“Sinál boot ida mosu iha lalehan: feto ida hatais ho loron, ho fulan iha nia ain okos no iha nia ulun koroa ida husi fitun sanulu-resin-rua” (Ap 12,1).

Igreja sempre haree iha feto ne’e figura Maria nian: FETO HATAIS HO LORON. Loron iha nia naroman rasik no forte liu. Naroman forte ida bele tulun ita atu haree momoos sasán sira no la’o iha nakukun. Husi parte seluk, naroman forte liu bele sai ita-nia inimigu boot bainhira tau nia iha fatin kontráriu ba fatin ne’ebé ita atu bá. Se naroman leno ita nia dalan, nia tulun ita tebes. Maibé sei mai kontráriu ba ita-nia diresaun, ita bele susar, hanesan akontese ho asidente sira kareta nian bainhira hasoru kareta seluk ho naroman maka’as kareta nian. Ita rasik se hateke diretamente ba loron, ita sei sai matan delek, labele haree ona.

Ita hatene katak iha funu boot entre demóniu no Maria, Jezús nia Inan. “Ha’u sei tau ódiu entre ó no feto, entre ó-nia jerasaun no ninian. Nia sei sama ó nia ulun, no ó sei tata ninia ain-tuban (Gn 3, 15). Maria, feto hatais ho loron mak ida-ne’ebé halo demóniu sai delek bainhira nia hateke ba Maria. Hanesan ita la konsege hateke ba loron la hodi sai delek, nune’e mós bainhira demóniu hateke ba Maria, feto hatais ho loron, nia matan sai delek. Tanba ne’e mak nia halo esforsu hotu atu hasai Maria husi fatin hotu liuliu husi Igreja no família sira. Ita bele komprende momoos katak iha tempu sira iha-ne’ebé família sira reza rozáriu ka tersu hamutuk, separasaun entre kazál sira nia númeru ki’ik liu, no oan sira obedese no halo tuir liután aman-inan sira. Família bá beibeik uma-kreda no iha família bele dada iis lalehan nian. Ne’e duni, Maria la’ós obstákulu naran ida ba demóniu. Iha kapítulu 12 Apokalipse nian ita haree funu entre feto no samea (dragaun).

Sá loos oportunidade ba ema matan delek ida iha funu kontra ida-ne’ebé, aleinde iha matan di’ak, ninia hatais mós loron nian? Ne’e duni, iha ne’ebé iha Maria, oportunidade no forsa demóniu nian lakon. Iha-ne’ebé Maria iha buat aat la tama, no iha-ne’ebé Maria tama buat aat sai. Ne’e mak grasa boot uma-kain ida bele iha: Feto hatais ho Loron. Hanesan nia bá hela iha Isabel nia uma iha vizitasaun (kf Lc 1,56) nune’e mós Maria hakarak hela iha ita-nia uma-laran sira.

Keta husik loron ida lahodi harohan rozáriu ka tersu no husu atu Nia ne’ebé hatais ho loron leno ita-nia uma-laran. Konsagra mós ó-nia familiár eh parente sira ne’ebé haluha ona Nia no husu atu Maria sai loron nabilan iha sira-nia uma-kain.