Santu patronu ba Loron Mundiál Juventude (JMJ) Lisboa 2023 nian hamutuk na’in 13, ne’ebé komisaun hili tanba nia importánsia pastorál no espirituál iha preparasaun no realizasaun  JMJ nian.

Virjen Maria

Patrona “aas liu” ba JMJ 2023: Virjen Maria, feto-raan ne’ebé aseita atu sai Maromak Oan halo an ba ema nia Inan. Nia ne’ebé hamriik no bá lalais iha foho, atu hasoru nia prima Isabel, hodi lori Jezús ne’ebé nia ko’us ba nia. Nune’e, nia hanorin ba foin-sa’e tempu hotu no fatin hotu nian atu lori Jezús ba ema seluk ne’ebé hein Nia, ohin hanesan uluk!

ORASAUN

Na’i-Feto Vizitasaun nian,
ne’ebé hit an lalais bá foho
atu hasoru Isabel.
Halo ami mós bá hasoru ema barak ne’ebé hein
atu lori ba sira Evanjellu moris nian
Jezús Kristu, ita Oan no ami Na’i!
Ami sei bá lalais, lahó distrasaun no demora,
maibé ho prontidaun no ksolok.
Ami sei bá ho hakmatek, basá ema ne’ebé lori Kristu lori pás, no halo-di’ak mak moris-di’ak liu.
Na’i-Feto Vizitasaun,ho ita-nia inspirasaun,
Jornada Mundiál Juventude ida-ne’e
sai selebrasaun hamutuk Kristu nian
ne’ebé ami lori, hanesan uluk ita halo.
Halo atu nia sai okaziaun testemuñu no partilla nian, konvivénsia no agradesimentu nian,
ida-idak buka ema seluk ne’ebé nafatin hein nia.
Ho ita ami sei kontinua dalan soru-mutu nian
Atu ami-nia mundu mós hasoru hikas fali
Iha fraternidade, iha justiza no iha pás.
Tulun ami, Na’i-Feto Vizitasaun nian,
atu lori Kristu ba ema hotu, hodi obedese
Aman, iha Espíritu nia domin! Amén.

Tuirmai patronu na’in 13.

1) Saun João Paulo II

Padroeiru eventu Lisboa 2023 ida mak S. João Paulo II, nia mak hahú inisiativa Loron Mundiál Juventude nian, hodi halibur no anima foin-sa’e tokon ba tokon husi kontinente lima. JMJ dahuluk moris depoizde susesu enkontru ne’ebé Wojtyla promove iha 1985 iha Roma, iha Tinan Internasionál Juventude nian. Edisaun dahuluk realiza iha 1986, nafatin iha Roma.
Saun João Paulo II (Karol Wojtyla) moris iha 18 Maiu 1920, iha Wadowice (Polónia). Iha kontestu Funu Mundiál II mak nia vokasaun saserdotál sai tasak no, iha Novembru 1946, nia simu ordenasaun na’ilulik nian. Iha loron 16 Outubru 1978, ho tinan 58, sai eleitu Papa. Nia vizita nasaun 129 durante ninia pontifikadu, no, iha 1984, nia kria JMJ (Jornada Mundial da Juventude). Nia mate iha 2 Abríl 2005 no foti ba santu ka kanonizadu iha 27 Abríl 2014. Nia festa litúrjika selebra iha 22 Outubru.

Bákulu / ai-tonka
Símbolu episkopál ida ne’ebé reprezenta knaar Bibi-Atan Di’ak nian, ne’ebé hein no akompaña ho atensaun lais bibi sira ne’ebé Espíritu Santu entrega ba nia. Papa João Paulo II nia bákulu bele rekoñese didi’ak liuhusi ninia krús markante.

2) Saun Giovanni Bosco

Entre padroeiru no padroeira sira mak santu/a sira ne’ebé dedika an ba servisu juventude nian, ho modu espesiál S. João Bosco, ne’ebé S. João Paulo II deklara nu’udar “Aman no Mestre Juventude nian”. Ba formadór sira nia propoin ninia “Sistema Preventivu”, nafatin atuál: «Hela ho foin-sa’e sira, evita salan ho razaun, relijiaun no amabilidade. Imi sai santu, edukadór santu sira-nian. Ita-nia joven sira sente katak ita hadomi sira».
Saun João Bosco moris iha 16 Agostu 1815, iha Castelnuovo d’Asti, Norte Itália. Iha 1841, simu ordenasaun ba na’ilulik, hodi hala’o ninia ministériu iha sidade Torino. Iha-ne’ebá, liuhusi kontaktu loroloron ho foin-sa’e orfaun no abandonadu sira, mak nia deside funda Oratóriu Saun Francisco de Sales. Nia mate iha 1888, hodi husik obra boot, Família Saleziana, namkari iha kontinente hotu. Kreda foti nia ba santu iha 1 Abríl 1934. Ninia festa litúrjika selebra iha 31 Janeiru.

