Carta Pastoral Quaresma 2023

“Quaresma, dalan ba transformação iha Cristo”

 

 

Amo vigario geral, vigario episcopal sira, pároco sira, superiores–maiores sira, maun–alin no feton sira, sarani doben sira hotu mak ha’u hadomi,

1. Na’i, Maromak, lalehan no rai nia na’in, Nia benção no graça horik ho imi. Iha fatin dahuluk, ha’u convida ita hotu, atu hamutuk foti matan ba leten áas ba, hasa’e agradece ba Maromak tan buat diak kmanek nebé haraik ona mai ita no tan Nia rasik acompanha ona ita iha moris ne’e. Maromak continua hatudu Ninia fidelidade ba ita to’o ohin loron, liu-liu, tanba liberta no hasés ona ita husi moras Covid-19 no ita bele hala’o ona atividade moris nian hanesan bai-bain.
2. Iha fatin daruak, ita hamutuk hasa’e nafatin oração ba Na’i Maromak tanba tinan 2023 ne’e nu’udar tinan politico no tinan democracia nian iha ita nia rai doben Timor-Leste. Timor-Leste, nu’udar nação no estado soberano ida, sei celebra festa democracia ida liu husi realização eleições parlamentares nian nebé sei acontece iha loron 21 fulan maio tinan 2023 mai ne’e. Nu’udar ema fiar na’in, ho festa democracia ne’e, ita hotu iha esperança foun ba progresso no desenvolvimento nebé sei acontece di’ak liu tan iha futuro.
3. Ha’u mos convida ita hotu atu hahú no hala’o ita nia retiro annual hamutuk ho Na’i Jesus Cristo iha ita ida-idak nia “deserto” rasik durante loron ha’at nulu (40) nia laran. Ohin, quarta feira cinzas, ho simu ahi-kdesan iha rentos nian, nu’udar sinal ita hahú tan momento foun ida ba ita hotu nu’udar ema ilas Maromak nian, nebé reconhece an nu’udar ida nebé fraku no sala na’in iha Na’i nia futar oin. Iha momento ida ne’e, ha’u encoraja ita hotu, atu tau importância ba momento ida ne’e hanesan momento nebé nakonu ho graça, nune’e ita bele aproveita nu’udar oase ou we-matan ida hodi halo mudança ba ita nia moris.

Momento forte no “oase” ba vida spiritual cristã nian

4. Ohin, ita hahú fila fali ita nia dalan conversão nian, dalan transformação nu’udar ema fiar na’in nebé insere-an iha Jesus Cristo nia dalan terus nian (via crucis). La’o hamutuk ho Nia, acompanha Nia, no hamutuk ho Nia hodi hahú mergulha konaba realidade quotidiana nian. Quaresma nu’udar “tempo forte” no oportunidade diak ida ba ita atu hamoris fila fali no haburas liu tan virtude teologal sira: fiar (fé), esperança no caridade liu husi pratica quaresmal nian hanesan oração, hadera-an no fó esmola.
5. Quaresma mak tempo graça nian iha nebé ita bele sente no hamoris oferta salavação husi Maromak, liu-liu ba sira be fiar iha Nia Liafuan. Iha período loron 40 nia laran ne’e, solicita ba ita hotu atu esforço-an hodi halo mudança ka transformação ida ba ita nia estilo moris nian, renovação fundamental no kle’an ba ita nia fuan no reconhece katak ita mos precisa Maromak nia presença, nia tulun no nia salvação iha ita nia moris. Ho maneira rona Maromak Futar Lia, ita disponibiliza an atu simu no hala’o iha pratica Aliança nebé Maromak halo ona ho Nia povo Israel liu husi profeta sira, cumpre no culmina iha Nia Oan nia terus, mate no moris hias, hamutuk ho vontade atu renuncia ita nia criterio sira no interese egoismo sira.
6. Quaresma ida ne’e nu’udar “tempo forte” ida atu ita bele fila fali ba ita nia-an, reconhece frakeza no erro sira liu-liu buat sira nebé ladi’ak no nakonu ho gosto hedonista, individualista, indiferente no maluk sira. Dalan ida ne’e nu’udar dalan ba mudança moris ida nebé diak liu. Tan ne’e, dalan ida ne’e nu’udar processo ida nebé la’o continua no inerente ba ita nia moris. Tan ne’e, necessario tebes atu bele continua hala’o nu’udar maneira ida hodi cultiva nafatin ita nia Ho liafuan seluk, quaresma nu’udar “tempo forte” atu hodi intensifica no reforça ita nia relação ho Na’i Maromak; no relação ida nebé forte sei sai nu’udar oase foun hodi hafoun an no halo fresku nafatin moris espiritual nian.
7. São Bento sublina iha ninia reflexão konaba quaresma nian nune’e: tempo quaresma ne’e nu’udar “primaveira” ida ba moris sarani nian. Significa katak: a) hatubun no haburas fila fali espírito moris nian; b) hadi’a no transforma fila fali moris nebé la dun di’ak ba moris di’ak liu, iha no liu husi transformação iha Cristo nia pascoa.

