Divizaun entre sarani sira hakanek Kreda no Kristu, Papa Francisco hateten, iha katekeze iha kuarta ohin. Amu-Papa kontinua ninia katekeze kona-ba Kreda, no ohin kona-ba nesesidade komuñaun entre sarani sira. Francisco ohin halo pauza ba ninia serbisu sinodál sira ohin dadeer atu hasoru sarani no peregrinu sira rihun ba rihun iha Prasa S. Pedro. Amu-Papa komenta kona-ba atitude katóliku barak iha Kreda nia divizaun nia oin: atitude ida rezignasaun no indiferensa nian ne’ebé iha tempu, provoka konflitu, sofrimentu no funu.

Download

“Divizaun entre sarani sira, enkuantu hakanek Kreda, hakanek Kristu, no ita ne’ebé fahe malu halo kanek ida iha Kristu: Kreda, defaktu, mak isin ne’ebé Kristu mak ulun. Ita hatene didi’ak oinsá Jezús hakarak tebes atu ninia dixípulu sira hela metin ba malu iha Ninia domin”.

Amu-Papa fó hanoin katak buat aat buka fahe Kreda no halo Kreda marka ho separasaun grave sira. Razaun ba divizaun iha oioin, hanesan diverjénsia entre prinsípiu dogmátiku no morál sira no konsesaun teolójika no pastorál sira oioin eh lahanesan. “Buat ne’ebé loos mak, iha modu ida eh modu seluk, iha kanek naklees sira ne’e hotu nia kotuk, iha nafatin loko-an no egoízmu, ne’ebé sai kauza ba la iha akordu no halo sai intolerante, la iha kbiit atu rona no aseita ema ne’ebé iha vizaun eh pozisaun ida diferente husi ita-nian”.

Iha situasaun ne’e nia oin, membru sira Kreda nian tenke halo sira nia orasaun sai ida de’it ho Jezús nian ba unidade, Papa Francisco dehan. Sira mós labele taka sira nia an ba diálogu no enkontru hodi loke an ba ema sira ne’ebé la fiar iha Kristu mós, no la hanoin hanesan. Papa Francisco husu sarani sira hanoin kona-ba buat ne’ebé halo sai ida de’it no la’ós iha buat ne’ebé haketak.

“Divizaun halo terus, maibé ita hotu iha buat ruma komún: ita hotu fiar iha Jezús Kristu. Ita hotu iha dalan, mai ita tulun malu. Iha komunidade hotu iha teólogu ne’ebé di’ak, ne’ebé halo sira-nia devér. Maibé ita tenke la’o hamutuk, harohan ba malu no halo obra karidade nian. No halo nune’ e ita harii komuñaun iha dalan”.

Ida-ne’e hanaran ekumenizmu espirituál, Papa Francisco esplika. “Mai ita la’o ba unidade nakonu”.