LAGA, 9 DE ABRIL DE 2023

Agostinha Magno, FMA & Zelia Matos Lemos, FMA

Festa Jezús Moris hias husi mate iha Domingo ne’e, sai mai ita  sarani tomak nu’udar sinal ksolok no esperansa boot ba ita nia fiar. Selebrasaun solene ne’e iha Paroquia Dom Bosco Laga, preside husi Padre Placido Freitas, sdb ne’eb’e mai husi Dili; iha homilia padre konvida sarani sira atu buka hafoun-an nafatin iha roman Kristu moris hias nian, liu-liu tau iha pratika hahalok lalehan nian. Irmã sira iha Komunidade Beata Laura Vicuña Laga, selebra festa boot ne’e ho modo espesial hamutuk ho menina interna sira, ho motivo tolu; primeiro selebra festa páscoa hamutuk, Segundo Festa ba sira hotu ne’ebé halo tinan moris nian, hahu husi fulan Janeiru to’o fulan Abril no terceiro reza rosário Laudato Si Agradesimentu nian ba Madre Provinsial Me. Alma Castagna, FMA, iha ambiente Natural. Nune’e festa ida ne’e sai furak no ksolok liu tan tamba hamutuk nu’udar familia bo’ot ne’ebé hametin liu tan domin no tali uniaun nian entre Irmãs no menina sira.