13 Jullu

MARIA ROZA MÍSTIKA NO KREDA NIA INAN

Na’i-Feto “Rosa Mistica”  nia aparisaun ba Pierina Gilli hamosu devosaun forte iha Santuáriu ‘Rosa Mistica’ Montichiari nian (Brescia-Itália).

Tuirmai ninia istória:

Entre aparisaun mariana barak ne’ebé Kreda Katólika rekoñese ka la rekoñese, iha ida ne’ebé akontese iha Montichiari, iha provínsia Brescia nian, iha 1947 no iha 1966 sei falun ho mistériu profundu ida. Ne’e kona-ba aparisaun sira Na’i-Feto Maria Rosa Mística, ne’ebé nia protagonista mak vidente Pierina Gilli. Maski autoridade ekleziástika nunka rekoñese aparisaun sira-ne’e, husi fulan Dezembru 2019 Bispu Brescia nian deklara fatin iha-ne’ebé akontese aparisaun sira ne’ebé sempre sai meta devosaun ida-ne’e nian, nu’udar Santuáriu Diosezanu Rosa Mística – Kreda nia Inan. Maski Kreda la rekoñese validade aparisaun sira-ne’e nian, maibé Kreda rekoñese lokalidade nu’udar fatin kultu marianu ho títulu ba “Maria Rosa Mística”. Ne’e duni, fatin famozu ida ba Maria nia aparisaun sira, maibé mós fatin kultu nian ne’ebé mosu durante tinan sira nia laran haleu figura vidente nian, ninia mensajen sira no haleu Maria Kreda nia Inan.

Pierina Gilli, vidente Montichiari nian

Pierina mak figura vidente nian ida, la’ós hanesan baibain, liuliu tanba, maski iha selebridade boot mai husi aparisaun sira-ne’e, no devotu/a no ema moras sira-nia afluénsia ba nia uma iha Fontanelle di Montichiari, nia nunka renunsia atu hala’o moris simples, iha reparasaun, anónima. Nia nunka kaben, nia lakohi forma nia família rasik, no mate iha otas 79 (12 Janeiru 1991) iha nia uma iha Montichiari, haleu ho belun no sarani sira nia domin no devosaun.

Pierina Gilli mak to’os-atan sira nia oan-feto ida, saude frajil, moris iha 1911 no sei ki’ik kedas hatudu ona vokasaun profunda. Imposivel ba nia tuir vokasaun iha Institutu “Ancelle della Carità” iha Brecia,  tanba moras oioin ne’ebé nia sofre, liuliu meninjite naruk ida, nia serbisu nu’udar pesoál doméstika no hafoin nu’udar enfermeira iha ospitál ida.

Aparisaun sira ne’ebé iha Pierina Gilli nu’udar protagonista fahe ba siklu rua no sira-nia istória bele lee iha Pierina nia Diáriu.

Primeiru siklu aparisaun sira-nian husi 1946-1947

Iha Novembru 1946, enkuantu Pierina sei iha hela períodu rekupera husi atake forte meninjite nian, mosu ba nia Santa Maria Crocifissa di Rosa, fundadora kongregasaun “Ancelle della Carità”, ne’ebé depois Kreda foti ba santa (kanonizasaun) iha 1954. Santa Crocifissa hatudu ba Pierina pontu ida kuartu nian, ne’ebé foti forma iha “… Señora kmook liu transparente iha hatais kór viola ho véu mutin ne’ebé naruk husi ulun to’o ain, nia liman sira nakloke no ha’u haree surik tolu sona nia hirus-matan parte fuan nian.”

Santa Crocifissa mak tulun Pierina atu interpreta vizaun: Señora ne’e mak Na’i-Feto, no surik tolu ne’ebé hakanek nia fuan nia kauza mai husi kategoria tolu klamar konsagrada sira ba Maromak, maibé la soi atu hala’o sira-nia knaar no sira-nia fiar, ho modu partikulár:

• Klamar relijioza ne’ebé la korresponde ba grasa vokasaun nian;
• Klamar relijioza ne’ebé moris iha salan ka pekadu mortál;
• Padre sira ne’ebé la soi ba sira-nia ministériu sagradu.

