Dili/Becora – Loron ikus (10-9-2012) prezensa Bispu sira CPLP nian dedika ba ajente pastorál sira,hanesan leigu katekista sira, pároku sira no relijioza, relijiozu sira husi Kongregasaun sira prezente iha Timor-Leste.

Iha inísiu enkontru reprezentante ida husi relijioza sira fó benvindu ba komitiva. Nia salienta katak “Bispu husi nasaun neen ne’e hatudu aspetu pozitivu globalizasaun nian, maibé liuliu katolisidade Kreda nian”.

Hafoin nia mós hatutan katak iha Timor-Leste harii tiha ona “Conferência dos Superiores Maiores” iha loron 13 Novembru 2006 ne’ebé rejistra prezensa kongregasaun/institutu 52: Mane iha kongregasaun 12 ne’ebé husi sira kongregasaun 5 iha de’it irmaun sira no kongregasaun 7 iha amlulik no irmaun; Feto rejistra hamutuk kongregasaun 38. Sei iha tan kongregasaun foun ne’ebé hala’o knaar iha Timor-Leste maski sira-nia naran seidauk tama iha Konferénsia superiór/a maiór sira-nian. Konferénsia ne’e iha komisaun lima ne’ebé servisu ba Formasaun  relijioza, liturjia, edukasaun, sosiál, komunikasaun sosiál.

Hafoin aprezentasaun husi relijioza/u sira, Bispu ida-idak mós aprezenta sira nia an, sira-nia proveniénsia hodi fó mós deskrisaun kona-ba sira-nia misaun, dezafiu sira, sira-nia planu pastorál. Interesante koñese sira-nia realidade basá hariku ita ho sira-nia esperiénsia. País sira husi Áfrika kuaze hotu moris konflitu ne’ebé naruk no oras-ne’e serbisu maka’as ba rekonsiliasaun, justisa no dame. Sira fó sasin kona-ba relijioza/u barak ne’ebé saran an iha misaun to’o fakar raan durante tempu sira funu no konflitu nian. Husi Portugal enfrenta realidade katak amlulik sira menus ba beibeik. Uluk sira iha barak to’o sai misionáriu ba rai seluk. Oras ne’e sira kuran, nune’e dezafiu boot maka atu leigu sira moris sira-nia fiar ho kle’an no sai sasin no haklaken Kristu. Brazíl nia esperiénsia mós furak, bainhira arsebispu Palmas nian, D. Pedro hateten katak iha ninia área sira haree urjénsia 5 atu hametin fiar sarani: 1) Tau Bíblia iha sarani sira nia liman; 2) Inisiasaun iha vida sarani; 3)Estadu permanente asaun nian; 4) Kreda sai komunidade iha komunidade sira leet; 5) Serví moris.

Durante enkontru rezerva mós tempu ba pergunta sira. Pergunta sira ne’ebé mosu liuliu kona-ba dalan ne’ebé Kreda lokál sira halo atu lori rekonsiliasaun no dame iha situasaun konflitu nian; leigu sira-nia papél iha Kreda ne’ebé moris konflitu; oinsá enfrenta seita sira. Resposta sira bele sintetiza iha formasaun kle’an liután kona-ba fiar nune’e bele fó razaun kona-ba fiar rasik; atensaun ba família; sai husi etnia rasik atu ba hasoru no hakohak ema hotu; no realsa papél leigu katekista nian hodi fó formasaun forte no sai modelu fiar nian.

Enkontru taka ho lembransa ne’ebé Konferénsia Superiór/a maiór sira prepara ba Bispu sira, nune’e mós husi “Primeiro-Ministro” Xanana ne’ebé Prezidente CET, D. Basílio mak entrega ba sira. Ikusliu maka almosu hamutuk fraternizasaun nian.