Dili – Ami membru ADMA Balide, hatama iha ami nia programa ba tinan ne’e, 2023, atu halo asaun karidade dalarua iha tinan nia laran. Ida mak ami hili atu halo iha loron ne’e, 14 fevereiru, loron domin nian.

Fulan ida ami observa no hare, se iha ami nia grupu laran, iha familia ruma ne’ebe preciza tulun karik, los duni katak, ami hare iha grupu laran, iha familia ida ne’ebe preciza tulun, nune’e, duké ami ba buka fatin dook, ami hare uluk ba ami nia familia ADMA ne’e, iha balun ne’ebe preciza tebes tulun. Nune’e, loron ohin, ne’ebe ami deside ona, atu halo asaun karidade ne’e, hodi hanoin ba loron domin nian, ami halibur hamutuk iha membru ida nia uma hafoin husi uma ne’e, ami lao ba familia ne’ebe ami hakarak ba visita ohin.

Ami observa katak, ami nia feto-maluk ne’e, hakarak halo varanda oan ida iha ninia uma, maibe labele, nune’e ho ksolok, ami hotu halibur osan oituan hodi sosa kaleng oan ruma no besi-oan ruma atu nia bele halo nia varanda. No ami mos oferese tan buat ruma ne’ebe ami bele atu fo iha loron ne’e. Maibe se mak nia ne’e?? Nia mak ami nia feto-maluk ADMA ida, ne’ebe ami hotu sei halo surpreza ba nia.

Wainhira ami hahu lao, balun husi ami, husu, ita atu ba los ne’ebe? Maibe ida ne’ebe gia dalan dehan, ita lao tuir deit ida ne’ebe lao uluk, nia para iha fatin ne’ebe, ita mos sei para iha ne’eba, katak fatin ne’ebe ita atu ba visita mak ne’eba ona. Nune’e, ho kuidadu ami hakat neneik-neneik, to’o ami para iha uma ida nia oin. Senhora uma nain, ne’ebe ami lao hamutuk fila fali ba nia uma rasik, hakfodak (tan ami halo sorpreza ba nia), nia la hein katak, uma ne’ebe nia maluk ADMA sira hili atu visita ba loron ida ohin mak ninia uma. Ho mata-ben nia hahu tanis, tan laran-taridu loos, basa’a nia la hein. Ami nia animadora fo aifunan rosa mean ida ba nia, sinal domin husi ami nia maluk ADMA sira hotu, tan ohin loron domin nian.

(ADMA – Balide)