5 Juñu

Saun Bonifácio, apóstolu Alemaña nian

Orijen

Nia naran batizmu nian mak Winfrid. Oan husi família nobre ingleza, moris iha 673, iha rejiaun Devonshire, sudoeste Inglaterra nian. Tuir kostume tempu ne’ebá nian, sei ki’ik hela, nia aman-inan lori nia ba mosteiru beneditinu ida atu nia simu edukasaun di’ak liu, akadémika no relijioza. Iha mosteiru, Winfrid adapta an di’ak no bainhira nia to’o juventude nia komprende katak nia iha vokasaun ba vida relijioza no iha dezeju boot atu lori Jezús Kristu nia naran ba fatin sira dook liu.

Vida relijioza

Bainhira nnia kompleta tinan 19, Winfrid halo ninia votu relijiozu sira iha abadia beneditina Exeter nian, iha Inglaterra mós. Iha-ne’ebá, nia hahú nia vida profesór nian. Nia hanorin regra monástika sira iha Exeter no mós iha abadia Nurslig nian. Tempu nu’udar profesór tulun nia atu deskobre ninia vokasaun misionária.

Primeira tentativa misionária frustrada

Winfrid sente iha nia fuan dezeju atu haklaken Evanjellu ba povu jermániku sira ne’ebé moris iha mota Reno nia sorin bá. Tanba ne’e, nia halo tentativa dahuluk atu to’o iha Alemaña atu lori fiar sarani. Maibé, tanba diverjénsia polítika sira entre aristokrata ida naran Radbod, ema jentiu, no liurai Carlos Martel, kristaun, tentativa ne’e la hetan susesu no nia la konsegre realiza ninia mehi.

Naroman ida leno nia dalan

Iha tinan Don Winfrid halo peregrinasaun ida ba Roma. Nia konsege audiénsia ida ho Papa Gregório II no Papa deside apoia ninia intensaun evanjelizasaun nian iha Alemaña. Iha okaziaun, Amu-Papa orienta Don Winfrid atu asume naran Bonifácio nian, nu’udar omenajen ba santu no márir romanu famozu ida. Winfrid obedese no nia bá iha ninia misaun boot atu evanjeliza povu jermániku sira, ne’ebé seidauk koñese Jezús Kristu.

Inísiu misaun iha Alemaña

Iha territóriu alemaun, Don Bonifácio to’o uluknanai iha Turíngia. Depois, nia bá Frísia. Iha lokál rua ne’e, ninia pregasaun sira manán fuan sira ne’ebé konverte ba fiar sarani. Depoizde ne’e, nia bá iha kuaze Alemaña tomak hodi lori Liafuan Di’ak Jezús Kristu nian no manán alemaun sira-nia fuan. Nia misaun fó fuan no komunidade sarani furak sira estabelese iha territóriu alemaun.

Bispu Mains nian

Saun Bonifácio fila bá Roma iha peregrinasaun daruak. Papa iha tempu ne’ebá troka ona. Maibé Amu-Papa ne’e nakonu ho entuziazmu ho serbisu misionáriu iha Alemaña no nomeia Saun Bonifácio nu’udar bispu Mains nian. Husi momentu ne’e, Saun Bonifácio nia apostoladu manán kbiit foun. Nia ordena padre no diákonu lubuk ida, funda mosteiru lubuk ida mane no feto sira-nian, tuir ninia orijen beneditina. Entre mosteiru sira-ne’e, destaka mosteiru Fulda nian, ne’ebé sai sentru boot kultura relijioza iha Alemaña. Nia lidera mós konstrusaun uma-kreda no katedrál sira-nian iha país tomak. Atu halo ne’e, nia konsege tulun husi númeru boot monje beneditinu sira-nian mai husi Inglaterra. Sira la tulun de’it iha konstrusaun, maibé mós iha evanjelizasaun povu nian. Maibé, ninia serbisu prinsipál mak konstrusaun templu invizivel, katak Kristu nia Kreda. Tanba ne’e, nia halo viajen kolen-laek, partisipa iha konsíliu oioin no tulun iha promulgasaun lei sira-nian ne’ebé halo Alemaña sai país di’ak liu.

Evanjellu bá dook liután

Tanba susesu boot iha ninia asaun misionária, Saun Bonifácio haluan nia misaun to’o Fransa. Depois, iha 754, nia bá Olanda. Iha-ne’ebá mós nia ezerse apostoladu ho fuan, hodi lori ema tokon ba tokon to’o iha koñesimentu Jezús Kristu nian.

Mate

Saun Bonifácio iha hela Olanda, iha loron 5 Juñu, loron Pentekostes nian, nia bá selebra krizma ba grupu boot katekúmenu sira-nian iha sidade Dokkun. Bainhira hahú Santa Missa, ema jentiu grupu ida husi Frísia invade uma-kreda no oho ema hotu ne’ebé iha laran. Sira oho Saun Bonifácio ne’ebé proteje nia ulun ho livru no sona borus lvru to’o fera nia ulun. Nia mate hodi saran nia klamar ba Maromak. Tanba ne’e mak Saun Bonifácio mártir ida, basá nia fó nia moris tanba nia fiar iha Kristu. Fini ne’ebé nia kari manán abut kle’an no metin ba beibeik iha povu jermániku sira-nia fuan. Ninia restu mortál sira lori ba uma-kreda mosteiru furak Fulda nian.

Ninia memória litúrjika monu iha loron 5 Juñu, data ninia martíriu nian.

Orasaun ba Saun Bonifácio

“Oh Maromak, Ita ne’eb’e haraik ba Saun Bonifácio espíritu misionáriu ne’ebé halo nia husik nia rain atu evanjeliza pohu jermániku sira, hodi kumpri Ita-nia vontade, haraik mós mai ami grasa laran-manas misionáriu foun no bensan atu realiza Ita-nia planu domin nian iha ami-nia moris sira”.

Saun Bonifácio, harohan mai ami!