“Filha de Maria Auxiliadora” (FMA) misionária na’in tolu: Ir Paola Battagliola, Ir Maria Fe Silva no Ir Maria Letizia, simu kondekorasaun “Ordem de Timor-Leste” grau “Medalha”

JG

Dili – Iha loron 19 Maiu 2023,  Prezidente Repúblika Demokrátika Timor-Leste, Dr José Ramos-Horta – iha ámbitu selebrasaun Loron Independénsia nian – agrasia ema estranjeiru no timorense hamutuk na’in 108 ho Kondekorasaun “Ordem de Timor-Leste”, no entre sira-ne’e iha Irmán FMA na’in tolu: Ir Paola Battagliola, Ir Maria Fe Silva no Ir Maria Letizia.

Tuir Dekretu Lei promulga iha 24 Abríl 2009, #1 Ordem de Timor-Leste destina atu rekoñese no agradese ba nasionál sira no estranjeiru sira, ne’ebé ho sira-nia komportamentu ka hahalok ne’ebé sira pratika, iha kontributu signifikativu ba país, timorense ka Umanidade nia benefísiu. Ne’e duni, iha razaun tomak atu agradese misionária FMA na’in tolu, Ir Paola Battagliola no Ir Maria Fe Silva ne’ebé serbisu iha Timor-Leste husi tinan 1988 no Ir Maria Letizia ne’ebé serbisu iha Timor-Leste husi 1989 ba labarik no foin-sa’e barak nia edukasaun, ho abnegasaun no sakrifísiu exesionál (#2,c).

Iha momentu atribuisaun kondekorasaun nian, ohin 19 Maiu 2023, marka prezensa fízika mak Ir Maria Letizia, enkuantu Ir Paola Battagliola, ne’ebé oras ne’e hala’o knaar nu’udar Konselleira Jerál iha Roma, labele prezente, basá oras-ne’e mós nia iha hela Amazónia (Brasil) iha vizita kanónika. Ir Maria Fe Silva mós labele prezente, aleinde oras-ne’e hala’o knaar iha Sumba, nia mós porenkuantu sei iha hela Itália. Sira-nia “Medalha” simu husi reprezentante sira, Ir Maria Angelita Gomes no Ir Julia Marçal no Ir Evangelina Xavier da Costa.

Ir Paola Battagliola iha nia lia tatoli badak hateten katak uluknanai “Obrigada ba Maromak nia grasa no Institutu nia laran-metin  no Timor-oan nia tulun! Medalla ida-ne’e ba FMA hotu, tan dedikasaun hamutuk ba povo nia di’ak  liuliu ba labarik, adolexente no joven sira” (19 Maiu 2023 husi WA).

Dekretu Lei ne’e mós define grau oioin “Ordem de Timor-Leste” nian hanesan “Grande-colar; Colar; Medalha; Insígnia”. FMA na’in tolu ne’e simu kondekorasaun grau “Medalha” hamutuk ho ema na’in 39 seluk, inklui relijioza husi kongregasaun Canossiana na’in rua Ir Rosa Sarmento no Ir Maria Chioda; Ir Idalia Taveraz; padre jezuita Pe Dibyawiyata Leonardus; amlulik diosezanu na’in tolu, padre Áureo Gusmão, pe. Agostinho da Costa no pe.Domingos Alves da Costa.