Papa Francisco nia lia-menon iha Domingu VI Páskua nian

 

Maun no biin-alin sira, ‘buongiorno’!

 

Evanjellu ohin nian, domingu daneen Páskua nian, ko’alia mai ita kona-ba Espíritu Santu, ne’ebé Jezús hanaran Paráklitu (kf Jo 14,15-17). Paráklitu mak liafuan ida mai husi lia-gregu, ne’ebé signifika tempu hanesan, konsoladór no advogadu. Espíritu Santu, la husik ita mesak, besik ita, hanesan advogadu ida ne’ebé asiste akuzadu hodi hela iha ninia sorin. No sujere mai ita oinsá defende  an iha ida-ne’ebé akuza ita nia oin. Ita hanoin bá katak akuzadór boot mak nafatin diabu, ne’ebé tau iha ita-nia laran salan sira, hakarak salan nian, hahalok aat nian. Mai ita reflete kona-ba aspetu rua ne’e: ninia prosimidade mai ita no ninia tulun kontra ida-ne’ebé akuza ita.

Ninia prosimidade: Espíritu Santu, Jezús dehan, “hela iha imi no iha imi” (kf v. 17). Nia nunka abandona ita. Espíritu Santu hakarak hela ho ita: nia la’ós bainaka pasajen nian ne’ebé mai halo vizita ida kortezia nian. Nia mak maluk ida moris nian, prezensa estavel, nia mak Espíritu no hakarak horik iha ita-nia espíritu. Nia pasiente no hela ho ita bainhira ita monu mós. Nia hela tanba hadomi loloos ita: nia la halo finji hadomi ita atu ikusmai husik ita mesak iha difikuldade sira nia laran. Lae, nia leál, transparente, auténtiku.

Defaktu, bainhira ita iha provasaun laran, Espíritu Santu konsola ita, lori Maromak nia perdaun no forsa mai ita. No bainhira nia tau iha ita-nia oin ita-nia salan sira no korriji ita, nia halo ho delikadeza: iha nia lian ne’ebé ko’alia ba fuan iha nafatin ton ternura nian no domin nia manas. Loos duni, Espíritu Paráklitu ezijente, tanba nia mak belun loos ida, fiél, ne’ebé la subar buat ida, ne’ebé sujere mai ita saida mak atu muda no oinsá sai boot. Maibé bainhira korriji ita nia la hatun ita no la tau iha ita dezánimu; iha kontráriu, nia tranzmiti serteza katak ho Maromak ita bele halo, nafatin. Ne’e mak ninia prosimidade. Serteza furak ida!

Aspetu daruak, Espíritu Paráklitu mak ita-nia advogadu no defende ita. Nia defende ita iha ida-ne’ebé akuza ita nia oin: iha ita-nia oin rasik, bainhira ita la hadomi an rasik no la perdua an rasik, t karik to’o dehan katak ita falla no la di’ak ba buat ida; iha mundu nia oin, ne’ebé tau sees ema ne’ebé la korresponde ba ninia eskema no modelu sira; iha diabu nia oin, ne’ebé akuzadór no divizór boot liu (kf Apo 12,10) no halo buat hotu atu ita sente kbiit laek no triste.

Iha akuzadór sira-ne’e nia oin, Espíritu Santu sujere mai ita oinsá hatán. Ho maneira oinsá loos? Paráklitu, Jezús dehan, mak Ida-ne’ebé “fó hanoin mai ita buat hotu ne’ebé Jezús hateten mai ita (kf Jo 14,26). Ne’e duni, Nia fó hanoin mai ita, Evanjellu nia liafuna sira, no nune’e perimiti ita atu hatán ba diabu akuzadór la’ós ho ita-nia liafuan sira, maibé ho Na’i nia liafuan rasik. Liuliu fó hanoin mai ita katak Jezús ko’alia nafatin kona-ba Aman ne’ebé iha lalehan,  halo ita hatene Nia no revela mai ita nia domin mai ita, ita ne’ebé nia oan sira. Se ita invoka Espíritu, ita aprende atu simu no hanoin realidade importante liu moris nian, ne’ebé proteje ita husi buat aat nia akuzasaun sira. No sá loos realidade importante liu moris nian? Katak ita Maromak nia oan doben sira. Ita mak Maromak nia oan ne’ebé Nia hadomi: ne’e mak realidade importante liu, no Espíritu fó hanoin kona-ba ne’e.

Maun no biin-alin sira, ohin ita husu ba an rasik: ita invoka Espíritu Santu, ita harohan beibeik ba nia? Ita keta haluha Nia ne’ebé besik mai ita, loloos iha ita-nia laran! No hafoin, ita sé tilun ba ninia lian, bainhira nia enkoraja no bainhira nia korriji ita? Ita hatán ho Jezús nia liafuan ba akuzasaun sira buat aat nian, ba “tribunál” sira moris nian? Ita hanoin katak ita mak Maromak nia oan sira ne’ebé Nia hadomi? Atu Maria halo ita sai dosil ba Espíritu Santu nia lian no sensivel ba ninia prezensa.