3 Jullu

SAUN TOMÉ  

 

EVANJELLU Jo 20,24-29  

 

«Tomé, sira na’in sanulu resin rua ne’e ida, ne’ebé ema hanaran Kaduak, la hamutuk ho sira wainhira Jezús mosu. Tan ne’e, eskolante sira hateten ba nia: “Ami haree ona Na’i!” Maibé nia hatán ba sira: “Ha’u la hare karik besi-kusan nia kuak iha nia liman, la tau karik ha’u nia liman-fuan iha besi-kusan fatin, no la hatama karik ha’u nia liman iha nia sorin, ha’u sei la fiar.”  

Liu tiha loron ualu, eskolante sira halibur fali iha uma. Tomé mós hamutuk ho sira. Odamatan sei taka hela, Jezús mosu hodi hamriik iha sira leet, dehan: “Dame hela ho imi!” Hafoin Nia hateten ba Tomé: “Tau ó-nia liman-fuan iha ne’e, no haree Ha’u-nia liman; lolo ó-nia liman hodi hatama iha Ha’u-nia sorin. Ó keta laran toos, maibé fiar!” Tomé hatán: “Ha’u-nia Na’in, ha’u-nia Maromak!” Jezús lia tun teni ba nia: “Ó fiar tan ó haree tiha Ha’u? Rahun di’ak ba sira ne’ebé fiar maski la haree”».  

 

REFLESAUN  

 

Ohin, Igreja selebra festa Saun Tomé nian. Evanjelista João, depoizde deskreve Jezús nia aparisaun, iha Domingu Resurreisaun, dehan katak apóstolu Tomé la iha iha-ne’ebá no bainhira Apóstolu sira fó sasin katak sira haree Na’i, Tomé hatán: «Se ha’u la haree besi-kusan nia fatin iha nia liman sira, se ha’u la tau ha’u-nia liman fuan iha besi-kusan nia fatin, se ha’u la hatama ha‘u-nia liman iha nia sorin, ha’u sei la fiar» (Jo 20,25).  

Jezús bá hasoru Tomé. Liutiha loron ualu, Jezús mosu filafali no dehan ba Tomé: «Tau ó-nia liman-fuan iha-ne’e no haree há’u-nia liman sira. Lolo ó-nia liman-fuan hatama iha há’u-nia sorin no keta fiar-laek, maibé fiar!» (Jo 20,27).  

— Oh, Jezús, Ita di’ak tebes! Se Ita haree katak ha’u hadook an husi Ita, mai hasoru ha’u hanesan Ita bá hasoru Tomé.   

Liafuan sira ne’e mak Tomé nia reasaun: «Ha’u Na’i no ha’u-nia Maromak!» (Jo 20,28). Furak tebes Tomé nia liafua sira-ne’e! Nia bolu “Na’i” no “Maromak”. Nia halo “ato de fé” ida iha Jezús nia divindade. Haree Nia moris hi’as, nia la haree de’it ona Jezús-ema, ne’ebé hela ho Apóstolu sira no han ho sira, maibé ninia Na’i no ninia Maromak.  

Jezús haksiak nia no dehan ba nia atu la sai fiar-laek, maibé fiar-na’in no hatutan: «Rahun-di’ak ba sira ne’ebé fiar maski la haree» (Jo 20,28). Ita la haree Kristu hedi iha Krús, la haree mós Kristu moris hi’as, Nia mós la hatudu An mai ita, maibé ita fiar iha Jezús ne’ebé mate no moris hi’as mai ita.  

Ne’e duni ita harohan: «Ha’u Na’i no ha’u Maromak, hadook husi ha’u buat hotu ne’ebé hadook ha’u husi Ita; ha’u Na’i no ha’u Maromak, haraik mai ha’u buat hotu ne’ebé hakbesik ha’u ba Ita; Ha’u Na’i no ha’u Maromak, hasai ha’u husi ha’u an rasik atu ha’u saran an tomak ba Ita» (S. Nicolau de Flüe).