iha ninia intersesaun atu rai didi’ak “pureza fiar nian” kontra ídolu sira baal ohin nian. Ho Na’i-Feto, Virjen silénsiu no orasaun nian, Inan kontemplasaun no moris místika, ita-nia matadalan, ita sei la’o tuir dalan ba foho santu nia tutun katak Kristu.