Dalan fila ba Aman Maromak nia uma

8. Evangelista São Lucas iha pericopa 15,11-32 haktuir konaba oan mane ikun ida nebé la’o husik hela tiha Aman nia uma hodi ba moris tuir força, estilo, orgulho, razão no paradigma rasik (cf. Lc 15,12-14). Experiência oan mane ikun nian hatudu katak wainhira ema fiar ba nia capacidade rasik, ninia hanoin rasik, abandona graça no la hamutuk ho Maromak, nia sei lakon buat hotu. Buat hotu nebé nia hakarak no buka iha mundo ne’e mesak provisorio de’it. Maske nune’e, Maromak respeita nafatin ema nia liberdade atu hodi hili (escolha) dalan nebé los ou buat sá mak diak liu ba nia an rasik. Figura oan mane ikun hatudu momós mai ita katak esforço tomak sei la vale buat ida se ita la’o mesak de’it força rasik, tuir dalan rasik. Ikus mai nu’udar ema nebé mos fragil, ema tenke reconhece iha Maromak nia futar oin katak buat hotu nebé acontece iha moris, nebé lori consequencia negativa, ne’e hotu tanba ema nia orgulho ba força nebé nia iha, arogancia, estilo moris hedonista no individualista, indiferente ho maluk sira no mos ho Maromak rasik. Ema sente an vale mesak deit no la precisa tan Maromak. Nia elmina tiha ona Maromak husi espaço moris nian.
9. Los dunik, dalan dahuluk atu bele fila ba Aman nia uma mak ema tenke reconhece katak nia la’o sala dalan ona; tan nia moris no encaixa an ona iha mundo superficial, mundo provisorio –hanesan psiquiatra Enrique Rojas sublina ona iha Homem Light konaba cultura dominante nebé buras iha mundo ohin loron nian, mak moris ida kamán (leve), moris ida nebé la kle’an, facil no superficial deit. Ema la buka ona atu hakle’an konaba sentido moris nian tanba la sai hanesan asunto importante ida hodi bele esforço liu tan atu bele moris iha profundidade nia laran. Experiência oan mane ikun ne’e hatudu dunik katak nia la’o sala dana; la’o tuir de’it exigência corrente tempo nian, “ema ho laran namlele, ema nebé anin doutrina oi-oin hu’u ba hu’u mai” (Ef 4,16), tan ne’e nia mout iha realidade profana hodi husik hela ninia relação intima ho Aman. Relação Aman-Oan ne’e kotu tanba nia hili atu la’o tuir corrente tempo no valores sira nebé la kle’an, laiha fundamento no valores hirak ne’e hahú ocupa iha centro moris nian. Tan ne’e, consciente fila fali ba relação ida ne’e, nia reconhece frakeza no falhanço sira no hamosu hakarak ida atu fila fali ba Aman nia uma. Movimento fuan ida ne’e representa imagem ema hotu husi epoca sira hotu, hahú kedas husi ema dahuluk, katak, Adão nebé lakon herança graça no justiça original nian tanba la tuir Maromak nia hakarak (cf. Lc 15,18-19) to’o mai ita iha mundo ohin loron nian. Maske nune’e, Domin no laran luak bo’ot liu sala no frakeza sira ema nian.
