Enkontru Orasaun nian ho amlulik sira, diákonu sira, konsagradu sira, konsagrada sira no seminarista sira

(Katedrál Na’i-Feto Congo nian iha Kinsasha-R.D.Congo)

2 Fevereiru 2023

[…]

«Atu moris ita-nia vokasaun, sei la falta dezafiu atu enfrenta, nune’e mós tentasaun atu manán. Ha’u hakarak para lalais iha tolu ne’e: mediokridade espirituál, komudidade mundana, superfisialidade

Uluknanai, manán mediokridade espirituál. No oinsá? Aprezentasaun Na’i nian, hanaran iha Oriente kristaun nu’udar «festa enkontru nian», fó hanoin mai ita prioridade ita-nia moris nian: enkontru ho Na’i, espesialmente iha orasaun pesoál, basá relasaun ho Nia mak fundamentu ba ita-nia atuasaun. Ita keta haluha katak buat hotu nia segredu mak orasaun, basá ministériu no apostoladu la’ós, primariamente, ita-nia obra nune’e mós la depende de’it iha meiu umanu sira. Imi sei dehan mai ha’u: Loos duni! Maibé kompromisu sira, urjénsia pastorál sira, esforsu apostóliku sira, kolen, nst., halo ita iha risku lahó tempu no lahó enerjia sufisiente sir aba orasaun. Ne’e duni, ha’u hakarak kompartilla konsellu ruma: iha fatin dahuluk, ita mantein fiél ba ritmu balun orasaun litúrjika sira-nian ne’ebé marka ita-nia loron, husi Misa to’o Liturjia Oras nian. Selebrasaun Eukarístika loroloron mak fuan ne’ebé halo fekit vida saserdotál no relijioza. Liturjia Oras nian permite mai ita atu harohan ho Igreja no atu halo ho forma regulár: ita keta deskuida buat ne’e! No ita keta husik Konfisaun: ita nafatin presiza atu simu perdaun, atu bele hetan mizerikórdia. Konsellu seluk: hanesan ita hatene, ita labele limita an de’it ba resitasaun rituál orasaun sira-nian, maibé presiza loroloron rezerva tempu intensu ida orasaun nian, atu komunika fuan ho fuan ho Na’i: momentu ida prolongasaun adorasaun nian, meditasaun Liafuan nian, harohan Santu Rozáriu; enkontru íntimu ida ho Nia ne’ebé ita hadomi liu sasán hotu. Aleinde ne’e, baihira ita iha atividade nia laran, ita bele mós halo orasaun fuan nian, «jakulatória» sira – sira-ne’e rikusoin ida –, liafuan hahí nian, agradeismentu no invokasaun nian ne’ebé ita repete iha-ne’ebé de’it ita horik bá. Orasaun hasai ita husi sentru, loke ita ba Maromak, foti sa’e ita basá tau ita iha Nia liman. Orasaun kria iha ita espasu ida atu esperimenta prosimidade Maromak nian, atu Ninia Liafuan sai familiár mai ita no, liuhusi ita-nia intermédiu, ba ema hotu ne’ebé ita hasoru. Lahó orasaun, it ala bá dook… Ikus nian, atu supera mediokridade espirituál, ita keta kolen atu invoka Na’i-Feto – nia ita-nia Inan – no husi Nia aprende kontempla no tuir Jezús.

