Dili –  Projetu ida mak asaun intensionál atu bele to’o objetivu ida iha kontestu ida, ba tempu ida, hodi uza rekursu disponivel sira ne’ebé bele prodús rezultadu ida ne’ebé ema hakarak. Iha projetu formativu ida, ajente sira buka kria perkursu atu elabora objetivu sira, konteúdu, metodolojia, prosedimentu, instrumentu no forma verifika nian ba atividade formativa.

 

Formasaun maka prosesu transformasaun ida halo iha moris tomak; ne’e mak ideia-xave formasaun nu’udar itineráriu ida moris nian, dalan progresivu no dinámiku iha moris tomak atu to’o ba unidade vokasionál, maturasaun integrál ema nian no konfigurasaun ba Kristu ho modu progresivu.   Projetu formativu FMA nian fahe tuir idade ida-idak: idade adulta dahuluk; idade adulta média;  terseira idade. Projetu formativu ida baibain evolve iha faze haat: análize nesesidade sira-nian, define objetivu sira, hili metodolojia no konteúdu, halo verfikasaun no avaliasaun.

Prosesu análize nian hahú tiha ona tinan kotuk bainhira Ir Maria Fisichella bá komunidade sira atu introdús pasu sira elaborasaun nian ba itineráriu formativu. Hafoin halo análize situasaun kontestu nian nune’e mós nesesidade sujetivu sira indivíduu nian, pasu tuirmai maka define finalidade no objetivu sira.

Grupu sira idade adulta média, hafoin enkontru  tolu, ohin konsege define sira-nia itineráriu formasaun nian. Aspetu  ka dimensaun sira atensaun nian maka dimensaun maturasaun nian, dimensaun relasionál, dimensaun edukasaun nian, dimensaun fiar nian no dimensaun karizmátika.  Ba aspetu ida-idak sira deskreve karakterístika sira, define finalidade no objetivu sira, haree kondisaun no meiu sá de’it tulun atu to’o ba objetivu sira no identifika indikadór sira ne’ebé konfirma rezultadu pozitivu tuir finalidade no objetivu sira ne’ebé propoin tiha ona.

Ho matadalan ida-ne’e FMA sira bele sai konxiente liután kona-ba sira nia dalan formasaun nu’udar prosesu progresivu no haka’as an atu asimila espiritualidade Institutu nian atu to’o ba konfigurasaun ho Kristu.