“Imi tuir Ha’u mai, Ha’u sei halo imi peskador ema nian” (Mt. 4,19)

Dili, 24 Marsu 2023

Post. Casilda Moreira

 

Balide, hahú husi loron 23 Fulan Marsu 2023, ami aspirante nain 4 hala’o retiru iha tasi-ibun Areia Branca nian nu’udar preparasaun ba Selebrasaun Medalla Postulante ne’ebé sei simu iha loron tuir mai. Iha retiru ne’e Me. Angelita ne’ebé gia ami lori hikas fali ami atu sente Jesus nia prezensa iha tasi ibun Galileia nian ne’ebé la’o no bolu Nia Apostulu sira hodi halo sira sai hakail-nain ema nian.

Iha loron tuir mai, 24 Fulan Marsu, Komemorasaun Maria Inan Tulun Nain nian, ami haksolok no agradese ba Maromak nia bolu ne’ebe liuhusi Me. Alma ho nia Konselleira sira simu ami nain 4 nu’udar Postulante iha Instituto Filhas de Maria Auxiliadora nian: Post. Casilda de Jesus Moreira, Post. Geovanina Justina da Costa, Post. Juliana Ramos da Costa no Post Nolita de Jesus Barreto.

Iha selebrasaun Me. Alma hateten: “Maromak mak fihir, hili no bolu ema atu tuir Nia, hodi sai Nia sasin lolós iha maun-alin sira nia le’et. Hanesan ho Apostulu sira ne’ebé Jesus bolu iha momentu ne’ebá, sira la hatene saida mak sei mosu maibé sira rona no la’o tuir Jesus. Maromak nia planu mai ita, ita la hatene, maibe ita koko atu la’o tuir Nia no la’o hamutuk nafatin ho Nia.

Hanesan ho ami nia simbolu ne’ebé ami hili: “bero”, ami sei la hean ró mesak maibé iha Jesus ne’ebé la’o hamutuk nafatin ho ami hodi hakonu ami ho Nia grasa atu sai hakail-nain ema nian.