S. JOSÉ, OPERÁRIO

 1 Maiu

“Festa Serbisu nian”, ne’ebé Internasional Sosialista kria iha 1889, selebra iha Europa, iha 1 Maiu. Igreja hakarak fó dimensaun kristán. Nune’e, Pio XII, iha 1955, instituiu festa S. José Operário, hodi tau iha loron ne’e. La iha ema ida liufali traballadór umilde Nazaré nian bele hanorin ba traballadór sira seluk dignidade serbisu nian, no proteje sira ho ninia intersesaun iha Maromak nia sorin.

Evanjellu Mateus 13,54-58

«To’o tiha ninia rai, Nia hanorin iha sinagoga, halo ema hotu hakfodak hodi dehan: “Nia matenek ho nia kbiit hodi halo milagre hirak ne’e mai loos husi ne’ebé? Nia la’ós badaen-ai nia oan? Nia inan la naran Maria, no mós nia maun-alin la naran Tiago, José, Simão ho Judas? Nia feton la hela hamutuk ho ita? Ne’e duni, buat hirak ne’e hotu, Nia hetan loos husi ne’ebé?” No sira lakohi simu Nia. Maibé Jezús dehan ba sira: “Ema hanai profeta ida iha fatin hotu; iha nia rai de’it no iha nia uma mak ema hewai nia.” Nia la halo milagre barak iha ne’ebá, tan ema sira ne’ebá la fiar».

Kontestu

Kondisaun familiár no laborál Jezús nian impede ninia konsidadaun sira atu rekoñese nia nu’udar Maromak nia manu-ain, nu’udar profeta. Nia “basaen-ain nia oan” (v. 55). Tuir Lucas, nia rasik karpinteiru: “Nia la’ós badaen-ai?…” (13, 55). Maromak nia Oan halo an ba ema hakarak sai membru família operária ka serbisu-na’in nian ida. Ninia maluk husi rai hanesan la konsege hakat liu sira nia hateken, hodi despreza nia, no la rekoñese Nia nu’udar Mesias. Maibé la’ós ita mak tenke diriji kondisaun sira Reinu nian, ne’ebé bele realiza iha kondisaun sosiál naran de’it no iha serbisu naran de’it. No Maromak gosta halo surpreza mai ita.

Meditatio

Iha família umilde no operária Nazaré nian, serbisu mak espresaun domin nian. José mak karpinteiru ka badaen-ai ida ba moris tomak. Jezús ezerse mós profisaun ida-ne’e durante tinan sira nia moris haksumik an nian, iha Nazaré. Depoizde hasoru hikasfali nia aman-inan sira, Jezús fila ba Nazaré no submete ba sira (kf Lc 2, 51). Jezús nia submisaun no obediénsia, iha Nazaré, tenke haree nu’udar partisipasaun iha José nia serbisu. Se família Nazaré nian mak ezemplu ba família umana sira iha orden salvasaun no santidade nian, nia mós ezemplu iha Jezús nia serbisu, iha karpinteiru José nia sorin. Serbisu umanu, partikularmente serbisu manuál, iha asentuasaun espesiál iha Evanjellu. Ho Maromak nia Oan nia umanidade, serbisu tama iha mistériu Inkarnasaun, nune’e mós hetan makso’in iha mistériu Redensaun. Hodi serbisu iha Jezús nia sorin, José hakbesik ba serbisu umanu Redensaun nian. Virtude laboriozidade nian iha importánsia espesiál iha Jezús nia kreximentu umanu “iha matenek no iha grasa” (Lc 2, 52), basá serbisu mak ema nia soin ida, ne’ebé nakfilak natureza no halo ema, iha sentidu ida, sai ema liután. Serbisu sinseru, umilde, disponivel iha domin, liga ita ba Kristu, karpinteiru nia oan, Maromak nia Oan.

Nu’udar relijioza/u sira, liuhusi ita-nia serbisu, ita mós kolabora ho Krisdór nia obra, ita fó ita-nia kontributu pesoál ki’ik-oan ba mundu nia transformasaun no ba realizasaun Maromak nia projetu iha istória (kf GS 34). Serbisu mak espresaun ida ita-nia moris pobreza nian. Ema kiak sira tenke serbisu atu bele moris… Iha serbisu, aleide ne’e hotu, ita presiza hadomi Korsitu Kiak, serbisu-na’in, “karpinteiru nia Oan” (Mt 13, 55). Nune’e, hanesan Nia, ita bele iha fuan ne’ebé kiak, sóbriu, ho ezijénsia uitoan de’it, nakloke ba ema seluk, hatene partilla buat ne’ebé iha.

Oratio

Ita harohan, hodi husu ba Sagrada Família atu tulun traballadór no família sira, liuliu sira ne’ebé hasoru difikuldade boot, atu moris iha profundidade.

Hanorin ami, José:
Oinsá “la’ós protagonista”;
Oinsá la’o bá oin, hodi la sama;
Oinsá kolabora, hodi la impoin;
Oinsá hadomi, hodi la eziji.
Dehan mai ami, José:
Oinsá moris, nu’udar “ema númeru rua”;
Oinsá halo buat importante, husi fatin daruak.
Esplika mai ami, José:
OInsá sai boot, hodi la hatudu an;
Oinsá luta, lahó ema nia basa liman;
Oinsá bá oin, lahó publisidade;
Oinsá persevera no mate,
Hodi la hein omenajen.