Kinta – Solenidade Corpus Domini

Evanjellu Jo 6,51-58

«Ha’u mak ai-han moris nian ne’ebé tun mai husi lalehan. Ema ne’ebé han ai-han ne’e, nia moris ba nafatin; no ai-han ne’ebé Ha’u sei fó mak Ha’u nia isin, saran ba mundu nia moris”. Ema Judeu sira haksesuk malu, dehan: “Oinsá mak Nia bele fó nia isin mai ita atu han?” Jezús hatán ba sira: “Tebes, tebes, Ha’u tebes ba imi: imi la han karik Oan Mane nia isin, imi la hemu karik nia ran, imi sei la hetan moris iha imi, Ema ne’ebé han Ha’u nia isin hemu Ha’u nia ran hetan moris rohan laek, no Ha’u sei halo nia moris hi’as iha loron ikus. Basá Ha’u nia isin ai-han duni, Ha’u nia raan tua duni. Ema ne’ebé han Ha’u nia isin no hemu Ha’u nia raan horik iha Ha’u, no Ha’u horik iha nia. Nu’udar Ha’u Aman ne’ebé moris haruka Ha’u mai, no Ha’u moris tanba Aman, nune’e mós ema ne’ebé han Ha’u, sei moris tanba Ha’u. Ne’e mak ai-han ne’ebé tun mai husi lalehan; la’ós hanesan ida ne’ebé imi nia aman sira han, hafoin sira mate hotu; ema ne’ebé han ai-han ne’e sei moris ba nafatin”».

Reflesaun

Ohin, mensajen hotu ne’ebé ita rona no moris tuir ita hetan iha “paun”. Kapítulu daneen Evanjellu João nian, relata milagre multiplikasaun paun sira-nian, no tuir ho Jezús nia diskursu boot, no parte ida ita rona ohin. Ita presiza komprende, la’ós de’it atu moris festa “Corpus” nian no sakramentu Eukaristia, maibé mós atu komprende mensajen sentrál ida ninia Evanjellu nian.

Iha ema lubun-booot sira hamlaha ne’ebé presiza paun. Iha umanidade tomak besik atu mate no mamuk, kuran esperansa, ne’ebé presiza Jezús Kristu. Iha Povu Maromak nian, fiar-na’in no la’o-rai ne’ebé presiza hetan Nia ho modu vizivel atu kontinua moris ho Nia no hetan vida. Iha tipu tolu hamlaha nian no esperiénsia tolu atu habosu, ne’ebé korresponde ba forma tolu paun nian: paun materiál, paun Jezús Kristu nia pesoa no paun eukarístiku.

Ita hatene katak paun importante liu mak Jezús Kristu. Lahó Nia ita labele moris ho maneira hotu. «Lahó Ha’u, imi labele halo buat ida» (Jo 15,5). Maibé Nia rasik hakarak fó han ba ema hamlaha no, aleinde ne’e, nia halo ida-ne’e nu’udar imperativu evanjéliku fundamentál.  Ne’e mak ba Jezús, forma di’ak ida atu revela an no verifika Maromak nia domin ne’ebé salva. Maibé mós Nia hakarak sai asesivel mai ita ho forma paun nian, atu ema sir ane’ebé sei la’o iha istória, hela iha domin no nune’e hetan moris.

Nia hakarak, uluknanai, hanorin ita katak ita tenke buka Nia no moris husi Nia. Nia hakatak hatudu nia domin hodi fó han ema hamlaha, hodi oferese nafatin nia An iha Eukaristia: «Ema ne’ebé han paun ida-ne’e sei moris ba nafatin» (Jo 6,58). Santu Agostinho komenta Evanjellu ne’e ho liafuan barani no figurativa: «Bainhira ema han Kristu, ema han vida (…). Se imi haketak an to’o pontu la han Na’i nia Isin no la hemu Na’i nia Raan, ha’u ta’uk katak imi sei mate».