Dili/Comoro – «Obrigada, salamat po, terima kasih, gracias, grazie» maka liafuan ne’ebé ohin sai motivu halibur malu nian ba FMA no komunidade edukativa, nune’e mós membru sira Família saleziana nian. Festa gratidaun nian maka tradisaun saleziana ida ne’ebé Don Bosco rasik hakarak… basá gratidaun la’ós de’it devér ida ba ema ne’ebé hadomi ita maibé valór ida ne’ebé kualifika ita-nia relasaun iha espíritu família nian.

Nune’e maka ohin, iha festa Natividade Maria nian,  leigu/a no foin-sa’e sira besik atus rua husi komunidade hotu Inspetoria nian, halibur malu atu ho fuan ida de’it agradese Maromak ba prezente hotu ita simu liuhusi FMA sira, husi maluk sira ida-idak no ba ida-ne’e’bé anima Inspetoria ne’e ho dedikasaun no domin boot: Ir Paola Battagliola.

 

Halo festa gratidaun nian iha tempu preparasaun nian ba tinan 25 prezensa FMA nian iha Timor, sai signifikativu liután. Iha altár agradesimentu loos liu katak Eukarisita, P. Apolinario nu’udar selebrante, agradese tebes ir Paola no misionária sira, ne’ebé sai pioneira prezensa FMA nian iha Timor-Leste. Sira mak lori fini karizma salezianu iha estilu femininu atu kuda iha Timor. Nia mós konvida partisipante hotu atu hanesan Maria ho nia moris lori mai Maromak nia Oan, nune’e ita ida-idak, parte Família Saleziana nian bele sai mós hanesan Maria, maklorik Jezús nian ba foin-sa’e sira.

Festa ne’ebé iha nu’udar íkone evanjéliku “festa Kaná nian”, halo duni ho klima festa kazamentu nian. Horisehik iha selebrasaun vespertina, irmán sira fó hatais irmán Paola hanesan noiva no ho prosisaun akompaña nia to’o iha fatin partilla paun no tua nian, katak refetóriu. Maibé la’ós aspetu esternu mak importante. Hanesan ir Paola hato’o iha ninia liafuan agradesimentu nian ohin, importante liu “moris esperiénsia Kaná nian, sente katak Maria maka ‘prezensa’ moris ida ne’ebé bá molok ita no akompaña ita. Nia mak tulun ne’ebe orienta ita ho modu desizivu ba Jezús. Nia maka prezensa preventiva, maternál, intuitiva, efikás, laran-luak, pronta atu atua intervensaun edukativa sira ne’ebé halo moris no ksolok naksuli”.

Iha festa agradesimentu ida-ne’e, ir Paola fó prémiu ba adultu, foin-sa’e no labarik sira ne’ebé manán iha kompetisaun marianu oioin propoin ba tinan daruak preparasaun nian ba aniversáriu da-25 prezensa FMA iha Timor.  Nia agradese “ba empeñu ne’ebé foti atu halo Maria nia prezensa sai vitál, habelar koñesimentu, devosaun no domin ba Nia iha ita-nia ambiente sira” no konvida atu iha tinan datoluk eh tinan ikus preparasaun nian, “ita hotu tuir Maria Edukadora nia eskola”. Nia hatutan tan katak se “ita husik Nia eduka ita, ita-nia ambiente hotu sei transmite domin ba moris no ba futuru, sei transmite konfiansa iha foin-sa’e sira no iha serteza katak Nia akompaña ita no la para atu sai nafatin mai ita Inan ne’ebé lori ita kontinuamente ba Jezús”.