Komunidade Eusebia Palomino

Dili, 9 Fevereiru 2023

Loron 9 Fevereiru mak loron festa litúrjika Beata Eusebia Palomino nian. Nune’e mak komunidade ne’ebé foti nia nu’udar padroeira no grupu foin-sa’e voluntáriu Palomino selebra nu’udar festa.

Festa hahú ho rozáriu ne’ebé grupu liturjia prepara hodi fó hanoin fali Beata Eusebia nia virtude sira atu banati tuir. Hafoin kontinua ho Santa MIssa selebra husi Pe. Mario do Rosário SDB. Evanjellu kona-ba Rahun-D’iak liuliu ida uluk hatudu Eusebia Palomino nia karakterístika: “ema kiak. P. Mario hateten katak “situasaun kiak halo ita sadere an de’it ba Maromak, hein de’it Maromak”. Nune’e mak Eusebia husi família kiak, hatene tau laran-metin ba Maromak de’it, iha pasiénsia atu hein. Ema ne’ebé iha buat hotu fiar iha nia an de’it, ema ne’ebé mukit konfia iha Maromak. Iha finál padre Mario husu atu ita “deskobre Maromak nia prezensa, tau laran-metin ba Nia, atu nune sai fermentu ne’ebé influensia sosiedade”.

Hotu tiha meza eukarístika, iha meza konfraternizasaun ho jantár, no hafoin, Irmán sira kumprimenta Diretora komunidade ho drama bo dansa ida kona-ba Eusebia Palomino nia fragmentu ida moris nian, ne’ebé hatudu ninia laran-metin boot ba Maromak nia Providénsia.

Iha eskola ho estudante sira iha “bondia” husi Ir Jacinta Gusmão kona-ba Beata Eusebia nia moris no orasaun atu selebra Beata Eusebia Palomino.