Papa Francisco nia reflesaun kona-ba Evanjellu Domingu II Páskua nian (16-4-2023)

Maun no biin-alin sira, “buongiorno”!

Ohin, Domingu Divina Mizerikórdia nian, Evanjellu konta mai ita Jezús moris-hi’as nia aparisaun rua ba dixípulu sira no ho modu partikulár ba Tomé, apóstolu ‘fiar-laek’ (kf Jo 20,24-29).

Tomé, loloos, la’ós ida mesak ne’ebé susar atu fiar, maibé nia uitoan reprezenta ita hotu. Defaktu, la’ós sempre fasil atu fiar, espesialmente bainhira, hanesan ninia kazu, sofre tiha ona deluzaun boot.  Depoizde deziluzaun boot, difisil atu fiar. Nia tuir Jezús ba tinan barak, hasoru risku no tahan deskonfortu sira, maibé ema tau Mestre iha krús hanesan ahu-na’in ida no ema ida la liberta Nia, ema ida la halo buat ida! Nia mate no ita hotu ta’uk. Oinsá nia bele konfia tan? Oinsá konfia ba notísia ne’ebé dehan katak Nia moris? Iha nia laran iha dúvida.

Maibé Tomé hatudu katak nia iha aten-barani: enkuantu sira seluk taka an iha senákulu tanba ta’uk, nia sai, ho risku katak ema ruma bele rekoñese nia, kesar nia no prende nia. Ita bele mós hanoin katak, ho nia aten-barani, nia merese liu sira seluk atu hasoru Na’i moris-hi’as. Maibé, tanba nia hadook an, bainhira Jezús mosu ba dala uluk ba dixípulu sira iha kalan Páskua nian, Tomé la iha no lakon okaziaun. Nia hadook an husi komunidade. Oinsá nia bele rekupera? Hodi fila fali ho sira seluk, hodi bá fali iha-ne’ebá, iha família ne’ebé nia husik iha ta’uk no triste. Bainhira nia halo, bainhira nia fila, sira dehan ba nia katak Jezús mai, maibé susar ba nia atu fiar; nia hakarak haree Jezús nia kanek sira. No Jezús halo kontente nia: liutiha loron ualu Nia mosu fali ba Ninia dixípulu sira no hatudu ba sira Ninia kanek sira, liman sira, ain sira, kanek sira ne’ebé sai prova Ninia domin nian, ne’ebé sai kanál sira nakloke nafatin mizerikórdia nian.

Mai ita reflete kona-ba realidade sira-ne’e. Atu fiar, Tomé hakarak sinál estraordináriu ida: kona kanek sira. Jezús hatudu ba nia, maibé ho modu ordináriu, hodi mai iha sira hotu nia oin, iha komunidade, la’ós iha li’ur. Hanesan atu dehan: se ó hakarak hasoru ha’u keta buka dook, hela iha komunidade, ho sira seluk; no keta bá, harohan ho sira, silu paun ho sira. No Nia dehan mós mai ita. Iha-ne’ebá mak ó bele hetan ha’u, iha-ne’ebá mak ha’u sei hatudu, marka iha ha’u-nia isin, sinál sira kanek nian: sinál sira Domin nian ne’ebé manán ódiu, Perdaun nian ne’ebé dezarma vingansa, sinál sira Moris nian ne’ebé halakon mate.. Iha-ne’ebá, iha komunidade, mak ó sei deskobre ha’u-nia oin, enkuantu ó partilla ho maun-alin sira momentu sira dúvida no ta’uk nian, hodi hakohak metin liután sira. Lahó komunidade difisil hasoru Jezús.

Maun no biin-alin doben sira, konvite halo ba Tomé vale mós mai ita. Ita, iha-ne’ebé mak ita buka Na’i Moris-Hi’as? Iha eventu espesiál ruma, iha manifestasaun relijioza espetakulár no maravilloza, iha de’it ita-nia emosaun no sensasaun sira? Eh iha komunidade, iha Kreda, hodi aseita dezafiu atu hela iha nia, maski se la’ós perfeita? Maski ho ninia limitasaun sira hotu no ho ninia mamonuk (monu)  sira, katak ita-nia limitasaun no ita-nia mamonuk sira, ita-nia Inan Kreda mak Kristu nia Isin; no iha-ne’ebá, iha Kristu nia Isin, mak ita hetan agora no nafatin, sinál sira ne’ebé boot liu nina domin nian. Maibé ita husu se, hodi domin ne’e nia naran, hodi Jezús nia kanek sira nia naran, ita dispostu atu loke ita-nia liman sira ba ema ne’ebé moris hakanek, hodi la esklui ema ida husi Maromak nia mizerikórdia, maibé hodi simu hotu-hotu; ida-idak nu’udar maun-alin ida, biin-alin ida hanesan  Maromak ne’ebé simu ema hotu. Maromak simu ema hotu.

Maria, Inan Mizerikórdia nian, tulun ita atu hadomi Kreda no halo nia sai uma maksimuk ba ema hotu.