Dezafiu daruak mak manán tentasaun komodidade mundana, moris kómoda iha-ne’ebé posivel organiza maizumenus buat hotu no kontinua bá oin ho baruk, hodi buka ita-nia konfortu no rasta ita-nia an lahó entuziazmu. Maibé, halo nune’e, ita lakon misaun nia fuan, katak sai husi espasu “ha’u” nian no la’o bá maun no biin-alin sira hodi ezerse, hodi Maromak nia naran, arte prosimidade nian. Iha risku boot ida liga ho mundanidade, espesialmente iha kontestu pobreza no sofrimentu nian: ita aproveita funsaun ne’ebé ita iha atu satisfás ita-nia karénsia no komodidade sira. Triste, triste liu, bainhira ita taka an iha an rasik, hodi sai burokrata espíritu sira-nian ne’ebé malirin. Entaun, envezde serví Evanjellu, ita preokupa an atu administra finansa sira no realiza negósiu sira sarak lori vantajen mai ita. Maun no biin-alin sira, ida-ne’e eskandalozu, bainhira akontese iha padre ka relijiozu ida nia moris, ne’ebé loloos tenke sai modelu sobriedade no liberdade interiór nian. Iha kontráriu, furak oinsá mantein an transparente iha intensaun sira no livre husi kompromisu sira ho osan, hodi hakohak pobreza evanjélika ho ksolok no serbisu iha ema kiak sira nia sorin! No furak oinsá sai nabilan hodi moris selibadu nu’udar sinál disponibilidade totál ba Maromak nia Reinu! Labele akontese atu hetan iha ita vísiu sira, ho abut kle’an, vísiu sira ne’ebé ita hakarak hasai husi ema seluk no husi sosiendade. Favór ida, ita sai vijilante kona-ba komodidade mundana.

Finalmente, dezafiu datoluk mak manán tentasaun superfisialidade nian. Se Maromak nia Povu hein atu Na’i nia Liafuan to’o ba sira no simu konsolasaun, nia presiza padre no relijiozu sira ne’ebé preparadu, formadu, apaixonadu ba Evanjellu. Maromak tau iha ita-nia liman don ida no, husi ita-nia parte, sai foti an atu hanoin katak ita bele hala’o misaun ne’ebé Maromak bolu ita bá hodi la serbisu loron ba loron ho an rasik no hodi la forma an ho maneira adekuada iha vida espirituál nune’e mós iha preparasaun teolójika. Ema sira la presiza funsionáriu sagradu sira, nune’e mós la presiza doutór sira ne’ebé hadook husi povu. Ita simu bolun atu tama iha mistériu kristaun, hakle’an ninia doutrina, estuda no medita Maromak nia Liafuan no; no, tempu hanesan, nakloke ba ita-nia tempu nia laran-taridu sira; ba kestaun sira kompleksa ba beibeik ita-nia époka nian, atu bele komprende moris no ema sira nia ezijénsia sira, atu komprende oinsá kaer sira liman no akompaña sira. Tanba ne’e, kleru nia formasaun la’ós fakultativa. Ha’u dehan ida-ne’e ba seminarista sira, maibé vale ba hotu: formasaun mak dalan ida atu la’o tuir iha moris tomak. Ne’e mak hanaran formasaun permanente: formasaun ba moris tomak.

Dezafiu sira ne’ebé ha’u ko’alia ba imi, ita tenke enfrenta se ita hakarak serví povu nu’udar testemuña sira Maromak nia domin nian, basá servisu sai efikás de’it se servisu ne’e liu husi testemuñu. Imi keta haluha liafuan ida ne’e: testemuñu. Defaktu, depoizde hato’o liafuan konsolasaun nian, Na’i hatutan tan: «Se husi sira ne’ebé haklaken ida-ne’e, hodi lori mai ita-nia tilun akontesimentu antigu sira? (…) Ha’u nia testemuña sira mak imi» (Is 43, 9.10). Testemuña sira. Atu sai amlulik, diákonu, konsagradu no konsagrada di’ak sira, la to’o liafuan no intensaun sira: uluknanai, ko’alia ho moris rasik, moris rasik. Maun no biin-alin doben sira, hodi haree imi, ha’u agradese Maromak, basá imi mak sinál sira Jezús nia prezensa ne’ebé liu husi lurón sira rai ne’e nian no kona povu nia moris, kon asira-nia isin nia kanek sira. Maibé sei kontinua iha nesesidade kona-ba joven sira ne’ebé dehan «sim» ba Na’i, amlulik no relijiozu sira seluk ne’ebé husik, atu ho sira moris rasik, sai transparénsia Na’i nia beleza nian».

[…]

Papa Francisco