Durante Novena Pentekostes 2023 nian ita husu frutu ka fuan sira Espíritu Santu, nian hanesan S. Paulo hakerek iha ninia Surat ba Gálata sira 5,22-23, bazeia ba Maromak nia Liafuan loron nian.

 

1
FRUTU ESPÍRITU SANTU NIAN: KSOLOK

«Ha’u sei haree fali imi, no imi-nia fuan sei haksolok, no ema ida la bele hasai husi imi ksolok ne’ebé imi hetan» (Jo 16,22).

ORASAUN

Mai Espíritu
Ksolok loos nian
ne’ebé moris husi dame!
Mai oh Espíritu
Ksolok interiór nian
e’ebé moris husi domin!
Mai oh Espíritu
Ksolok nakonu nian
ne’ebé moris husi komuñaun!
Mai oh Espíritu
Ksolok santa nian
ne’ebé moris husi orasaun!
Mai oh Espíritu
Ksolok rahun-di’ak nian
ne’ebé moris husi provasaun sira!
Mai oh Espíritu
Ksolok rohan-laek nian
ne’ebé moris husi enkontru!

2

FRUTU ESPÍRITU SANTU NIAN: DOMIN

«Aman rasik hadomi imi, tanba imi hadomi Ha’u hodi fiar Ha’u» (Jo 16,27).

ORASAUN

Oh Espíritu Domin nian,
Ita ne’ebé mai
husi Aman no Oan,
mai, mai, mai…
no hakonu ha’u ho Domin!
Realiza ita-nia entrada midar
iha ha’u fuan,
iha neon,
hakonu ha’u-nia sentidu sira!
Haraik atu ha’u sai domin!
Domin ne’ebé
sai karidade
no hatene sai pasiénsia,
hatene sai mamar;
karidade ne’ebé
la laran moras,
la loko an,
la foti an,
la kuran respeitu,
la buka interese rasik,
la hirus,
la sura
buat aat ne’ebé ema halo ba an rasik,
maibé haksolok ho lia-loos;
tolera buat hotu,
fiar nafatin,
hein nafatin,
tahan buat hotu,
nunka lakon ne’e hotu!
“Oh Espíritu Domin nian
Konsoladór Divinu
haraik grasa
ne’ebé ami hein!”

3
FRUTU ESPÍRITU SANTU NIAN: FIDELIDADE

«Ha’u sei hela nafatin hamutuk ho imi,
to’o mundu nia rohan» (Mt 28,20b).

ORASAUN

Oh Espíritu Santu!
Oh Kbiit Domin nian
Ne’ebé mai husi Leten!,
Mai no purifika ami!
Mai no perdua ami
infidelidade ki’ik-oan hotu!
Mai no tau iha ami
Jezús Kristu nia fidelidade:
Ida tomak ho Aman,
Fiél tomak ba Aman,
Diriji an tomak ba Aman,
Ba Aman nia glória tomak!

Oh Espíritu Santu
Estimula ami-nia fidelidade,
tau matan ba nia!
Orienta nia!
Santifika nia!
Tau iha ami Ita-nia entuziazmu!
Hanorin ami Maromak Oan nia fidelidade,
ba Aman nia Glória.
Amén.

4
FRUTU ESPÍRITU SANTU NIAN: DAME

«Ha’u fó hatene buat ne’e ba imi atu imi hetan dame. Iha mundu imi sei hetan susar barak; maibé imi laran metin bá, basá Ha’u manan tiha mundu».
(Jo 16,33)

ORASAUN

Oh Espíritu Santu tulun ami
atu simu
Jezús nia Dame!
Haraik atua mi sai
ema ne’ebé halo Dame
liuhusi jestu sira karidade nian
halo loron ba loron.

Oh Espíritu Santu
Ita rasik halo
buat ne’ebé Ita husu mai ami!
Dudu ami iha jestu simples sira
simu nian,
no hamnasa midar transparente!
Dudu ami iha jestu sira
delikadeza únika,
perdaun sinseru
no hateken sira
ne’ebé hasai morin dame nian!

Oh Espíritu Santu
halo atu Kristu nia Dame
hela iha ami!
Fanun iha ami
hamrook ba Dame loos!
Dudu ami-nia ain-hakat sira
iha dalan sira Eukaristia nian
no Sakramentu Perdaun nian
iha-ne’ebé nakonu ho Dame
husi Na’i Moris-Hi’as!

Oh Espíritu Santu
halo atu Na’i nia Dame
ukun ami no
ukun iha fatin hotu!
Nia Dame
horik nafatin ho ami!
Tulun ami atu simu
no moris Dame ida-ne’e
ne’ebé ami simu
bainhira ami simu
Maromak nia Bibi-Oan
ne’ebé haraik Dame,
iha Santa Missa ida-idak!
Amén.

5
FRUTU ESPÍRITU SANTU NIAN: BENEVOLÉNSIA

«Ha’u harohan ba sira; Ha’u la harohan ba mundu, maibé ba sira ne’ebé Ita haraik mai Ha’u, basá sira Ita nian…Aman Santu, tau matan ba sira iha ita naran».

(Jo 17,10.11)

ORASAUN

Oh Espíritu Santu mai
tau ami-nia fuan
iha Aman Maromak nia benevolénsia
ne’ebé hamutuk ho Oan
haksumik an iha Ita Te!

Oh Espíritu Santu
ne’ebé konsagra,
santifika, liberta,
mai iha ami no ami sei moris
iha Aman nia benevolénsia!
Ida ne’e de’it natón ona.

Oh Espíritu Santu
tulun ani atu fó
ho laran-luak
benevolénsia naresin ne’ebé ami simu,
basá Jezús rasik dehan
“Imi simu degrasa
imi mós sei fó degrasa”.

