Libanha moniz

Loron 5 Fevereiru 2023, Animadores (FMA NO SDB), zona Dili nian hala’o animasaun, jogu, Lectio Divina hamutuk, kada grupu ba sharing hamutuk, selebrasaun Santa Missa no jantar hamutuk  iha CPN Pos-Novisiado Comoro hafoin mak fahe malu.  Iha lectio Divina hamutuk ida ne’e ho objektivu mak haboot liu tan domin relasaun nian ho Maromak no sai Fermentu ne’ebé fó sabor iha moris ohin loron nian, liu-liu iha misaun, estudu no responsabilidade nu’udar animadores iha fatin ne’ebé Maromak entrega iha idak-idak nia liman. Sai fermentu mak sai estilu ida prezensa nian, presiza iha pasiensia, no fermentu hanorin mai ita virtude haraik-an, no oinsa mak atu fó signifikadu ba tempu nian. Iha homilia husi Pe. Provinsial, Pe. Anacleto Pires SDB, hateten iha tempu hirak liu ba Santu Padre João Paolo II hateten:”imi Timor-oan sira mak tenke sai masin no Naroman mundu nian, husu mai ita atu sai masin no naroman iha ita nia moris rasik”. Ita nu’udar animadores iha misaun rua mak: hanesan sai masin no naroman. Sai masin signifika fó sabor ba moris no sai naroman signifika ita buka fó naroman mos ba ema seluk liu husi ita nia liafuan no hahalok sira.