JG

Dili, 4 Abríl 2023

Komunidade edukativa EBC-Maria Auxiliadora halo preparasaun ba Páskua hamutuk, ohin, fatin Eskola nian. Iha Retiru Padre João Gaspar SDB ko’alia kona-ba Jezús nia mistériu moris nian ne’ebé ita sei moris husi Kinta-Santa to’o Domingu Resurreisaun. Nu’udar konsagrada ka nu’udar kaben-na’in ka foin-sa’e, ita hotu bele aprende husi Jezús.  Iha Domingu Ramos ita bele aprende katak la’ós hotu-hotu ne’ebé hahí ita gosta ita, hadomi ita! Iha Kinta-Santa nia hanorin ita atu sai serví-na’in lahó interese, gratuitu. Iha Sesta-Santa Nia hanorin ita atu iha konfiansa iha Maromak iha terus no difikuldade sira nia laran, hasoru mate mós, persevera iha pasiénsia, fiar iha Na’i, basá ikusmai ita sei manán. Iha Sábadu Santu no Domingu mak prova katak konfiansa iha Maromak, perseveransa no fidelidade to’o rohan lori mai ita ksolok no moris-hi’as.

Depoizde konferénsia iha posibilidade ba konfisaun no taka ho Santa Missa. Partisipante sira iha retiru badak ne’e mak profesór/a sira no menina na’in rua ne’ebé halo dixernimentu vokasionál, husi leigu inan-aman mai na’in tolu no Irmán na’in ualu komunidade Eusebia Palomino nian.