Tema enkontru bispu sira husi Konferénsia espiskopál País sira ho lia-portugés husi loron 6 to’o 10 Setembru 2012: “Dezafiu seita sira nian iha orizonte Nova Evanjelizasaun nian”.

 

Dili (Timor-Leste) – Timor-Leste ohin sai uma-na’in ba bispu sira husi Konferénsia espiskopál País sira ho lia-portugés husi loron 6 to’o 10 Setembru 2012.  Delegasaun sira hamutuk bispu na’in nee, amlulik rua no jornalista ida. Reprezentante hafoin tun husi aviaun, hakat liu ba Centro de Formação João Paulo II, Comoro atu hola kafé ida.  Iha ne’e maka fmatin.org hetan oportunidade atu dada-lia uitoan ho sekretáriu CEP (Conferência Episcopal Portuguesa), P. Manuel Morujão, SJ.

 

Tansá enkontru ida prezidénsia Konferénsia Episkopál husi País Luzófonu sira?

Ne’e mak reuniaun ida aprosimasaun nian entre Kreda sira ne’ebé ami reprezenta, katak País sira ne’ebé soi nu’udar língua ofisál lia-portugés: Brasil, Angola, Moçambique, Guiné, Cabo Verde, S. Tomé e Príncipe, Portugal no naturalmente Timor-Leste…

Nasaun foun liu no mós Konferénsia episkopál ne’ebé foin harii…

Loos, bispu sira ne’ebé iha ne’e reprezenta sira-nia konferénsia episkopál ida-idak. Ne’e enkontru sira ne’ebé trata tema prinsipál ida, tema ida formasaun nian no tema maka: “Dezafiu seita sira nian iha orizonte Nova Evanjelizasaun nian”. Ita hatene katak ohin loron difisil liu ba povu hatene oinsá orienta an iha dalan… Ita dehan seita sira ne’e lori proposta ne’ebé dada maka’as atu ema tuir seita sira-ne’e. Normalmente buat ne’e akontese tanba falta edukasaun no konserteza tama mós iha liña formasaun no esklaresimentu atu ema bele ho liberdade hili relijiaun ida, no la’ós halai tuir promesa irrealísta sira ne’ebé la korresponde ho lialoos fiar nian. Liután iha Tinan Fiar nian sai razaun ida tan atu promove fiar.

Enkontru hirak ona maka hala’o tiha ona nu’udar Konferénsia Episkopál País ho lian ofisál lia-portugés ?

Ida-ne’e maka enkontru dasanuluk, katak besik tinan ruanulu ona mak hahú inisiativa ida-ne’e. Baibain halo tinan rua dala ida, iha nasaun ida-idak tuir orden alfabétiku, nune’e nia hahú iha Angola, Brasil… tinan kotuk eh tinan rua liubá iha São Tomé e Príncipe no tinan ne’e iha Timor-Leste.  Kreda lokál ida-idak ne’ebé simu bispu sira hili tema reflesaun nian no organiza oinsá dezenvolve nia, nune’e tema ida seita sira-nian mai husi Kreda Timor-Leste.