Livru
Símbolu edukasaun no formasaun foin-sa’e sira-nian, livru reprezenta misaun fundamentál ida ne’ebé marka santu ne’e ninia apostoladu.

3) Saun Vicente

JMJ iha mós protesaun husi Saun Vicente, diákonu no mártir sékulu IV nian, imperadór duni tuir nia no haruka oho. Nu’udar padroeiru dioseze Lisboa nian, nia sei simu no habiit hotu-hotu ho ninia karidade no sasin evanjélika.
Saun Vicente moris iha Huesca, kapitál provínsia Aragão nian, iha família sarani no relevante Impériu Romanu nian. Liuhusi orientasaun Valério nian, bispu sidade Saragoça nian, hetan admisaun ba diákonu atu serví ninia dioseze. Iha inísiu sékulu IV, iha tinan 303 nune’e, iha kontestu persegisaun foun ba sarani sira, ema kaer no dadur Vicente. Sira tortura nia, no nia mate iha prizaun. Saun Vicente mak padroeiru sidade Lisboa nian no nia festa litúrjika monu iha 22 Janeiru.

Roo no manu-metan
Atributu sira-ne’e liga ho istória kona-ba S. Vicente nia manu-metan sira: roo ne’ebé lori ninia restu mortál sira ba Lisboa no manu-metan sira ne’ebé hatudu fatin orijinál hodi hakoi nia no akompaña embarkasaun durante ninia transladasaun.

Santu sira Lisboa nian…

4) Santu António

Jornada ne’ebé hala’o iha Lisboa sei hetan tulun lalehan husi santu ruma Lisboa nian, ne’ebé sai husi sidade ne’e ba haklaken Kristu. Hanesan Santu António, ne’ebé, nu’udar fransiskanu bá, uluknanai iha Maroco no tuirmai bá kedas Itália, hafoin iha Sul Fransa nian, no ikusmai, fila fali ba Itália, hodi konverte ema barak ba Evanjellu iha-ne’ebé nia moris bá no haklaken. Nia mate iha Padova iha 1231 no liutiha tinan ida hetan kedas kanonizasaun, tanba forte liu serteza kona-ba ninia santidade. Papa Leão XIII define nia nu’udar “mundu tomak nia santu”.
Santu António moris iha Lisboa iha tinan 1195, no sei adolexente, nia tama iha konventu “Cónegos Regrantes de Santo Agostinho” sidade ne’e nian. Iha 1220, nia muda ba konventu Frnaciscano sira nian iha Coimbra. Nia partisipa iha Kapítulu Jerál, hala’o iha Assisi, iha 1221, iha-ne’ebé nia koñese Francesco di Assisi. Pregadór boot ne’e mate iha 13 Juñu 1231, loron ne’ebé ita selebra ninia festa litúrjika, hakoi iha Padova. Papa Gregório kanoniza nia molok tinan ida ninia mate.

Líriu
Reprezenta estilu moris Patronu ne’e nian: símbolu pureza no kbiit hasoru tentasaun sira, karakterístika ne’ebé konfigura santu populár portugés ne’e nia moris.

5) Saun Bartolomeo dos Mártires

Saun Bartolomeu dos Mártires moris iha Lisboa, iha 1514, no bainhira nia tinan 14, nia tama iha “Ordem Dominicana”, iha sidade ne’e. Nia hetan ordenasaun ba bispu iha 1559, no, iha tinan hanesan, simu páliu Arsebispu Braga nian. Nia partisipa iha etapa datoluk no ikus Konsíliu Trento nian (1562-1563). Nia mate iha 16 Jullu 1590, hetan rekoñesimentu no aklamasaun husi povu nu’udar «Arsebispu santu, ema kiak no moras sira nia aman». Papa Francisco kanoniza nia iha 2019. Nia festa litúrjika selebra iha 18 Jullu.

Sandália
Arsebispu ne’ebé hakat lurón sira rejiaun Braga nian iha sékulu XVI, ho kuda ka ho ain, tan ne’e sandália mak símbolu ninia dedikasaun ba nia povu no relíkua venerasaun nian.

6) Saun João de Brito

Saun João de Brito moris iha Lisboa, iha 1647, husi família raan-liurai/nobre. Ho tinan 15 nia tama iha “Companhia de Jesus”, simu ordenasaun ba na’ilulik, ho tinan 26. Iha 1673, nia bá rai misaun sira, iha-ne’ebé nia konkretiza objetivu nia moris nian: mate iha Índia hodi haklaken Evanjellu. Iha Janeiru 1693, depoizde enfrenta terus barak, ema kaer nia no oho iha Oriur. Papa Pio XII kanoniza nia, iha 22 Juñu 1947. Nia festa litúrjika mak loron ninia martíriu, 4 Fevereiru.

