Dili – Komunidade edukativa Eusebia Palomino/EBC Maria Auxiliadora, ohin halo enkontru formasaun hamutuk kona-ba “Laudato Si” no mós halo programasaun kona-ba aniversáriu EBC-MA ba tinan 25. Partisipa iha enkontru ne’e Komunidade Edukativa núkleu no Profesór/a sira.

Enkontru hahú ho jogu kona-ba dokumentu Laudato Si’ no fó hanoin hikasfali kona-ba ensíklika Laudato Si’ ne’eb’e Amu-Papa hakerek iha tinan 2015. EBC-MA mós halo parte ba Laudato Si platform, tanba ne’e nia iha empeñu atu moris objetivu hitu plataforma Laudato Si’ nian. Ir Jacinta Gusmão ne’ebé fasilita enkontru fó hanoin kona-ba empeñu sira ne’eb’e ita foti ona no atu kontinua haka’as an atu muda mentalidade ka konversaun ekolójika.

Tuirmai, Ir Jacinta aprezenta Programasaun Komunidade Edukativa ba tinan 2023 no hafoin kontinua ho programasaun ba aniversáriu da-25 ba EBC-MA ho tema “Ho Maria ita agradese ba ita-nia pasadu no kontinua hari’i ita-nia memória sira”.  Partisipante sira fahe ba grupu tolu atu hanoin ba atividade sira. Depoizde fahe kona-ba programa tinan 25 no foti konsensu kona-ba atividade sira, konsege kria komisaun ho ninia sesaun sira nune’e bele hahú ona preparasaun ba festa ne’e.

Ita husu Na’i-Feto Auxiliadora, padroeira EBC nian, bele akompaña ita nafatin iha ita-nia empeñu edukasaun nian ho laran-manas ohin no ho mehi nafatin ba edukasaun di’ak iha ita-nia Rain doben ida-ne’e.

Obrigada ba partisipante hotu enkontru ne’e nian.