Oh Espíritu Santu
Domin Rohan-laek
Mai, halakan ami-nia fuan sira
Ho ita domin!
Amén!

6
FRUTU ESPÍRITU SANTU NIAN: LARAN-DI’AK
“Ne’e mak milagre uluk Jezús halo iha Kaná Galileia nian” (Jo 2,11).

ORASAUN

Oh Espíritu Santu
hatudu laran luak mai ami,
mai husi sikun haat
no tau iha ami
Maromak nia laran-di’ak.

Oh Espíritu Santu
halo atu Na’i-Feto nia ezemplu
iha nafatin ami oin
ninia laran-di’ak Inan nian,
anima nafatin ami!
Ninia intersesaun
lori mai ami frutu laran-di’ak nian
frutu santu komuñaun nian ho Maromak
ne’ebé suli tun
iha komuñaun ba maluk sira!

Oh Espíritu santu
purifika no haraik mai ami
atu hatene rona
Jezús nia Liafuan,
hodi “halo tuir buat hotu Nia haruka”
nune’e ami bele halo
di’ak hotu ami bele
ba maun-alin sira!
Haraik mai ami fuan atentu,
hamrook no haka’as an
atu fó ba ema hotu
di’ak hotu ami iha.

Oh Espíritu Santu
tulun ami kontmpla Maromak nia laran-di’ak
no haklaken nia
hodi halo di’ak hotu!
Atu ami hatene
Sai prezensa ba ema hotu
ne’ebé presiza ami-nia tulun
no hatene hananu Magnificat
ba Aman Maromak
ne’ebé halo nafatin
kmanek oioin iha ami.
Amén!

7
FRUTU ESPÍRITU SANTU NIAN: PASIÉNSIA

“…Na’i hamriik iha nia oin hodi dehan: «Aten-barani bá! Nu’udar ó fó sasin mai Ha’u iha Jerusalém, nune’e mós ó sei fó sasin mai Ha’u iha Roma»”.
(Apóst 23,11)

ORASAUN

Oh Espíritu Santu
tulun ami atu kuda aten-barani
nune’e ami bele fó fuan uain,
pasiénsia furak nian
ho ema ne’ebé persege ami,
ho ami an rasik,
no mós ho Maromak
hodi halai sees husi tentasaun hotu
laran hirus no negatividade
no hanoin nafatin katak
“buat hotu lori ba di’ak
ba sira ne’ebé hadomi Maromak!” (Rm 8,28)

Oh Espíritu Santu
Ami husu husi Ita,
no ami simu husi Ita
fuan pasiénsia nian,
ho hakaran boot no iha haraik-an
atu Ita bele fó mai ami
pasiénsia eróika
iha ami-nia “hadomi”
iha mai-nia “serví”,
iha ami-nia “moris”
tuir Jezús nia ezemplu
ne’ebé harohan ba Aman hodi dehan:
« Aman Santu, mundu ne’e la hatene Ita; maibé sira ne’e hatene katak Ita mak haruka Ha’u mai. Ha’u fó hatene tiha ba sira Ita nia naran, no Ha’u sei fó hatene liután, atu domin ne’ebé Ita hadomi Ha’u bele hela iha sira, no Ha’u hela iha sira» (Jo 17,25-26).
Amén.

8
FRUTU ESPÍRITU SANTU NIAN: LARAN-MAUS / MANSIDAUN

«Tebes, tebes, Ha’u dehan ba ó: wainhira ó sei klosan ó rasik mak hatais an, hodi la’o ba fatin ne’ebé ó hakarak; maibé katuas tiha, ó sei lolo liman atu ema seluk fó hatais ó, hodi lori ó ba fatin ne’ebé ó lakohi».
(Jo 21,17).

ORASAUN

Oh Espíritu Santu
mai ho kbiit
no hakonu ami
ho ternura,
ho laran-di’ak,
ho haraik-an,
ho laran-maus,
ho fuan boot.
(kf Col 3,12).

Oh Paráklitu Divinu,
mai no hanorin ami hotu,
mai no fó hanoin ba ema hotu
katak laran-maus halo husi:
mizerikórdia,
toleránsia,
haraik-an,
mansidaun,
dosilidade,
delikadeza,
kortezia,
kordialidade,
amabilidade,
laran-di’ak,
pasiénsia,
respeitu,
laran-sadia,
disponibilidade ba perdaun.
Halo ami neon sai konvensidu
katak laran-maus
la’ós sinál frakeza nian
maibé forsa morál nian;
ne’ebé la husik atu buat aat manán,
maibé fortaleza ne’ebé,
«manán aat ho di’ak»
(kf Rm 12,21).

Oh Espíritu Santu,
Oh Mansidaun Divina!
Mai iha ami
la’o ho ami,
no hela ho ami ba nafatin!
Amén.

9
FRUTU ESPÍRITU SANTU NIAN: UKUN-AN

«Ha’u hakarak karik katak nia hela to’o Ha’u mai fali, ne’e iha saida ba ó? Ó tuir deit Ha’u!» (Jo 21,22)

ORASAUN

Mai oh Espíritu
iha ha’u-nia falta hotu
autokontrolu nian
no tulun ha’u ho Ita’nia kbiit!

Mai oh Espíritu
iha ha’u-nia baruk hotu
no huu maka’as
ho Ita-nia entuziazmu,
huu ho Ita-nia perfeisaun,
no santifika ha’u!

Mai oh Espíritu
iha ha’u-nia nakukun sira
no rei ha’u ho Ita-nia Naroman:
halo ha’u sai espirituál
no habelar grasa ba ema seluk.
Amén.