Ai-tonka no krús
Nu’udar misionáriu boot iha Índias, Patronu Jezúita ne’e lori ho nia ai-tonka ne’ebé marka ritmu ninia misaun nian no krús ne’ebé ho fervór kristianiza povu sira.

7) Beata Joana de Portugal

Beata Joana husi Portugal, Liurai D. Afonso V nia oan-feto, moris iha 6 Fevereiru iha 1452. Bainhira tinan 20, depoizde rejeita liurai-oan sira ne’ebé husu atu kaben ho nia, nia deside sai Jezús Kristu nia “kaben”. Nia tama iha “Convento de Odivelas”, hafoin muda ba “Convento de Jesus”, iha Aveiro. Iha vida konventuál, nia pratika moris iha peniténsia no asisténsia ba ema sira ne’ebé desfavoresidu. Nia mate ho tinan 38, iha 12 Maiu 1490, loron nia festa litúrjika. Iha 1693, Papa Inocéncio XII beatifika nia.

Koroa liurai no koroa ai-tarak nian
Nu’udar oan-feto liurai Afonso V nian, liurai Portugal nian, nia iha koroa nu’udar sinál ninia identidade nu’udar liurai-oan, maibé koroa ai-tarak nian marka nia vida sarani basá husi kedas menina, nia buka pratika nafatin hakribi no kore-an husi korte nia grandeza no mundu nia loko-an, no haburas iha an rasik piedade no vida interiór profunda, iha devosaun sinsera ba Kristu nia paixaun no iha karidade lahó interese ba ema kiak sira.

8) Beatu João Fernandes

Beatu João Fernandes moris iha Lisboa no nia mak misionáriu dahuluk husi misionáriu na’in 73 ne’ebé, iha 1570, akompaña Inácio de Azevedo iha mehi misionáriu evanjelizasaun Brasil nian. Nia Tempu ne’ebá nia iha tinan 19 no novisu jezuita ida. Iha 15 Jullu, la kleur husi loron sira sai bá Brasil (besik Canárias), pirata sira ho roo lima ataka sira-nia embarkasaun no oho sira. Pio IX rekoñese martíriu ida-ne’e no konfirma devosaun ba Inácio de Azevedo no nia kompañeiru na’in 39, iha 11 Maiu 1854, nune’e institui nia festa iha 17 Jullu.

Palma
Símbolu ne’ebé distinge santu mártir mak Palma: jezuita João Fernandes, membru grupu kompañeiru misionáriu Betau Inácio de Azevedo nian, sai mártir ho maun-alin sira kompañia nian tanba evanjelizasaun sarani.

9) Beata Maria Clara do Menino Jesus

Beata Maria Clara do Menino Jesus moris iha 15 Juñu 1843 husi família raan-liurai. Nia sai orfán bainhira tinan 14 no, tanba nia hakarak vida relijioza konsagrada ba Maromak no ba ema kiak nia servisu, nia bá hamutuk ho Irmán “Capuchinhas” iha 1867. Iha 1870, boot sira haruka nia ba novisiadu iha Fransa no, liutiha tinan ida, nia fila ba Portugal, funda kongregasaun relijiioza foun, ne’ebé sei hetan aprovasaun husi Santa Sé, iha 1876. Hasoru opozisaun hotu nia repete nafatin: “Iha-ne’ebé presiza halo di’ak, halo di’ak bá”. Nia mate iha 1 Dezembru 1899, loron nia festa litúrjika, no sai beata iha 21 Maiu 2011.

Paun no lamparina
Nu’udar “Irmán ema kiak sira-nian”, Beata Maria Clara hala’o nia moris hodi leno no hamanas: tanba lamparina mak símbolu ida Irmán “Franciscanas Hospitaleiras da Imaculada Conceição” nian, paun, husi parte seluk mak símbolu doasaun karitativa nian!”.

Aleinde joven Lisboa sira-ne’ebé bá hanesan Maromak nia Inan, iha jeografia mundu nian nune’e mós iha jeografia klamar nian, atu lori Kristu ba ema barak, ita aumenta tan santu patronu husi orijen seluk, maibé husi Reinu hanesan…

10) Beatu Pier Giorgio Frassati

Beato Pier Giorgio moris iha família klase burgeze aas, iha 6 Abríl 1901 iha Torino. Bainhira tinan 12, nia tama koléjiu Jezuita sira-nian, iha-ne’ebé nia hahú partisipa iha Apostoladu Orasaun nian no iha Konferénsia S. Vicente de Paul, hodi serví ho dinamizmu, ksolok no karidade ema sira ne’ebé presiza. Nia kontinua nia estudu sira iha Politécnico Torino nian, foti Enjeñaria Minas nian no iha 1920, nia tama “Partido Popular Italiano”. Nia tama iha “Ordem Terceira de São Domingos”, iha 1922. Iha Juñu 1925, hetan moras poliomielite fulminante, ne’ebé halo nia mate ho tinan 24, iha 4 Jullu, loron ne’ebé selebra nia festa litúrjika. Nia beatifikasaun monu iha loron 20 Maiu 1990. Saun João Paulo II define nia nu’udar “Mane Rahun-Di’ak Ualu nian”.