Atu tulun klamar sira-ne’e, Santa impoin ba Pierina orasaun, sakrifísiu no peniténsia.

Iha okaziaun aparisaun utirmai, iha Jullu 1947, Na’i-Feto mosu hikasfali ba Pierina, maibé oras-ne’e ho hatais mutin tomak. Surik tolu latan iha nia ain no iha nia hirus-matan, surik nia fatin, hetan fali ai-funan roza tolu, ida mutin, ida mean no ida seluk kinur osan-mean. Signifikadu ai-funan sira-ne’e nian mak espíritu orasaun, espíritu sakrifísiu no espíritu peniténsia. Na’i-Feto husu ba Pierina atu konsagra loron 13 fulan-fulan nian nu’udar loron marianu, iha-ne’ebé tenke hahú ho preparasaun ho orasaun espesiál ba loron 12 […] Loron ne’e tenke sai loron reparasaun nian ba ofensa sira husi klamar konsagrada sira kontra Na’i ne’ebé ho sira-nia salan halo surik kroat tolu sona borus ha’u-nia fuan no ha’u-nia Oan Divinu nia fuan.”

Iha konkluzaun siklu dahuluk aparisaun sira-nian, iha Novembru 1947, “Maria Rosa Mística” aviza Pierina katak iha data 8 Dezembru, Festa Imakulada nian, nia sei mosu iha Katedrál Montichiari nian. Depoizde aparisaun dahuluk iha 7 Dezembru, iha-ne’ebé Pierina haktuir katak nia haree mós Bibi-Atan Ki’ik-Oan sira Fátima nian, Francisco no Jacinta, iha 8 Dezembru 1947 Pierina haree Maria nia futar Fuan Sala-Laek iha Katedrál Montichiari nian, ne’ebé ba okaziaun ida-ne’e sarani sira hotu halibur iha orasaun. Na’i-Feto ne’ebé hakarak atu invoka nia ho títulu “Rosa Mística”, husu nia atu institui “Oras Grasa nian”: “Ha’u hakarak atu tinan-tinan, iha loron 8 Dezembru, pratika iha meiudia Oras Grasa Universál; ho prátika ida-ne’e sei hetan grasa barak espirituál no korporál… Fó hatene lalais ba Aman Aas liu Kreda Katólika nian Papa Pio XII katak ha’u hakarak Oras Grasa nian ida-ne’e ema hotu hatene no habelar iha mundu tomak. Ema sira ne’ebé labele bá iha sira-nia uma-kreda rasik, sei hetan grasa hodi harohan iha sira-nia uma.“

Segundu siklu aparisaun sira-nian 1966

Siklu daruak aparisaun sira-nian akontese iha 1966 iha Fontanelle, iha knua sira Montichiari nian. Iha 17 Abríl 1966, Domingu Daruak Páskua nian (Domenica in Albis), Na’i-Feto “Rosa Mística” mosu iha knua, besik bee-matan ida, bee-matan  San Giorgio nian. Iha bee-matan ne’e nia konvida ema moras no sira ne’ebé sofre atu hariis hodi hetan kmaan. Iha 13 Maiu 1966 nia husu atu bee-matan foti naran Bee-matan Grasa nian, no atu halo bañeira ida atu fasilita ablusaun (hamoos an).

Iha 9 Juñu 1966, iha okaziaun Festa Corpus Domini, Pierina haree filafali Maria Rosa Mística iha to’os trigu nian ne’ebé prontu atu ko’a. Na’i-Feto fó orden atu trigu fulin sira-ne’e sai fariña ba Paun Eukarístiku: “Oinsá ha’u hakarak tebes atu trigu musan sira-ne’e sai Paun Eukarístiku… iha Komuñaun reparadora barak”.

