Saun José, husi uma-kain David nian, husi rai Belém. Tan motivu família nian ka tanba serbisu nia muda ba Nazaré no sai Maria nia kaben. Maromak nia anju komunika ba nia mistériu inkarnasaun Mesias nian iha Maria nia knotak, no José, ema justu, aseita maski liuhusi krize. Bainhira nia bá Belém ba arrolamentu, Kosok-Oan Jezús moris. La kleur, nia tenke halai ho Kosok-Oan ba Ejitu, no husi ne’ebá filafali ba Nazaré. Bainhira Jezús tinan 12, ita haree José no Maria iha Jerusalém, iha-ne’ebé sira lakon Nia no hetan hikasfali iha templu ho doutór lei sira-nian. Hahú husi epizódiu ida-ne’e, evanjellu sir ala dehan tan buat ida kona-ba José. Bele akontese katak nia mate molok Jezús hahú nia vida públika.

José nia moris tomak —modesta, umilde, simples— mak moris ida nabilan. Tanba ne’e, místika famoza sira (Teresa de Ávila, Hildegarde de Bingen, Teresinha de Lisieux), Fundadór boot sira (Bento, Bruno, Francisco de Assis, Bernardo de Clairvaux, Don Bosco) no santu husi tempu hotu enkoraja ita atu hadomi nia hodi tuir ninia ain-hakat sira, nia ne’ebé Padroeiru Igreja nian. S. José mós padroeiru Institutu “Filhas de Maria Auxiliadora” (FMA) nian.

Evanjellu Mt 1,16.18-21.24

«Jacob hetan oan naran José, ne’ebé kaben ho Maria. Husi Maria moris Jezús, ne’ebé hanaran Kristu. Jezús Kristu moris nune’e: José husu nanis ona atu kaben ho Maria, Jezús nia inan. Molok sira moris hamutuk, Maria ko’us tiha ona hodi Espíritu Santu nia kbiit. Nia laen José, ne’ebé ema justu no lakohi hamoe Maria, hakotu atu husik de’it nia. Nia hanoin daudaun buat ne’e, wainhira Na’i nia anju mosu ba nia iha mehi, dehan: “José, David nia oan, keta ta’uk simu Maria nu’udar ó-nia kaben, basá nia ko’us hodi Espíritu Santu nia kbiit. Maria sei tur ahi oan mane ida ne’ebé ó sei hanaran Jezús, basá Nia mak sei soi povu husi sira sala”. Hadeer tiha husi mehi, José halo tuir buat ne’ebé Na’i nia anju haruka hodi simu nia kaben».

Reflesaun

Igreja konvida ita atu bá hasoru S. José, atu haksolok no hahí Maromak ba bensan sira haraik ba nia. S. José mak “mane justu” (Mt 1, 19). Ninia justisa mai husi akollimentu don fiar nian, nia retidaun interiór no respeitu ba Maromak no ba ema sira, ba lei no ba akontesimentu sira. La fasil ba José aseita paternidade ne’ebé la’ós ninian, responsabilidade atu sai mestre no gia ba Maromak nia Oan, ne’ebé sei sai Bibi-Atan Israel nian. Respeitu, obediénsia no haraik-an mak baze ba José nia “justisa. Atitude interiór ida-ne’e, ne’ebé nia iha hodi hala’o ninia misaun únika, mak gia José ba santidade nia tutun, hamutuk ho Maria, nia kaben.

José nia atitude sira mak karakterístika sira ema boot sira nian tuir Bíblia, Maromak mak hili no bolu sira ba misaun importante. Maski sira konsidera an ki’ik, fraku no la soi, sira aseita no realiza misaun, hodi tau laran metin iha Ida-Ne’ebé dehan” “Ha’u sei hamutuk ho ó.

José la buka ninia interese no satisfasaun sira, maibé tau nia an tomak atu serví sira ne’ebé nia hadomi. Nia domin ba nia kaben, Maria, iha finalidade ida de’it, atu serví vokasaun ne’ebé Maria simu. Ho modu ida-ne’e, kazál ida-ne’e to’o ba uniaun espirituál kmook, no husi ne’e suli ksolok ida puru liu. Ne’e mak perfeisaun domin nian. José nia domin ba Jezús nia finalidade mak serví de’it Jezús nia vokasaun, Jezús nia misaun Ba José, oan la’ós propriedade ida atu impoin ho autoridade tirania nian, hanesan dalaruma akontese ho aman-inan balun , ne’ebé impoin sira-nia hakarak ba oan sira. José hatene katak Jezús la mai husi nia, no nia hakarak de’it mak prepara Jezús, tuir ninia kapasidade sira, ba misaun Makso’in nian, nu’udar Anju haktuir ba nia.

Liuhusi S. José ninia intersesaun, ita husu ba Maromak, fiar, konfiansa, dosilidade, jenerozidade no pureza domin nian mai an rasik no ba ema sira ne’ebé iha responsabilidade iha Igreja, atu Maromak nia kmanek sira bele realiza mós iha ita-nia tempu.