Sábadu Santu mak loron marianu: iha nia ita selebra Maria nia fidelidade radikál ba Kristu. Iha loron ne’ebé hatur Jezús nia isin iha rate, enkuantu dixípulu sira laran rua-rua, Maria mesak mantein lakan ahi fiar nian: nia metin iha nakukun fiar nian, firme iha oras dúvida nian. Maibé, hodi dehan katak, iha loron ne’e, nia mesak mak fiar, loloos ita hakarak dehan katak, iha Sábadu Santu, Kreda tomak nia fiar tau hamutuk iha nia, basá Kreda identifika an ho nia – mikro-Kreda – ne’ebé iha krús okos, simu bolun atu sai ema hotu nia Inan. Ne’e duni, tanba marianu, Sábadu Santu mak loron ekleziál.

Iha Sábadu Santu Maria espresa fiar ida liuhusi terus: nune’e, iha nia realiza Simeaun nia profesia: «Surik ida sei sona borua ó-nia klamar» (Lc 2,35). Iha loron ne’e, nia fiar nia roman nian saran mai ita, nune’e mós serteza fiar nian katak Kristu, iha fatuk rate nian nia kotuk, hala’o hela ema nia salvasaun. Ne’e duni, Nia mak mestra matenek: diferente husi ita, «halo […] memória nu’udar fatin profesia nian: hanoin hikasfali atu hein, filafali ba pasadu atu loke an ba futuru, iha esperansa katak Maromak fiél ba ninia promesa sira». Virjen Sábadu Santu nian hatudu katak «esperansa la bosok ida» (Rm 5,5), tanba haree ona Makso’in nia vitória, ho fiar ne’ebé molik no radikál ne’ebé halo nia fiar maski liu husi loron nakukun liu istória umana nian.

Sábadu Santu mak loron Virjen Doloroza nian, loron atu hanoin nia fiar, ne’ebé nakdoko tan terus inan nian, maibé mós fiar husi Feto no Inan ne’ebé, ho ninia ‘sim’ fiar nian repete iha “oras” nia tutun, interrompe silénsiu boot Sábadu Santu nian no ho ninia prezensa fiél ba Oan ne’ebé lakon hakonu nia ho solidaun mortál: tanba ne’e, iha loron ne’e, Fiar-na’in Páskua nian ne’ebé ita bele tau konfiansa liu mak Maria, no tanba ne’e nia simu títulu Virjen Sábadu Santu nian.

ORASAUN BA MARIA, FETO SÁBADU SANTU NIAN

Santa Maria, feto Sábadu Santu nian, kadalak midar liu iha-ne’ebé pelumenus ba loron ida halibur Kreda tomak nia fiar, ó mak pontu ikus kontaktu nian ho lalehan ne’ebé prezerva rai husi blackout trájiku grasa nian.

Ho ó-nia liman gia ami ba naroman nia odamatan, iha-ne’ebé Páskua mak nia hun aas liu.  Estabiliza iha ami-nia espíritu memória sira laran-midar nian, atu iha fragmentu sira pasadu nian ami bele hetan parte di’ak liu ami-nia an nian. No fanun iha fuan laran, liuhusi sinál sira futuru nian, nostaljia intensa ba renovasaun, ne’ebé tradús iha empeñu atu la’o iha istória ho konfiansa.

Santa Maria, feto Sábadu Santu nian, tulun ami atu komprende katak, loloos, moris tomak, tara entre nakukun sesta nian no espetativa domingu Resurreisaun nian, hanesan loloos ho loron ne’e. Ne’e mak loron esperansa nian, bainhira fase moos hena sira nakonu ho matan-been no raan, no hamaran iha loron-matan primavera nian atu sai toalla altár nian.

Tenik mai ami, katak la iha krús ne’ebé la iha ninia depozisaun. La iha mamoruk umanu ne’ebé la nabeen iha hamnasa midar. La iha salan ne’ebé la hetan redensaun. La iha rate ne’ebé fatuk iha nia odamatan la’ós provizóriu.

Duut aat sira ne’ebé metan liu mós lakon iha hatais ksolok nian. Rapzódia trájika liu mós hatudu ain-hakat dahuluk sira dansa nian. Akorde ikus sira knananuk halerik matebian nian iha ona motivu festa aleluia paskál nian.

Santa Maria, feto Sábadu Santu nian, haktuir mai ami, oinsá iha rai-nakaras loron ne’e nian, ó prepara an tiha ona ba enkontru ho ó-nia Oan Moris-Hi’as. Túnika ida-ne’ebé mak ó tau iha kabaas? Sandálias ida-ne’ebé mak ó tau iha ain atu halai lalais iha duut sira leten? Oinsá mak ó kesi ó-nia fuuk naruk sira, nu’udar feto Nazaré nian, iha ulun? Liafuan domin ida-ne’ebé mak ita tenik subsubar iha  laran, atu dehan tomak ba Nia bainhira nia mosu iha ó oin?

Inan midar liu, prepara mós ami ba enkontru ho Nia. Hamosu impasiénsia iha ami ba ninia filahikas iha domingu. Enfeita ami ho hatais kazamentu nian. Atu pasa tempu, tur iha ami-nia sorin no mai ita halo ensaiu knananuk sira-nian. Basá iha -ne’e oras sira nunka liu. (Don Tonino Bello)