Iha 6 Agostu, Festa Transfigurasaun nian, Virjen Maria husu ba Pierina atu selebra loron mundiál Komuñaun Reparadora nian iha 13 Outubru: “Ha’u-nia Oan Divinu Jezús haruka filafali ha’u atu husu uniaun mundiál Komuñaun reparadora nian, no ida-ne’e nia loron mak 13 Outubru […] Sei habelar iha mundu tomak notísia kona-ba insiativa santa ida-ne’e ne’ebé tenke hahú tinan ida-ne’e ba dala uluk no repete nafatin tinan-tinan.”

Santuáriu “Maria Rosa Mística” iha Fontanelle di Montichiari

Iha realidade santuáriu Na’i-Feto Montichiari nian la’ós santuáriu loloos ida, katak ho edifísiu ka uma-kreda ida. Iha mak kapela ki’ik-oan rua iha anfiteatru boot ida nia laran, ne’ebé inklui mós bee-matan ne’ebé “Maria Rosa Mística” deklara nu’udar bee milagroza, iha-ne’ebé ema tama iha laran, razaun tanba sá ema hanaran Lourdes ki’ik-oan ida.

Maria Rosa Mística: signifikadu ai-funan roza tolu

Iha aparisaun 13 Jullu 1947 Pierina haree roza tolu iha Maria nia hatais mutin. Na’i-Feto nia mensajen kona-ba ida-ne’e mak proposta ida “Rosa Mística” nian ba komunidade no grupu relijioza/u sira namkari iha mundu: orasaun, peniténsia, sofrimentu atu halo reparasaun no halakon infidelidade sira ema konsagradu/a no ema sarani hotu nian.

• Roza Mutin: espíritu orasaun nian atu halo reparasaun ba ofensa sira hasoru na’i husi ema konsagrada sira ne’ebé la moris ho koerénsia sira-nia vokasaun;
• Roza Mean: espíritu espiasaun no sakrifísiu nian atu halo reparasaun ba ofensa sira hasoru Na’i husi konsagradu/a sira ne’ebé moris iha pekadu mortál;
• Roza Kinur osan-mean: espíritu imolasaun no peniténsia nian atu halo reparasaun ba ofensa hasoru Na’i husi padre sira ne’ebé trai sira-nia vokasaun no, ho modu partikulár ba sira-nia santifikasaun.

Hodi oferese ai-funan roza tolu ne’e ho domin de’it mak surik tolu sei monu husi Na’i-Feto nia futar Fuan Sala-Laek.

Orasaun ba “Maria Rosa Mística”

Virjen Sala-Laek, Inan Grasa nian, Roza Místika Onra Ita-nia Oan Divinu ian, ami hakneak iha Ita oin atu implora mizerikórdia husi Maromak: la’ós tanba ami-nia méritu sira, maibé tanba Ita-nia Fuan Inan nia di’ak, ami husu Tulun no Grasa, ho fiar katak Ita sei tulun ami.

(Ave Maria)

Jezús nia Inan, Liurai-Feto Santu Rozáriu nian no Kreda Korpu Místiku Kristu nia Inan, ami husu Ita haraik ba mundu ne’ebé hafahe an ho diskórdia don unidade no dame nian no Grasa hotu ne’ebé bele konverte ami no Ita-nia oan barak nia fuan.

(Ave Maria)

Roza Místika, Liurai-Feto Apóstolu sira-nian halo buras vokasaun relijioza no saserdotál barak haleu Altár Eukarístiku ne’ebé ho santidade moris nian no ho laran-manas ba klamar sira bele habelar Ita-nia Jezús nia Reinu iha mundu tomak, hakonu mós ami ho Ita-nia favór lalehan sira

(Ave Maria)

“Rosa Mística”, Kreda nia Inan, harohan mai ami.