10. Dala ruma, ita hasoru situação dificil teb-tebes iha moris tan ita la’o sala dalan ona no la hatene dalan atu sai ou atu fila. Buat hirak ne’e acontece tanba ita nia escolha rasik hodi moris tuir gosto no hanoin rasik. Wainhira ita la’o tuir de’it hakarak no gosto sira, ita sei lakon herança moris iha graça, lakon mos dignidade nu’udar imagem Maromak nian tan corrupto husi sala. Tan ne’e, tenke iha consciência kle’an ba dignidade nebé lakon ne’e no hamosu espirito foun hodi hakat ba nakfilak-an (metanoia). Ho liafuan seluk, ita tenke hahú hodi hanoin atu hadi’an an, labele dukur no toba hakmatek iha sala fo’er nia laran; labele mos hanoin deit ba passadu nebé nakukun; maibe tenke hahú constroi fila fali esperança foun ida nebé firme hodi bele fila fali ba Aman Maromak nia uman, nia kaduna. Tebes dunik, ita husik hela Aman Maromak nia uma no atitude ida ne’e hakanek dunik Aman Maromak nia fuan, maibe relação Aman ho oan sira sei la kotu no sei la lakon tan deit sala. Aman Maromak laran diak no laran luak ne’e sempre pronto no hein nafatin atu simu no hakuak Nia oan sira. Maromak hein ho saudade wainhira ema iha disponibilidade atu fo resposta positiva no fila fali ba Nia uma (cf. Lc 15,20).
11. Tan ne’e, atitude husi oan mane nebé hakarak fila ba Aman nia uma, maske halo sala barak, hamosu optimismo ida nakonu ho responsabilidade no possibilidade ida atu compreende diak liu sentido husi Maromak nia misericordia. Aman laran domin na’in no laran diak ne’e hatudu nafatin ninia fidelidade nu’udar Aman, fiel nafatin ba domin nebé fo ba oan sira. Fidelidade ne’e expressa nakonu ho ksolok liu husi ho celebração solene hodi simu oan ida nebé mate tiha maibe moris hias fali. Ho liafuan seluk, tan compaixão Aman nia fuan nakloke hodi ba hasoru oan nebé fila fali mai uma, ba hakuak no rei nia (cf. Misericordia, 6).
12. Domin ba oan mak domin nebé naksulin husi natureza Aman nian, nebé dudu mos Nia atu cultiva dignidade oan nian. Misericordia nebé Cristo hanorin expressa kle’an tebes iha Domin Agape. Domin ida ne’e bele toca sira nebé lakon, la’o sala dalan, sira nebé terus tan moras oi-oin, liu-liu tan hahalok aat sira nebé hakoi no sei subar iha laran. Papa Francisco mos convida ita nu’udar Kreda ida atu ba hasoru sira iha periferia ema sira ne’e, atu transmite domin fraterno no hakuak Maromak nian ba sira hotu. Tan domin ne’e foti sa’e no dignifica ema maske sala nain (cf. Salm 103, 3-4).

