Natividade João Batista nian

«Wainhira tempu to’o ona ba Isabel, nia tur ahi oan mane ida. Rona tiha katak Na’i hatudu laran luak boot ba nia, nia maluk no parente sira haksolok ho nia. Liutiha loron ualu, sira mai atu halo sirkunsizaun kosok oan nian. Sira hakarak hanaran nia Zacarias, hanesan nia aman; maibé nia inan dehan: “Lae, nia naran maka João.” Sira dehan fali ba nia: “Iha imi-nia parente sira leet la iha ema ida ho naran ne’e.” Tan ne’e, ho sinál oioin, sira husu ba nia aman oinsá nia hakarak hanaran nia oan. Nia husu ai-kabelak hodi hakerek: “Nia naran João.” Sira hotu hakfodak. Zacarias nia ibun nakloke kedas, nia nanál mamar fali, nia ko’alia hodi hawelok ba Maromak. Sira hotu ne’ebé hela besik ne’ebá tauk tebtebes. Lia hirak ne’e hotu naklekar iha foho rai Judeia tomak. Sira hotu ne’ebé rona buat hirak ne’e rai hela iha sira nia laran hodi dehan ba sira an rasik: “Labarik ne’e sei sai sá loos?” Basá, tebes duni, Na’i nia liman hela ho nia. Labarik sai boot, nia laran metin liu tan. Nia horik iha rai fuik maran to’o loron ne’ebé nia hatudu an ba Israel».

Ita festeja João Batista nia moris (naximentu) tanba iha nia istória ita hetan naroman esperansa nian ida mai ita ida-idak. Ne’e mak esperansa atu hetan rekoñesimentu ba ita-nia diversidade. Dalabarak ita forsadu atu sai hanesan ho buat ne’ebé ema seluk dehan mai ita ka hein husi ita. João Batista iha sorte atu moris iha família ida ne’ebé defende ho forsa ninia singularidade, nia an nu’udar úniku!

«Liutiha loron ualu, sira mai atu halo sirkunsizaun kosok oan nian. Sira hakarak hanaran nia Zacarias, hanesan nia aman; maibé nia inan dehan: “Lae, nia naran maka João.” Sira dehan fali ba nia: “Iha imi-nia parente sira leet la iha ema ida ho naran ne’e.” Tan ne’e, ho sinál oioin, sira husu ba nia aman oinsá nia hakarak hanaran nia oan. Nia husu ai-kabelak ida hodi hakerek: “Nia naran João.” Sira hotu hakfodak ».

Ema ne’ebé úniku no manifesta nia an nune’e sempre sai ema ajitadór, maski nia lakohi. João parese ajitadór ida iha nia inan Isabel ni aknotak mós. Bainhira Maria tama iha uma no hahú ko’alia, João hahú xuta iha nia inan nia knotak:

«Ita lia to’o tiha iha ha’u tilun – Isabel dehan – kosok-oan book an kedas iha ha’u knotak» (Lc 1,44).

No tuirmai iha nia moris tomak, nia hala’o moris oinseluk liu, úniku, no tanba ne’e mak faxinante. La iha ema ida hanesan nian mak atrai ema sira lahó nesesidade atu halo diskursu boboot ka atraente. Ema ne’ebé sai nia an rasik ho modu kompletu, nia mak ema ne’ebé misteriozamente sai faxunante no atraente. Karik tanba ema sira hanesan ne’e halo ita iha nostaljia kona-ba sai mós hanesan ne’e maibé dalabarak ita la iha korajen. Presiza korajen atu sai an rasik, maibé iha-ne’ebá mak diferensa boot no moris santu loloos ida.

«Sira hotu ne’ebé hela besik ne’ebá tauk tebtebes. Lia hirak ne’e hotu naklekar iha foho rai Judeia tomak. Sira hotu ne’ebé rona buat hirak ne’e rai hela iha sira nia laran hodi dehan ba sira an rasik: “Labarik ne’e sei sai sá loos?”».

Grasa furak ida atu ita husu ohin: milagre atu sai ita-nia an rasik loloos no sente ema simu ita nu’udar ita-nia an rasik.

No nu’udar Papa Francisco dehan: «Ema hira mak selu ho folin karu kompromisu ba lia-loos! Ema justu hira mak prefere ba kontra korrente, no la nega konxiénsia nia lian, lia-loos nia lian!»; ita haka’as an atu sai ema sira ne’ebé hatene ba kontra korrente no la nega lia-loos!