Rozáriu
Joven santu ne’e hatudu vitalidade típika ninia otas nian, maibé ninia maturidade espirituál ultrapassa nia tinan sira ne’ebé sei nurak: rozáriu no devosaun ba Na’i-Feto habiit ninia an tomak.

11) Beatu Marcel Callo

Beatu Marcel Callo moris iha 6 Dezembru 1921, iha Rennes (Fransa). Ba tinan barak nia mak akólitu ida no eskuteiru. Depoizde estudu sira, nia hahú serbisu nu’udar aprendíz tipógrafu nian no adere ba JOC (Juventude Operária Católica). Iha 1943, tempu Nazi nian, rekruta nia atu halo serbisu obrigatóriu iha Alemaña, iha-ne’ebé nia kontinua atividade sira JOC nian, ho konsekuénsia, Gestapo dadur nia iha Abríl 1944. Nia mate iha kampu konsentrasaun Mauthausen nian iha 19 Marsu 1945. S. João Paulo II beatifika nia iha 4 Outubru 1987. Nia festa litúrjika selebra iha 19 Marsu.

Lensu eskuteiru nian
Membru Movimentu Eskutista, lensu mak símbolu ida ne’ebé joven ne’e uza ho domin no reprezenta ninia fidelidade ba ninia karizma eskuteiru nian.

Iha JMJ iha mós protesaun husi foin-sa’e na’in rua ne’ebé “bá lalais”, maski moras imobiliza sira-nia isin, maibé la’ós sira-nia fuan. Nu’udar Kristu hedi iha krús, ne’ebé husi ne’ebá duni mak Nia bá hasoru Aman no salva ita hotu ho moris ne’ebé Nia saran mai ita…

12) Beata Chiara Badano

Beata Chiara Badano moris iha 29 Outubru 1971, iha Savona (Norte Itália). Nia koñese “Movimento dos Focolares” bainhira nia frekuenta tinan datoluk eskola nian (1980), maibé iha 1988, mosu sinál dahuluk moras nian, ne’ebé halo tiha diagnoze hatudu katak nia iha tumór ruin nian iha estádiu ikus ona. Ho tratamentu sira ne’ebé nia simu, nia hahú moris uniaun metin ho Jezús. Maski moras nia nafatin hatudu ksolok nabilan tanba ne’e mak rekoñese nia nu’udar “Luce” (naroman), naran ne’ebé Chiara Lubich (fundadora Movimentu) fó ba nia. Iha 13 Maiu 1990, nia husu atu hapara tratamentu sira no bele fila ba uma, iha-ne’ebé nia mate, iha loron 7 Outubru 1990. Nia beatifikasaun iha 25 Setembru 2010. Nia festa litúrjika selebra iha 29 Outubru.

Rakete ténis nian no lasu
Chiara la ta’uk hasoru dezafiu sira, hanesan dezafiu desportu ezijente ida-nian hanesan ténis: maibé dezafiu boot liu mak ninia moras kankru, simboliza ho lasu, ne’ebé nia suporta ho domin no ho hamnasa midar ne’ebé hadaet.

13) Beatu Carlo Acutis

Beato Carlo Acutis moris iha 3 Maiu 1991. Husi ki’ik kedas nia hatudu kapasidade maka’as ba informátika, don ne’ebé nia uza ba servisu ema seluk nian no ba divulgasaun konteúdu sira formasaun sarani nian, hanesan espozisaun milagre eukarístiku sira. Defaktu nia iha domin boot ba Eukaristia no ba Na’i-Feto. Iha Setembru 2006, mosu sinál dahuluk moras nian no, depoizde diagnóstiku, moras ne’e mak leusemia fulminante. Ho konfiansa totál, nia entrega nia an ba Maromak tempu uitoan moris nian ne’ebé nia sei iha. Nia mate iha 12 Outubru 2006 no nia beatifikasaun iha 10 Outubru 2020. Nia festa litúrjika selebra iha 12 Outubru.

Tekladu komputadór nian
Matenek informátika nian, Carlo halo nia komputadór sai insrumentu ida servisu nian ba Maromak no internet nu’udar dalan ida atu evanjeliza, hodi habelar nia domin ba Eukaristia.

(Trad. JG)