Horizonte foun iha Cristo

13. Quaresma nu’udar momento ida atu identifika-an no assomilha an ho Cristo. Iha Cristo no ho Cristo ita bele hetan visão ou horizonte foun ida konaba oinsa ita hateke no haré ba realidade moris nian, mundo, ema no Maromak. Hamutuk ho Cristo, ita consciênte Aman Maromak nia domin nebé bo’ot tebes. Tan ne’e, ho Nia no iha Nia, ita bele hetan horizonte foun ida hodi hateke ba mundo, ba ema no mos ba criatura sira hotu.
14. Se quaresma nu’udar tempo atu converte-an, halo mudança ba moris, significa katak ita esforço-an atu nakfilak an iha no ba moris hamutuk Cristo, ita nia Redentor. Tan Cristo, Redentor, São Paulo dehan: “la’os tan ha’u mak moris, maibe Cristo mak moris iha ha’u” (Gal 2,20). Paulo nia liafuan encoraja ita atu, la’os deit fila fali ba Maromak nia uma, maibe atu ba moris hamutuk ho Na’i, disponibiliza an no pronto atu Na’I nia graça transforma no transfigura ita (cfr. Lc 9,28-36). Hakbesik-an ba moris ho Cristo mak sai nu’udar dalan fundamental hodi hahú transformasaun (metanoia) ba klamar, hanoin, no fuan nian; hahú oinsa halo mudança ba concepção sira nebé ita iha konaba ita nia an rasik, konaba Maromak, konaba ema seluk no konaba realidade tomak. Nune’e, se ita fila fali ba Cristo, ita nia Bibi Atan diak, nebé salva guarda ita nia klamar (cf. 1Pd 2,25), Nia rasik sei transforma ita, Nia Espirito muda ita nia fuan nebé toos ba fuan ida nebé mamar, fuan ida nebé boot no hatene haraik an nu’udar Nia fuan rasik (cf. Ez 36,26).
15. Fila ba Cristo Redentor signifika katak ita hasoru Nia iha relação amizade no amigavel ida ho Nia. Nakfilak an ba Cristo halo ita bele moris no sente katak ho Nia matan nebé único hateke ba ita, Ninia presença ne’e rasik transforme ita nia fuan, hanesan experiência nebé acontece ba Pedro iha sumu sacerdote nia uma (cf. Lc 22, 61-62) no iha tasi ninin wainhira Jesus husu ba nia oinsa ninia prontidão servi ho fuan nebé foun ba Na’i nia bibi sira(cf. Jo 21,15-17). Wainhira hasoru malu fali ho Redentor nebé moris hias, Pedro descobre ninia identidade nu’udar discipulo ida nebé Na’i hadomi ho ninia miseria no infidelidade tomak. Nia hatene katak domin boot liu limitação, frakeza, sala no ninia traição Katak Cristo mak provoca no estimula ita converte-an no muda ita nia fuan; la’os tan capacidade no mérito ita nian, maibe tan graça deít. Cristo lori ita, loke ita nia matan fiar nian no transforma ita atu bele moris no hamoris ita nia fiar ho fuan nebé foun. Hanesan experiência pascoa escolante nain rua ba Emaús nian: “Ita nia laran la manas wainhira Nia koalia ba ita tuir dalan hodi hanorin Escritura?” (Lc 24,32).
16. Transformação hodi hetan visão no horizonte moris foun iha Cristo bele acontece tanba abertura husi ita ema atu reconhece an iha Na’i Jesus Cristo futar oin no pronto atu rona no simu Nia nu’udar Salvador no Redentor. Ninia Liafuan sei hamanas nafatin ita laran no provoca ita atu bele hala’o conversão ida radical tebes. Fiar iha Jesus Cristo sei hamosu nafatin esperança ba moris diak iha futuro. Hanesan Jesus nia escolante, ita hotu hetan convite atu lori transformação ba mundo, ba sociedade, ba familia no ba ema hotu, inclui mos iha moris politica nian. Ha’u espera katak quaresma tinan ne’e sei provoca no obriga ita atu halo conversão politica ida ba ita hotu. Conversão politica katak converta-an husi pratica oi-oin nebé hakanek no estraga valores cardiais sira tanba pratica injustiça, violação ba direito humano, direito moris nian no halakon consciência ba dignidade moris ema nian iha sociedade. Jesus Cristo hamanas ita fuan no provoca ita nafatin atu halo conversão politica ida nebé mos. Ho ne’e de’it, bele lori mudança ba democracia iha rai laran. Democracia ida nebé diak no transparente, la’o tuir corridor nebé justo no loos.
17. Iha Cristo nia liman ita sei sai fini nebé namkari hodi fo fuan iha campo mundo nian, hodi fo sasin konaba misterio pascal terus mate no moris hias Na’i Desejo ba ita boot sira hotu coragem forte hodi bele tama no hahú percorso quaresmal ida ne’e ho diak.

 

Lecidere, 20 de fevreiro de 2023

Arcebispo Metropolitana Dili

Eminência Virgilio Cardeal do Carmo da Silva, SDB