Papa Francisco nia lia-menon molok harohan Angelus iha Domingu 2 Jullu 2023.

 

Maun no biin-alin sira, ‘buongiorno!’

Iha Evanjellu ohin nian, Jezús dehan: «Ema ne’ebé simu profeta ida tan nia profeta, nia sei hetan profeta nia kolen» (Mt 10, 41). Dala tolu liafuan “profeta”; maibé sé mak profeta? Iha ema ne’ebé imajina nu’udar buat ruma májiku nian ne’ebé siik futuru, maibé ida-ne’e ideia superstisioza ida, no ema kristaun la fiar iha superstisaun sira, hanesan majia, karta sira, oroskópiu sira ka buat sira hanesan ne’e. Aliás: sarani barak, barak mak ba lee liman laran: halo favór! Ema seluk halo fotografia profeta nian nu’udar personajen ida tempu pasadu nian, ne’ebé eziste molok Kristu atu haklaken sai antese, ninia vinda. Maibé Jezús rasik ohin ko’alia kona-ba nesesidade atu simu profeta sira; ne’e duni, sira sei eziste, maibé sé mak sira? Sé mak profeta?

Profeta, maun no biin-alin sira, mak ita ida-idak: defaktu, ho Batizmu, ita hotu simu don no misaun profesia nian (kf. Catecismo da Igreja Católica, 1268). Profeta mak ida-ne’ebé, hodi virtude Batizmu nian, tulun ema seluk atu lee tempu prezente liuhusi Espíritu Santu nia asaun. Ida-ne’e importante liu: lee tempu prezente la’ós nu’udar krónika, maibé liuhusi asaun Espíritu Santu nian, ne’ebé tulun atu komprende Maromak nia projetu sira no korresponde ba sira. Ho liafuan seluk, profeta mak ema ne’ebé hatudu Jezús ba ema sira seluk, ne’ebé fó sasin, ne’ebé tulun atu moris ohin-loron no harii loron-aban tuir Ninia hanoin sira. Tanba ne’e, ita hotu mak profeta sira, Jezús nia sasin sira «atu kbiit Evanjellu nian nabilan iha moris loroloron, moris familiár no sosiál» (Lumen gentium, 35). Profeta mak sinál moris ida ne’ebé hatudu Maromak ba ema sira seluk, profeta mak lalenok ida Kristu ia roman nian iha maun no biin-alin sira nia dalan. Nune’e, ita bele husu ba an rasik: ha’u, ne’ebé “eleitu profeta” iha Batizmu, ha’u ko’alia no, liuliu, moris nu’udar Jezús nia sasin? Ha’u lori uitoan Ninia naroman ba ema ruma nia moris? Ha’u halo verifika kona-ba ne’e? Ha’u husu an rasik: oinsá ha’u-nia testemuñu, oinsá ha’u-nia profesia?

Na’i iha Evanjellu mós husu ita atu simu profeta sira; tanba ne’e importante ita simu malu nu’udar profeta sira, nu’udar maklorik sira Maromak nia mensajen nian, ida-idak tuir ninia estadu no vokasaun, no halo iha fatin ita horik bá: katak, iha família, iha parókia, iha komunidade relijioza sira, iha ámbitu sira seluk Kreda no sosiedade nian. Espíritu fahe don sira profesia nian iha Maromak nia povu santu: ne’e mak razaun atu rona hotu-hotu. Tanba ne’e mak di’ak atu rona hotu-hotu. Porezemplu, bainhira iha desizaun importante ida atu foti, uluknanai di’ak atu harohan, invoka Espíritu, maibé depois roan no halo diálogu, hodi konfia katak hotu-hotu, sira ne’ebé ki’ik liu mós, iha buat ruma importante atu hateten, don profétiku ida atu partilla. Ho modu ne’e, ita buka lia-loos no habelar klima ida raronak nian ba Maromak no ba maun no biin-alin sira, iha-ne’ebé ema sira la sente katak ema simu de’it sira bainhira sira dehan buat ne’ebé ema seluk gosta, maibé sira sente duni katak ema simu sira no valoriza sir anu’udar don sira, nu’udar sira nia an rasik.

Ita hanoin ba konflitu hora mak bele evita no rezolve ho maneira ne’e, hodi rona ema sira seluk ho dezeju sinseru atu komprende sira! Ikus liu, ita husu ba an rasik: ha’u hatene simu maun no biin-alin sira nu’udar don profétiku sira? Ha’u fiar katak ha’u presiza sira? Ha’u rona sira ho respeitu, ho  vontade atu aprende? Basá ida ida-idak presiza aprende ho ema sira seluk, ita ida-idak presiza aprense ho ema sira seluk.

Atu Maria, Liurai-Feto Profeta sira-nian, tulun ita atu haree no simu buat di’ak ne’ebé Espíritu kuda iha ema sira seluk.