«ITA-NIA MAROMAK MAK MAROMAK KOMUÑAUN NIAN»

Papa Francisco nia lia-menon iha 4 Juñu 2023-Solenidade Santíssima Trindade nian

Maun no biin-alin sira, ‘buongiorno’!

Ohin, Solenidade Santíssima Trindade nian, Evanjellu foti husi diálogu Jezús nian ho Nicodemos (kf Jo 3,16-18). Nicodemos mak membru ida Sinédriu nian, apaixonadu ho Maromak nia mistériu: nia rekoñese iha Jezús mestre divinu ida no subsubar, iha kalan, nia bá ko’alia ho Jezús. Jezús rona nia, komprende katak nia ema ida ne’ebé buka nune’e uluknanai halo nia hakfodak, hodi hatán katak atu tama iha Maromak nia Reinu presiza moris fali; hafoin revela ba nia mistériu nia núkleu hodi dehan katak Maromak hadomi tebes umanidade to’o haruka nia Oan-Mane iha mundu. Ne’e duni, Jezús, ko’alia mai ita kona-ba Aman no ninia domin boot.

Aman no Oan. Ne’e mak imajen familiár ida ne’ebé, se ita hanoin, estraga ita-nia imajinasaun kona-ba Maromak. Liafuan “Maromak” rasik, defaktu, sujere mai ita realidade singulár ida, boot, no dook, enkuantu rona ko’alia kona-ba Aman ida no Oan ida lori ita ba uma. Loos, ita bele hanoin nune’e kona-ba Maromak, liuhusi imajen família ida-nian halibur iha meza, iha-ne’ebé partilla moris. Aleinde ne’e, meza ne’e, ne’ebé altár mós, mak símbolu ne’ebé íkone balun uza atu reprezenta Trindade. Ne’e mak imajen ida ne’ebé ko’alia kona-ba Maromak komuñaun. Aman, Oan no Espíritu Santu: komuñaun.

Maibé la’ós de’it imajen, ne’e mak realidade! Realidade tanba Espíritu Santu, Espíritu ne’ebé Aman liuhusi Jezús hasuli iha ita-nia fuan sira (kf Gal 4,6), halo ita koko, saboreia Maromak nia prezensa: prezensa besik nafatin, kompaixaun no ternura nian. Espíritu Santu halo mai ita hanesan Jezús halo ba Nicodemos: introdús ita iha mistériu moris foun nian – moris iha fiar, iha moris sarani –, revela mai ita Aman nia fuan no halo ita partisipa iha Maromak rasik nia moris.

Konvite ne’ebé diriji mai ita, ita bele dehan, mak ida atu tur iha meza ho Maromak atu partilla ninia domin. Ida-ne’e mak imajen. Ida-ne’e mak buat ne’ebé akontese iha Missa ida-idak, iha altár meza eukarístika nian, iha-ne’ebé Jezús oferese an ba Aman no oferese an mai ita. Nune’e duni, maun no biin-alin sira, ita-nia Maromak mak “komuñaun domin nian”: nune’e mak Jezús revela mai ita. No imi hatene oinsá ita bele halo atu hanoin hetan? Ho jestu simples liu, ne’ebé ita aprende bainhira sei labarik: sinál krús nian. Hodi trasa krús iha ita-nia isin ita hanoin hikas oinsá Maromak hadomi ita, to’o saran nia moris mai ita; no ita repete mai an rasik katak nia domin hakohak ita kompletamente, husi leten mai kraik, husi karuk ba loos, nu’udar hakohak ida ne’ebé nunka abandona ita. No tempu hanesan ita haka’as an atu fó sasin Maromak-domin, hodi kria komuñaun iha nia naran. Karik oras-ne’e, ita ida-idak, no hotu-hotu hamutuk, ita halo sinál krús nian [halo sinál krús].

Ne’e duni ohin ita bele husu ba an rasik: ita fó sasin kona-ba Maromak-domin? Ka Maromak-domin sai tiha konseitu ida, buat ruma ita rona ona, ne’ebé la book ita no la provoka ona moris? Se Maromak mak domin, ita-nia komunidade sira fó sasin kona-ba ne’e? Sira hatene hadomi? Ita-nia komunidade sira hatene hadomi? No ita-nia família, ita hatene hadomi iha família? Ita husik nafatin odamatan nakloke, ita hatene simu ema hotu, ha’u subliña hotu-hotu, nu’udar maun no biin-alin sira? Ita oferese ba ema hotu ai-han Maromak nia perdaun nian no ksolok evanjéliku? Ita respira ár uma nian ka ita hanesan ho eskritóriu ka fatin privadu ida iha-ne’ebé ema ne’ebé ita hili de’it mak tama? Maromak mak domin, Maromak mak Aman, Oan no Espíritu Santu no haraik moris mai ita, tanba ne’e mak ita halo sinál krús nian.

No Maria tulun ita atu moris Kreda nu’udar uma ida iha-ne’ebé ema hadomi ho modu familiár, ba Aman Maromak no Oan no Espíritu Santu nia glória.